"އާރބަންކޯ ފުޑް ކާނިވަލް"، ލިބުނު ހޫނު ތަރުޚީބާއި އެކު އަހަރަކު އެއް ފަހަރު މި ކާނިވަލް ބާއްވަނީ!
25 ޖޫން 2023 | އާދީއްތަ 10:13މި ކާނިވަލަށް 15000 އާއި ގާތް ކުރާ އަދަދަކަށް މީހުން ވަނީ ޒިޔާރަތްކޮށްފަ
އަރބަންކޯ ފުޑް ކާނިވަލް
މި މަހުގެ 21 އިން ފެށިގެން ހަތަރު ދުވަހުގެ މުއްދަތަށް ކުރިއަށް ގެންދިޔަ މޯލްޑިވްސް ފުޑް ކާނިވަލް އަކީ ވަރަށް ކާމިޔާބު ފެސްޓިވަލް އެއް ކަމަށް އެ ކާނިވަލް އިންތިޒާމްކުރި ފަރާތުން ބުނެފިއެވެ. ކޮންމެ ދުވަހެއްގެ ހަވީރު 4:00 އިން ރޭގަނޑު 12:00 އަށް ކުރިއަށް ގެންދިޔަ މި ކާނިވަލަށް 15000 އާއި ގާތް ކުރާ އަދަދަކަށް މީހުން ވަނީ ޒިޔާރަތްކޮށްފައެވެ. 'އާބަންކޯ މޯލްޑިވްސް ފުޑް ކާނިވަލް' ނަމުގައި ހުޅުމާލޭ ސެންޓްރަލް ޕާކްގައި ކުރިއަށްގެންދިޔަ މި ފޯރިގަދަ ކާނިވަލަކީ އެޗްޑީސީ، ތިންކް، ދިރާގު އަދި ފުޑް ޓޭސްޓްއެމްވީ ގުޅިގެން ބޭއްވި ކާނިވަލްއެކެވެ.
ކާނިވަލް އިންތިޒާމް ކުރި ފަރާތުން ރާއްޖެ އެމްވީ އަށް ބުނީ ކާނިވަލް ކުރިއަށް ގެންދިޔައީ ވަރަށް ފޯރިގަދަކޮށް ކަމަށާއި، ކާނިވަލްގެ ބައިވެރިންނާއި ކާނިވަލަށް ޒިޔާރަތްކުރި މީހުންގެ ފަރާތުން ލިބުނީ ވަރަށް ރަނގަޅު އިޖާބައެއް ކަމަށެވެ. މި އަހަރުގެ ކާނިވަލަށް ލިބުނު ތަރުޚީބަށް ބެލުމަށް ފަހު ކުރިއަށް އޮތްތަނުގައި އަހަރަކު އެއްފަހަރު މި ކާނިވަލް ބާއްވަން ނިންމާފައިވާ ކަމަށް އެފަރާތުން ވިދާޅުވިއެވެ. ފުޑް ކާނިވަލަށް އެތައް ބަޔަކު ޒިޔާރަތްކޮށްފައި ވާއިރު އޭގެ ތެރޭގައި ގިނަ އަދަދެއްގެ ޒުވާނުންނާއި ކުޑަކުދިން ހިމެނެއެވެ. އަދި މި ކާނިވާ ވެގެން ދިޔައީ ބައިވެރިންނަށް ވަރަށް ތަފާތު ތަޖުރިބާ އެއް ކުރެވުނު ކަމަކަށެވެ. އެގޮތުން ޕްރޮޑަކްޓްތައް ވިއްކުމަށްޓަކާ، އަދި އުފެއްދުންތައް އާއްމުންނަށް ދައްކާލުމަށްޓަކާ މިއީ ވަރަށް ރަނގަޅު ފުރުސަތެއް ކަމަށް އެ ފަރާތްތަކުން ބުނެއެވެ.
އެގޮތުން ފުޑް ކާނިވަލްގެ ބައެއް ބައިވެރިންނާއި ރާއްޖެ އެމްވީ އިން ވަނީ ވާހަކަދައްކާލާފައެވެ. އޭގެ ތެރެއިން އެއްބައިވެރިއަކީ އަޒީޝިއަސްއެވެ. އަޒީޝިއަސް ބުނީ އޭނާގެ ސްޓޯލް އިން ފެނިގެން ދަނީ ކުކީޒް ކަމަށެވެ. އަދި އާއްމުން ކުކީތަކުގެ ރަހަ ބަލާލުމަށް ފަހު ދިން ފީޑްބެކް އާއި މެދު ވަރަށް ހިތްހަމަޖެހޭ ކަމަށް ވެސް ވަނީ ބުނެފައެވެ. މީގެ އިތުރުން ފުޑް ކާނިވަލްގެ ސްޓޯލްއެއް ކަމަށްވާ އަތުމީރު ސްޓޯލްގައިހުރީ ދިވެހި ހަވާދުގެ ބާވަތްތަކާއި އެ ތަކެތީގައި ކައްކާފައި ހުރި ކާބޯތަކެއްޗެވެ. އެ ސްޓޯލްގެ އުފެއްދުންތަކުގެ ވެރިޔާ މަރިޔަމް ޒާހިރާ "ރާއްޖެ އެމްވީ" އަށް ބުނީ މި ސްޓޯލް އިން ކުރެވުނު ތަޖުރިބާ ވަރަށް ރަނގަޅު ކަމަށެވެ. އަދި އުންމީދަކީ ސްޓޯލްގެ އެހީގައި ކުރިއަށް އޮތްތަނުގައި ވިޔަފާރިއަށް ދިމާވާ ގޮންޖެހުންތަކަށް ހައްލު ލިބުން ކަމަށެވެ. މި ކާނިވަލްގެ އެއް ސްޓޯލްކަމަށްވާ ހޯމް މޭޑްބައި ޝާއިލާ އާއި ގުޅޭގޮތުން "ޝާއިލާ" ބުނީ އޭނާ އަށް މިފަދަ ފެސްޓިވަލްއެއްގައި ބައިވެރިވި ފުރަތަމަ ފަހަރުކަމަށެވެ. އަދި މިއީ އޭނާ އަށް ވަރަށް ރަނގަޅު ތަޖުރިބާ އެއް ކަމަށް ވަނީ ބުނެފައެވެ. އޭނާ ބުނިގޮތުގައި މިއީ މިގޮތަށް އާއްމުންނަށް އޭނާގެ މަސައްކަތްތައް ދައްކާލަން ލިބުނު ފުރަތަމަ ފުރުސަތުވެސްމެއެވެ.
ފުޑް ކާނިވަލުގައި އެކި ބާވަތްތަކުގެ ކާބޯތަކެތި އަޖުމަ ބަލާލުމަށް އެތައް ބަޔަކު ޒިޔާރަތްކޮށްފައިވެއެވެ. އަދި ކާނިވަލްގެ ތެރެއިން އަތްތެރި މަސައްކަތްތަކާއި ދިވެހި އުފެއްދުންތައް ވަނީ ދައްކާލާފައެވެ. ހަމައެހެންމެ ލައިވް މިއުޒިކާއި ފަންނާނުންގެ ހުނަރުތައް ދައްކާލުމުގެ އިތުރުން ތަފާތު އެކި ގޭމްތަކާއި، ބިރުވެރި ހޮހޮޅަތައް ފަދަ ހަރަކާތްތައް ވަނީ ބާއްވާފައެވެ. މި ކާނިވަލް ކުރިއަށް ގެންދިޔައީ ތަފާތު އެކި އިނާމުތަކާއި، ހަދިޔާތަކާއި ވެސް އެކުގައެވެ.
މި ކާނިވަލްގެ މީޑިއާ ޕާޓްނަރަކީ ރާއްޖެޓީވީއެވެ. މި ކާނިވަލްގެ ޓައިޓްލް ސްޕޮންސަރަކީ އަރބަންކޯއެވެ. އަރބަންކޯއާއި ރާއްޖެޓީވީގެ އިތުރުން ސިމްޑީއާއި ބީއެޗްއެމްއާއި އެސްޓީއޯއާއި އިވެންޓް މޯލްޑިވްސް، އަދި ދިރާގަކީވެސް މި އިވެންޓުގެ ޕާޓްނަރުންނެވެ.
