އަކްރަމް އާއި ހައުސިންގެ ކުރީގެ ވެރިންނަށް ކުރި ދައުވާއަށް އިންކާރު ކޮށްފި
ހޯމަ ދުވަހުގެ އަޑުއެހުމުގައި ދިފާއީ ހެކި ހުށަހަޅަން 10 ދުވަހާއި ޝަރީއަތުގެ ކުރިން ހުށަހަޅާ ހުށަހެޅުންތަކަށް 15 ދުވަސް ދީފައިވޭ
ޕްލޭނިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް (ވ) އަދި އެ މިނިސްޓްރީގެ ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް
ކުރީގެ ސަރުކާރުން ހިންގި ގެދޮރުވެރިޔާ އަދި ބިންވެރިޔާ ސްކީމުގެ ދަށުން ޝަރުތު ހަމަނުވާ ބަޔަކަށް ފުލެޓާއި ގޯތި ދިންކަމަށް ބުނާ މައްސަލައިގައި އެ ދައުވާ އުފުލާފައިވާ އެންމެން ދައުވާ އަށް އިންކާރުކޮށްފިއެވެ.
ހޯމަ ދުވަހު ކްރިމިނަލް ކޯޓުގައި މި މައްސަލައިގެ އަޑުއެހުމެއް ވަނީ ކުރިއަށް ގެންގޮސްފައެވެ. ގެދޮރުވެރިޔާ ސްކީމުގެ މައްސަލައިގައި ދައުވާ އުފުލީ މިދިޔަ އެމްޑީޕީ ސަރުކާރުގެ ހައުސިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން، ހައުސިންގ މިނިސްޓްރީގެ ކުރީގެ ދެ ސިނީއަރ އެގްޒެކެޓިވް މުހައްމަދު އާރިފް އާއި ލިރުޣާމް ވަހީދު އަދި ހައުސިންގ މިނިސްޓްރީގެ ކުރީގެ ޑިރެކްޓަރު ޖެނެރަލް އަހުމަދު ވިޝާން ނަސީމް އެވެ.
މި އެންމެންގެ މައްޗަށް ވެސް އުފުލީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އެވެ. ހޯމަ ދުވަހުގެ އަޑުއެހުމަކީ ދައުވާއަށް ޖަވާބުދާރީ ވުމަށް ކުރިއަށް ގެންދިޔަ އަޑުއެހުމެކެވެ. އަދި ދައުވާއުފުލި 4 ފަރާތުން ވެސް ވަނީ ދައުވާއަށް އިންކާރުކޮށްފައެވެ. އަދި ދިފާއީ ވަކީލުން ވެސް ވަނީ ދައުވާއާއި ގުޅޭ ގިނަ ސުވާލުތަކެއް ކޮށްފައެވެ. އެގޮތުން ދައުވާގައި ބަޔާންކުރާ ކުށުގެ ރުކުންތަކާއި ގުޅިގެން ދިފާއުން ސުވާލު އުފެއްދިއެވެ.
ހޯމަ ދުވަހުގެ އަޑުއެހުމުގައި ވަނީ ދިފާއީ ހެކި ހުށަހަޅަން 10 ދުވަސް ދީފައެވެ. އަދި ޝަރީއަތުގެ ކުރިން ހުށަހަޅާ ހުށަހެޅުންތަކަށް 15 ދުވަސް ވަނީ ދީފައެވެ.
