ނިމިދިޔަ ސަރުކާރުން މާލޭގެ ރައްޔިތުންނަށް ގޯތި ދިނުމަށްޓަކާ ކުރިއަށް ގެންދިޔަ "ބިންވެރިޔާ" ސްކީމާއި ފްލެޓް ދިނުމަށްޓަކާ އެ ސަރުކާރުން ހިންގި "ގެދޮރުވެރިޔާ" ސްކީމާ ގުޅިގެން ޖިނާއި ތަހުގީގެއް ހިންގަން ޕްރޮސެކިއުޓަރ ޖެނެރަލް އައްބާސް ޝަރީފް ތަހުގީގީ އިދާރާތަކުގެ މައްޗަށް އަމުރުކޮށްފިއެވެ.
ޕީޖީ މިފަދަ އަމުރެއްކުރައްވާފައި ވަނީ އެ ދެ ސްކީމަށް އެދި ފޯމު ބަލައިގަތުމުގައި އުސޫލާއި ޚިލާފުވެފައިވާ ކަމަށް ޕީޖީގެ ސަމާލުކަމަށް އައުމުން ކަމަށް ޕީޖީ އޮފީހުން ވަނީ ބުނެފައެވެ.
މީގެ އިތުރުން ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި ވެސް އުސޫލާއި ޚިލާފުވެފައިވާ ކަމަށް މައުލޫމާތު ލިބިފައިވާ ކަމަށް ބަޔާންކޮށްފައިވެއެވެ.
ހަމައެހެންމެ ގޯއްޗާއި ފްލެޓް ދޫކުރުމުގަ ވެސް ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާ ކަމުގެ ކަންބޮޑުވުން ޕީޖީ އަށް ލިބިފައިވާ ކަމަށް ވަނީ ބުނެފައެވެ.
އެހެންކަމުން ގޯއްޗާއި ފްލެޓް ދޫކުރުމުގައި އަމަލުކޮށްފައިވާ ގޮތުގެ ތަހުގީގެއް ހިންގުމަށް ނިންމާފައިވާކަން ޕީޖީން ވަނީ ހާމަކޮށްފައެވެ.
އަދި އެ ތަހުގީގަށް ފަހު މިކަމާއި ގުޅިގެން އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭ ހާލަތުގައި އެކަން ތަހުގީގު ކުރުމަށް ފަހު ދައުވާ ކުރުމަށްޓަކައި ޕީޖީ އޮފީހަށް ހުށަހެޅުމަށް ވަނީ އެދިފައެވެ.
އެ އަމުރުކުރައްވާފައި ވަނީ ދިވެހި ފުލުހުންގެ ހިދުމަތަށާއި އެންޓި ކޮރަޕްޝަން ކޮމިޝަނަށް ޕްރޮސިކިއުޓާ ޖެނެރަލްއެވެ.
މި މައްސަލަ ބަލަން އަމުރުކުރައްވާފައި މި ވަނީ 18 ޑިސެންބަރު 2024 ވަނަ ދުވަހު ސޯޝަލް މީޑިއާގައި އެޗްޑީސީގެ އެމްޑީ ފަޒުލް ރަޝީދުގެ އެއްބަނޑު އެއްބަފާ ބޭބެއަށް ނުލިބޭ ބިމެއް ހުޅުމާލެއިން ދިން މައްސަލަ ފެންމަތިވެފަވާ ދަނޑިވަޅެއްގައެވެ.
މިމައްސަލައާ ގުޅިގެން އެޗްޑީސީގައި ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި، ހުޅުމާލެއިން ދެ މީހަކަށް އެއް ބިމެއް ލިބުނު ގޮތް ސާފުކޮށް ނުދެވި، ގަވައިދާ ޚިލާފަށް ހުޅުމާލެ އިން ގޯތި ދޫކުރި މީހުންގެ ތެރޭގައި ބޭބެ ހިމެނުނީ އިއްތިފާގަކުން ކަމަށް ފަޒުލް ވިދާޅުވެފައިވެއެވެ. އަދި ނޫސްވެރިން ކުރި ސުވާލުތަކަށް ޖަވާބު ނުދެއްވާ ނޫސްވެރިންގެ ބައްދަލުވުން ވެސް ވަނީ ނިންމަވާލައްވާފައެވެ.
