އަންހެނުން ތަރައްގީއަށް މަސައްކަތް ކުރާ ކޮމެޓީ (ޑަބްލިޔުޑީސީ)އާ މެދު ރައްޔިތުން ދެކެމުން އައި ނުރަނގު ގޮތްތައް މިހާރު ބަދަލުކުރެވިފައިވާ ކަމަށާއި، ކުރެވެނު މަސައްކަތްތައް ވަރަށް ކާމިޔާބު ކަމަށް މާލެސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީން ބުނެފިއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން މާލެސިޓީގެ ޑަބްލިޔުޑީސީ ރައީސާ، ގަލޮޅު ދެކުނު ދާއިރާގެ މެންބަރު ރަޝީދާ ރަޝާދު ވިދާޅުވީ އަންހެނުން ބާރުވެރި ކުރުވުމަށާއި، އަންހެނުންގެ ތަރައްގީއަށް މާލޭގައި ވަރަށް ގިނަ މަސައްކަތްތައް ކުރަމުންދާ ކަމަށެވެ. ސިޔާސީ ދާއިރާއިން ވެސް އަންހެނުން ނެރުމަށްޓަކައި ދޮރުން ދޮރަށް ހިނގާ މަސައްކަތް ކުރަމުންދާ ކަމަށެވެ.

ރަޝީދާ ވިދާޅުވީ ޑަބްލިޔުޑީސީ ކުރިއެރުވުމަށް ވެސް ގިނަ މަސައްކަތްތައް ކުރަމުންދާ ކަމަށާއި، އެއްއަހަރުން އަނެއް އަހަރަށް ގިނަ ކާމިޔާބީތަކެއް ހާސިލް ކުރެވިފައިވާ ކަމަށެވެ. މީގެ ކުރިން ރައްޔިތުން ޑަބްލިޔުޑީސީގެ މަސައްކަތްތައް ބަލައިނުގަތް ނަމަވެސް މިހާރު ރައްޔިތުން ޑަބްލިޔުޑީސީ ބަލައިގަންނަ ކަމަށެވެ. އަދި ވިދާޅުވީ ސަރުކާރު ވެސް ޑަބްލިޔުޑީސީން ކުރަމުންދާ މަސައްކަތްތައް ގާތުން ބަލާ ކަމަށާއި، ދިމާވާ ދަތިތަކާއި ގޮންޖެހުންތަކަށް ހައްލު ހޯދައިދޭ ކަމަށެވެ.

ގައުމުގެ ތަރައްގީއަށް ޑަބްލިޔުޑީސީގެ ދައުރު މުހިންމުކަން ފާހަގަކުރައްވައި ރަޝީދާ ވިދާޅުވީ ޑަބްލިޔުޑީސީގެ މެންބަރުންނަށް ޚާއްސަކޮށް ހޭލުންތެރިކުރުމުގެ ތަފާތު ޕްރޮގްރާމްތައް ކުރިއަށް ގެންދާ ކަމަށެވެ.

ހެންވޭރު ހުޅަނގު ދާއިރާ މެންބަރު ފާތުމަތު ޝަހުލާ ވިދާޅުވީ މީގެ ކުރިން ޑަބްލިޔުޑީސީއަކީ ކޮބައިކަން ރައްޔިތުންނަށް ނޭނގޭ ކަމަށާއި، ކުރަމުންދާ މަސައްކަތްތަކާއި މެދު ވެސް ބައެއް ރައްޔިތުން ސުވާލު އުފެއްދި ކަމަށެވެ.

ޝަހުލާ ވިދާޅުވީ ޑަބްލިޔުޑީސީން ކުރަމުންދާ މަސައްކަތްތަކުގައި މުޖުތަމައުގެ އެއްބާރުލުން ލިބޭ ކަމަށާއި، ގިނަ ހަރަކާތްތައް ކުރިއަށް ގެންދެވޭ ކަމަށެވެ. މާލެސިޓީގެ އިތުރުން ރަށްރަށުގައި ހިންގާ ހަރަކާތްތައް ވެސް ކާމިޔާބުކަން އޭނާ ފާހަގަކުރެއްވިއެވެ.