75 ޕޮއިންޓަށްވުރެ މަދުން ލިބިފައިވާ ފަރާތްތަކުގެ މެދުގައި އަލުން ގުރުއަތު ނަގަނީ ފުލެޓް އަތުލުމަށް: މައުރޫފް
އެމްޑީޕީ ސަރުކާރުން ފުލެޓް އެލޮކޭޓްކޮށްފައިވާ ފަރާތްތަކަށް ފުލެޓް ނުދީ އެލޮކޭޓް ނުކުރާ ފަރާތްތަކަށް ފުލެޓް ދެމުންދޭ
ކެންދޫ ދާއިރާގެ މެންބަރު މައުރޫފް ޒާކިރު
75 ޕޮއިންޓަށްވުރެ މަދަުން ލިބިފައިވާ ފަރާތްތަކުގެ މެދުގައި އަލުން ގުރުއަތު ނަގަނީ އެއްބަސްވުންދީފައި ހުރި ބައެއް ފަރާތްތަކުގެ ފުލެޓް އަތުލުމަށް ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
އެމްޑީޕީގެ ބޯހިޔާވަހިކަމުގެ ކޮމިޓީން ބޭއްވި ނޫސްވެރިން ބައްދަލުވުމުގައި ވާހަކަ ދައްކަވަމުން މައުރޫފް ވިދާޅުވީ މި ސަރުކާރުން ގޮތް ހުސްވެގެން ތަފާތު އެތައް ތަނެއްގައި އެތައް ވާހަކަތަކެއް ދެއްކުމަށްފަހު ފުލެޓްތައް ދޫކުަރަމުން ދާއިރުގައި އެމްޑީޕީ ސަރުކާރުން ފުލެޓް ހަވާލުކޮށްފައި ހުރި ބައެއް ފަރާތްތަކާއި، ފުލެތް އެލޮކޭޓް ކޮށްފައިވާ ބައެއް ފަރާތްތަކަށް އެލޮކޭޓް ކޮށްފައި ހުރި ފުލެޓް ނޫން އެހެން ފުލެޓް ދިނުމާއި އެލޮކޭޓް ކޮށްފައިވާ ފަރާތްތަކަށް ފުލެޓް ނުދީ އެލޮކޭޓް ނުކުރާ ފަރާތްތަކަށް ފުލެޓް ދެމުންދާ ކަމަށެވެ.
މައުރޫފް ވިދާޅުވީ 75 މާކްސް އިން ދަށުން ލިބިފައިވާ ފަރާތްތަކުގެ މެދުގައި އަލުން ގުރުއަތުލުން ހިންގަނީ އެއްބަސްވުން ދީފައި ހުރި ފަރާތްތަކުގެ ބައެއް ފުލެޓްތައް އަތުލެވޭ ގޮތަކަށް ނުވަތަ އެފަރާތްތައް ހައްގުން މަހުރޫމްކުރެވޭ ގޮތަށް ކަމަށެވެ.
ރިޔާސީ އިންތިހާބުގެ ކުރިން ކެނޑިޑޭޓް މުއިއްޒު ވިދާޅުވެފައިވަނީ އެއްވެސް ރައްޔިތެއްގެ ގޯއްޗެއް ފުލެޓެއް އަތުނުލާނެކަން. އެވާހަކަ ތަކުރާރުކޮށް އަޅުގަނޑުމެން ދަންނަވަން. އެތައް މިތަނުގައި އަޅުގަނޑުމެން މި ވާހަކަ ދައްކަންޖެހޭ ސަބަބަކީ ދިވެހި ރައްޔިތުން މި ސަރުކާރަށް ވޯޓުދީ ރައީސް މުއިއްޒު ހޮވީ މި ވާހަކަތަކުގައި ޖެހިގެން. އެހެންވީމާ އަޅުގަނޑުމެން މި ވާހަކަ ދައްކަން މިޖެހެނީ. އެވަރުގެ ބޮޑު އޮޅުވާލުމެއް ދޮގުތަކެއް ރައްޔިތުންނަށް ހަދާ ވެރިކަމަށް އައިސް އެކަން ނުކުރީމާ އަޅުގަނޑުމެން އެބަޖެހޭ މި ވެރިކަމުގެ ސައްހަކަން ގެއްލިފައިވާ ވާހަކަ ދައްކަން.ކެންދޫ ދާއިރާގެ މެންބަރު މައުރޫފް ޒާކިރު
ގެދޮރުވެރިޔާ ސްކީމާއި ގުޅޭގޮތުން ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހައުސިންގ މިނިސްޓަރ ޑރ. އަބްދުﷲ މުއްތަލިބު ވިދާޅުވެފައިވަނީ 75 ޕޮއިންޓް ލިބިފައިވާ ފަރާތްތަކުގެ ތެރެއިން 3 ކޮޓަރި ލިބިފައިވާ ފަރާތްތަކުގެ ފުލެޓް އެލޮކޭޝަން ނަގާކަމުގައިވާނަމަ 75 ޕޮއިންޓް ލިބި ފުލެޓް ނަންބަރު ދީފައިވާ ހުރިހާ ފަރާތްތަކެއްގެ އަތުން ނަންބަރުތައް އަތުލައިގެން ނޫނީ އިންސާފުވެރި ނުވާނެތީ، 75 ޕޮއިންޓް ލިބިފައިތިބި ފަރާތްތަކަށް ހަދާފައިވާ އެލޮކޭޝަންސް ތައް ކެންސަލް ކޮށްފައިވާ ކަމަށެވެ.
އަދި 75 ލިބިފައިވާ ފަރާތްތަކަށް 3 ކޮޓަރި ލިބުން ނޫނީ 2 ކޮޓަރި ލިބޭ އޮޕްޝަނެއް ލިބޭނެ ކަމަށާއި، ކޮންމެވެސް އެއް އޮޕަޝަނެއް ހިޔާރުކުރެވޭނެ ކަމަށެވެ. އަދި 3 ކޮޓަރި ލިބޭ ފަރާތްތައް ގުރުއަތު ނަގާފައި ބާކީވާ ފަރާތްތަކަށް 2 ކޮޓަރި އެޕާޓްމަންޓް އެލޮކޭޝަން ހެދޭނެކަމަށް މިނިސްޓަރު ވަނީ ވިދާޅުވެފައެވެ.
