ޖޮއިންޓްވުމުގެ ފުރުސަތު އޮންނާނީ ވަގުތީ ލިސްޓްގައި އެމީހުންގެ ސްޓޭޓަސް "ޝަރުތުހަމަވޭ ޖޮއިންޓްވުމުގެ ފުރުސަތު އޮތް" ފަރާތްތަކަށް
ޖޮއިންޓް އެޕްލިކޭޝަން ގެދޮރުވެރިޔާ ޕޯޓަލް އިން ހުށަހެޅޭނެ
މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރު މުހައްމަދު އާރިފް
މާލޭގެ ރަށްވެހިންނަށް ބޯހިޔާވަހިކަން ފޯރުކޮށްދިނުމަށްޓަކައި ސަރުކާރުން ކުރިއަށްގެންދާ ބިންވެރިޔާ ސްކީމުގެ ދަށުން ގޯތި ލިބުނު މީހުންގެ ލިސްޓުގައި މިހާރު ނަން ނެތް ފަރާތްތަކަށް ވެސް ޝަރުތު ހަމަވާނަމަ އާއިލާ މީހަކާއެކު ޖޮއިންޓް އެޕްލިކޭޝަނަކަށް ބަދަލުކުރުމުގެ ފުރުސަތު އޮންނާނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަސުރުޚީގައި ވާހަކަދައްކަވަމުންނެވެ. ބިންވެރިޔާ ސްކީމްގެ ދަށުން ގޯތި ދިނުމުގެ މަަސައްކަތް ކުރި ކޮމިޓީގައި ވެސް ހިމެނިވަޑައިގަންނަވާ އާރިފް ވިދާޅުވީ ގޯތި ދޭނެ ފަރާތްތައް ނިންމާފައި ވާނީ ވަރަށް ގިނަ ކަންކަން ބެލުމަށް ފަހުގައި ކަމަށެވެ. އެގޮތުން ގޯތި ލިބޭ ފަރާތާއި އޭނާގެ އާއިލާ އަދި އެހެނިހެން ގާތް މީހުންނަށް ވެސް ލިބެން ހުރި ބޯހިޔާވަހިކަމަކީ ކޮބާތޯ ބަލާފައިވާނެ ކަމަށް އާރިފް ވިދާޅުވިއެވެ. އެގޮތުން ބެލިބެލުމުން މާލޭގެ ރައްޔިތުންގެ ދިރިއުޅުމުގެ ހާލަތު ހުރީ ވަރަށް ދަށްކޮށްކަން ފާހަގަކުރެވުނު ކަމަށާއި ކުދިކުދި ތަންތަންކޮޅުގައި ގިނަ އާއިލާތައް ދިރިއުޅެމުންދަނީ ވަރަށް ހާލުގައި ކަމަށް އޭނާ ވަނީ ފާހަގަކުރައްވާފައެވެ. މީގެ އިތުރުން ގޯތި ލިބުނު ފަރާތްތަކަކީ ޝަރުތު ހަމަވާ ފަރާތްތަކުގެ ތެރެއިން މިވަގުތު އެންމެ ބޮޑަށް ބޯހިޔާވަހިކަމަށް ބޭނުންވެފައި ތިބި މީހުން ކަމަށް ވެސް އާރިފް ވިދާޅުވިއެވެ.
ފަލަސުރުޚީ ޕްރޮގްރާމްގައި އާރިފް ވަނީ ޝަރުތު ހަމަވާ މީހުން ހުށަހަޅާފައިވާ އެޕްލިކޭޝަން ޖޮއިންޓް އެޕްލިކޭޝަނަކަށް ބަދަލުކުރުމުގެ ފުރުސަތު ޝަކުވާ ހުށަހެޅުމުގެ މުއްދަތު ކުރިއަށްދާއިރު ވެސް އޮންނާނެ ކަމަށް ވިދާޅުވެފައެވެ. އެގޮތުން ޖޫން 26 އިން ޖުލައި 15 އަށް ލިބޭ ރިކުއެސްޓްތަކަށް ބެލުމަށް ފަހު ފައިނަލް ލިސްޓް އެކުލަވާލާނީ ޖޮއިންޓްވާ މީހުންނާއި އެކުގައި ކަމަށް އާރިފް ވިދާޅުވިއެވެ. އާރިފް ވަނީ ޖޮއިންޓް އެޕްލިކޭޝަން ހުށަހަޅާ މީހުންނަށް ލިބޭ ބިން ސައިޒުގެ ގޮތުން ބަލާއިރު، އެކަނި އެކަކު ގޯއްޗަށް އެދުމުން ލިބޭ ބިމުގެ ސައިޒަށް ވުރެ ބޮޑުވާނެ ކަން ފާހަގަކުރައްވާފައެވެ. އާރިފް ވަނީ ގޯއްޗަށް ޝަުރުތު ހަމަވާ މީހުންގެ ލިސްޓުން ޖޮއިންޓްވުމުގެ ފުރުސަތު އޮތް މީހުންނަށް އެކަން ގެދޮރުވެރިޔާ ޕޯޓަލް އިން އެނގެން އޮންނާނެ ކަމަށެވެ.
ހޯމަ ދުވަހު 5،000 ގޯއްޗަށް ޝަރުތު ހަމަވާ މީހުންގެ ލިސްޓު ވަނީ ހާމަކޮށްފައެވެ. ޕްލޭނިން މިނިސްޓްރީން ވަނީ އެ ލިސްޓުގައި ނުހިމެނުނު ނަމަވެސް، ގޯތި ލިބުމަށް ޝަރުތު ހަމަވާ 9،555 މީހުންނަށް ވެސް ޖޮއިންޓްވުމުގެ ފުރުސަތު އޮންނާނެ ކަމަށެވެ.
ޖޮއިންޓް ވުމުގެ ފުރުސަތު އޮންނާނީ ވަގުތީ ލިސްޓްގައި އެމީހުންގެ ސްޓޭޓަސް "ޝަރުތުހަމަވޭ ޖޮއިންޓްވުމުގެ ފުރުސަތު އޮތް" ފަރާތްތަކުގެ ތެރެއިން ބިންވެރިޔާ އުސޫލުގައި ބަޔާންކޮށްފައިވާ ޖޮއިންޓް ވެވޭނެ ފަރާތްތަކުގެ މެދުގައެވެ.
ޖޮއިންޓް އެޕްލިކޭޝަން ހުށަހެޅުމަށްޓަކައި، ގެދޮރުވެރިޔާ ޕޯޓަލަށް ލޮގިންވުމަށް ފަހު، ގެދޮރުވެރިޔާ ވެބްސައިޓަށް ވަދެ އެ ޕޭޖުގައިވާ "ލޮގިން ކުރައްވާ" އަށް ފިތާލުމުން އީފާސް އައިޑިއާއި ޕާސްޕޯޑު ޖެހުމަށް އަރާނެއެވެ. އެއަށް ފަހު އައިޑީ އަދި ޕާސްވޯޑު ޖަހައި ލޮގިންވުމުން އެ ފަރާތަކުން ހުށަހަޅައިފައިވާ އެޕްލިކޭޝަންގެ ސްޓޭޓަސް ފެނިގެންދާނެއެވެ. ޖޮއިންޓް ރިކުއެސްޓް ފޮނުވުމަށް ޝަރުތު ހަމަވާނަމަ އެކަން ވެސް އެނގޭނެއެވެ. ޖޮއިންޓް ރިކުއެސްޓް ފޮނުވުމަށް، "ޖޮއިންޓް ރިކުއެސްޓް ފޮނުއްވާ" އަށް ފިތާލުމަށްފަހު އެ މީހެއްގެ އައިޑީ ކާޑު ނަމްބަރު ޖަހައި، އާއިލާގެ މެންބަރާ އޮންނަ ގުޅުން ބަޔާން ކުރުމުން ރިކުއެސްޓް ސަބްމިޓް ކުރެވެން ހުންނާނެއެވެ.
