ކުރީގެ ހައުސިންގ މިނިސްޓްރީގެ ނަމުގައި މި ސަރުކާރުގެ ތެރޭގައި އެޗްޑީސީ އިން ވަގު ޑޮކިއުމެންޓް ހެދިކަން ކަށަވަރު!
ލިޔުން ހަދާފައިވަނީ ކުރީގެ ހައުސިންގ މިނިސްޓްރީގެ ލެޓަރހެޑް ގައި
ކުރީގެ ހައުސިންގ މިނިސްޓްރީގެ ނަމުގައި ތައްޔާރުކޮށްފައިވާ ވަގު ޑޮކިއުމެންޓެއް
ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ނަމުގައި މި ސަރުކާރުގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން "ބަންޑާރަ ގޯތީގެ ރަޖިސްޓަރީ" ގެ ވަގު ޑޮކިއުމެންޓް ހަދައިދިންކަން ކަށަވަރުވެއްޖެއެވެ.
ހުޅުމާލެއިން "ބިންވެރިޔާ" ސްކީމް ގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، އެޗްޑީސީ ގެ ތެރެއިން ހިނގަމުންދާ ވައްކަމާ، ޚިޔާނާތާއި މަކަރު ހީލާތް ހެދުމުގެ އެތައް ކަމެއް ދަނީ ފެންމަތިވަމުންނެވެ.
"ބިންވެރިޔާ" ސްކީމް ގެ ދަށުން ހުޅުމާލެ އިން ގޯއްޗެއް ގަތް މީހަކަށް އެޗްޑީސީ އިން މީގެ ކުޑަ ދުވަސްކޮޅެއް ކުރިން ދިން "ބަންޑާރަ ގޯތީގެ ރަޖިސްޓަރީ" ރާއްޖެއެމްވީ އާ ހިއްސާ ކޮށްފައިވާއިރު، އެ ލިޔުން ހަދާފައިވަނީ ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރ ގެ ނަމުގައެވެ.
ރާއްޖެއެމްވީ އަށް ފެނުނު ގޯއްޗާ ބެހޭ ލިޔުން އެޗްޑީސީ އިން ދިން ފަރާތުން އޭނާގެ ނަން ހާމަ ނުކުރުމަށް ޝަރުތުކޮށް ބުނީ، އޭނާ އަށް ލިޔުން ދިނީ 65،000ރ އެ ތަނުގެ މުވައްޒަފަކަށް ހަވާލު ކުރުމުންނެވެ.
ލިޔުން ލިބުނު ފަރާތުން ކިޔައިދިން ގޮތުގައި އޭނާ އަށް ލިޔުން ހަވާލު ކުރަމުން ވެސް އެ ލިޔުމަކީ ކުރީގެ ހައުސިންގ މިނިސްޓްރީގެ ނަމުގައި ހަދާފައިވާ ލިޔުމެއް ކަމަށް ބުނި ކަމަށާއި، އެއީ ގާނޫނީ ގޮތުން އުސޫލެއްގެ ތެރެއަށް ފެއްތޭނީ އެ ގޮތައް އެކަން ކޮށްގެން ކަމަށް ވެސް އެޗްޑީސީ ގެ އޮފިޝަލް ބުނެފައިވާ ކަމަށެވެ.
ލިޔުމުގައި ކުރީގެ ހައުސިންގ މިނިސްޓްރީގެ ތައްގަނޑު ނޫކުލައިގެ ދެލިން ޖަހާފައިވެއެވެ. ސޮއިކޮށްފައިވަނީ ހައުސިން މިނިސްޓްރީގެ ޑިރެކްޓަރ ޖެނެރަލް އަހުމަދު ވިޝާން ނަސީމްގެ ނަންމަތީގައެވެ. އާއްމުކޮށް ރަޖިސްޓްރީތައް ހުންނަ ގޮތަށް، ރަޖިސްޓްރީ ނަންބަރާ، ގޯތީގެ ނަންބަރާ، ގޯތި ބޮޑުމިނަށް ދަންދެން ވަނީ ލިޔެފައެވެ.
ބިންވެރިޔާ ސްކީމްގެ ދަށުން މަކަރު ހީލަތުން ބަޔަކަށް ގޯތިތަކެއް ދިން މައްސަލަ ފުލުހުން ގެންދަނީ ތަހުގީގު ކުރަމުންނެވެ. މިހާތަނަށް ތަހުގީގު ގޮސްފައިވާ ގޮޮތާ ބެހޭ ގޮތުން ނޫސްވެރިންގެ ބައްދަލުވުމެއް ބުރާސްފަތި ދުވަހުގެ ރޭ ފުލުހުން ބޭއްވިއިރު، އެ ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވިދާޅުވީ، ގޯތި ލިބިފައިވާ ފަރާތްތަކުން ހޯދި ލިޔެކިޔުންތަކަކީ ކުރީ ސަރުކާރުން ދޫކޮށްފައިވާ ލިޔެކިޔުންތަކެއް ކަމަށެވެ. އެހެން ނަމަވެސް އޭނާ އެހެން ވިދާޅުވުމަށްފަހު ފަހުން ވިދާޅުވީ އެ ލިޔެކިޔުންތަކުގެ ސައްހަކަން އަދި އެހާ ހިސާބަށް ކަށަވަރު ނުކުރެވޭ ކަމަށެވެ.
