ބިންވެރިޔާ ސްކީމް ގޯތީގެ ވައްކަމާއި ގުޅިގެން 20 މީހެއްގެ ޕާސްޕޯޓު ހިފަހައްޓައިފި
ޕާސްޕޯޓު ހިފެހެއްޓި މީހުންގެ ތެރޭގައި އެޗްޑީސީގެ އެމްޑީ ފަޒުލް، އަދި އޭނާގެ ބޭބެ މުހައްމަދު ފަޒީލް ރަޝީދު ހިމެނޭ
އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު
ބިންވެރިޔާ ސްކީމް ގޯތީގެ ވައްކަމާއި ގުޅިގެން 20 މީހެއްގެ ޕާސްޕޯޓު ހިފަހައްޓާފައިވާ ކަމަށް ފުލުހުން ބުނެފިއެވެ.
ހުކުރު ދުވަހު ފުލުހުން ބުނީ ތަހުގީގު ކުރަމުންދާ ބިންވެރިޔާ ސްކީމާއި ގުޅުންހުރި މައްސަލައާއި ގުޅިގެން 20 މީހެއް ފުރުން މަނާ ކުރުމުގެ އަމުރު ނެރިފައިވާ ކަމަށެވެ.
އެމީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އަދި އޭނާގެ ބޭބެ މޯލްޑިވްސް ވޯޓާ އެންޑް ސްވަރޭޖް (އެމްޑަބްލިޔުއެސްސީ)ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެއެވެ. ޕާސްޕޯޓް ހިފެހެއްޓި މީހުންގެ ތެރޭގައި، ކުރީގެ ހައުސިންގ މިނިސްޓްރީގެ ސިޔާސީ މަގާމު ގައި ތިބި 2 މުވައްޒަފަކާއި، މިހާރުގެ ހައުސިންގ މިނިސްޓްރީގެ 2 މުވައްޒަފުން ހިމެނެއެވެ. އޭގެ އިތުރުން އެޗްޑީސީގެ ބޯޑު މެމްބަރުންނާއި އެޗްޑީސީ ގެ މުވައްޒަފުން ހިމެނެއެވެ. މީގެ ތެރޭގައި ފަޒުލް ގެ ބޭބެ އަށް ގަވައިދާ ޚިލާފަށް ދިން ގޯތީގެ ވަށާފާރު ރޭނުމުގެ ހުއްދަ އަށް އެދުމުން އެ ގޯތީގެ ވެރިފަރާތް ސާފު ކުރަން އެޗްޑީސީ އިން ހައުސިންގ މިނިސްޓްރީ އަށް ފޮނުވި ސިޓީގައި ސޮއިކޮށްފައިވާ ޑެޕިއުޓީ ޑިރެކްޓަރ އަހްމަދު އައިމަން ވެސް ހިމެނެއެވެ.
މިމައްސަލަ ޖީނާއީ މައްސަލައެއްގެ ގޮތުގައި ތަހުގީގު ކުރަމުންދާއިރު، ގިނަ ތުހުމަތުތަކެއް އެޗްޑީސީގެ އެމްޑީ ފަޒުލްއަށް ވަނީ ކުރެވިފައެވެ. ނަމަވެސް ބުރާސްފަތި ދުވަހުގެ ރޭ ފުލުހުން ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވީ ފަޒުލްގެ މައްޗަށް މިހާތަނަށް އެއްވެސް ތުހުމަތެއް ނުކުރާ ކަމަށެވެ.
ޕާސްޕޯޓް ހިފެހެއްޓި 20 މީހުންނަކީ:
1. އިބްރާހިމް ފަޒުލް ރަޝީދު، މ. ޒޭވަރު
2. އިބްރާހިމް ޔޫސުފްފުޅު، އަތިރީގެ، ނ. ވެލިދޫ
3. މުހައްމަދު ވިޝާމް، ވ. ވަސްމީރުފިޔަ
4. އުލާ މުހައްމަދު ރަޝީދު އިބްރާހިމް، ގ. ގަސްކަރަ
5. އާރިފް އަބްދުއްސަމަދު، ދަފުތަރު 9241
6. މުހައްމަދު ނާޖިލް، ހ. ފަށަން
7. މުހައްމަދު ވަހީދު، މަބުއްސްތާނުގެ ހއ. ފިއްލަދޫ
8. ޔޫސުފް ވަހީދު، ބޮޑުގެ، ހއ. ވަށަފަރު
9. އަޒުހަރު އަބްދުﷲ ސައީދު، ސީނާޒު، ގދ. މަޑަވެލި
10. މުހައްމަދު ފަޒީލް ރަޝީދު، މ. ޒޭވަރު
11. އަބްދުލް މަޖީދު މާހިރު، ޖަމީލާމަންޒިލް، ހއ. ދިއްދޫ
12. މަރިޔަމް ސާއީ، ހަޒާރުމާގެ، ސ. ފޭދޫ
13. މަރިޔަމް ނިޔާޒާ، ހުޅުމާލެ ގޯތި ނަންބަރު 10794 (އަނާރު، ކ. މާލެ)
14. އަހުމަދު ވިޝާން ނަސީމް، މއ. އިހާދޫ
15. އަބްދުﷲ ފާއިދު، ހ. މާފާގާ
16. އަބްދުﷲ ޝުހޫދު، މ. ސްލިޕްވޭއާގެ
17. އަހުމަދު އައިމަން، މ. އަޒުމާ
18. އަހުމަދު ޔާމީން، ކަސީރާގެ، ސ. މަރަދޫ
19. ޟިރުގާމް ވަހީދު، މއ. ވިރާހު
20. މުހައްމަދު އާރިފު، ނެދުންގެ، ހއ. އިހަވަންދޫ
މި މައްސަލަ ފެންމަތިވެފައިވަނީ 18 ޑިސެންބަރު 2024 ވީ ބުދަ ދުވަހު ސޯޝަލް މީޑިއާގައެވެ. ސަރުކާރަށް ބޮޑެތި ފާޑުކިޔުންތަކެއް އަމާޒުވުމާއި ގުޅިގެން ބުދަ ދުވަހުގެރޭ އެޗްޑީސީގެ އެމްޑީ ފަޒުލް ނޫސްވެރިންގެ ބައްދަލުވުމެއް ބޭއްވިއެވެ. މި ބައްދަލުވުމުގައި ވެސް ނޫސްވެރިން ކުރި ސުވާލުތަކަށް ޖަވާބު ނުދެވި، ފަޒުލް ހެއްދެވީ ދޮގުކަން ވަނީ ހާމަވެގެން ގޮސްފައެވެ. އަދި ދެމީހަކަށް އެއް ބިމެއް ލިބުނު ގޮތް ސާފުކޮށް ނުދެވި ފަޒުލް ވިދާޅުވީ ބޭބެ އަށް ގަވައިދާ ޚިލާފަށް ގޯތި ލިބުނީ އިއްތިފާގަކުން ކަމަށެވެ. އަދި އެގޯތީގެ ވަށާފާރު ނުރާނާ ކަމަށް ފަޒުލް ވިދާޅުވި ނަމަވެސް އެގޯތީގެ ވަށާފާރު ވަނީ ރާނާފައެވެ.
އޭގެފަހުން ބުރާސްފަތި ދުވަހު ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އެމްޑީ ފަޒުލް ހިމެނޭ ގޮތަށް އެޗްޑީސީގެ ޗެއަރމަން އަހުމަދު ނާސިފު ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ސަސްޕެންޑްކޮށްފައެވެ. އަދި އޭނާގެ ބޭބެ ފަޒީލް ވެސް ވަނީ މަސައްކަތުން އެކަހެރިކޮށް، ސަސްޕެންޑްކޮށްފައެވެ.
މީގެ އިތުރުން މިމައްސަލައާ ގުޅިގެން ހައުސިން މިނިސްޓްރީގެ ސިޔާސީ 10 މުވައްޒަފެއް ސަސްޕެންޑްކޮށްފައިވާ ކަމަށް ބައެއް މީީޑިއާތަކުގައި ރިޕޯޓުކޮށްފައިވެއެވެ. ނަމަވެސް މިކަމާއި ގުޅިގެން މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.
ފުލުހުން މިމައްސަލަ ތަހުގީގު ކުރަމުންދާއިރު، އެންޓި ކޮރަޕްޝަން ކޮމިޝަން (އޭސީސީ)އިން މިމައްސަލަ ތަހުގީގު ކުރަމުންދާ ކަމަށް ބުނެފައިވެއެވެ.
