އައު ފޯމެޓުގެ ކުލަބު ވޯލްޑް ކަޕްގެ ފުރަތަމަ މުބާރާތް އެމެރިކާގައި

ފީފާ ކުލަބު ވޯލްޑް ކަޕް މިހާރު ކުޅެމުން އަންނަ ފޯމެޓަށް ބަދަލު ގެނެސް، ބާއްވާ ފުރަތަމަ މުބާރާތް އެމެރިކާގައި ބާއްވަން ދުނިޔޭގެ ފުޓުބޯޅައިގެ މައި އިދާރާ (ފީފާ)އިން ނިންމައިފިއެވެ.

ފީފާއިން އެކަން ރަސްމީކޮށް އިއުލާންކޮށްފައިވަނީ ހުކުރު ދުވަހުއެވެ. އެކަން އިއުލާން ކުރެއްވީ ފީފާގެ ރައީސް، ޖިއާނީ އިންފަންޓީނޯއެވެ. އިންފަންޓީނޯ ވިދާޅުވީ އައު ފޯމެޓާއެކު 2025 ވަނަ އަހަރުގެ ކުލަބު ވޯލްޑް ކަޕް އޮންނާނީ އެމެރިކާގައި ކަމަށެވެ. އެ މުބާރާތުގައި ޖުމުލަ 32 ޓީމަކުން ވާދަކުރާނެ ކަމަށާއި، އެއީ ދުނިޔޭގެ އެކި ކަންކޮޅުތަކުން އަންނާނެ އެންމެ މޮޅު ޓީމުތައް ކަމަށް އޭނާ ވިދާޅުވިއެވެ. މީގެ އިތުރުން އިންފަންޓީނޯ ވިދާޅުވީ، އެމެރިކާ ސަރަހައްދުގައި ފުޓުބޯޅަ ކުރިއަރަމުން އަންނަ މަންޒަރު ފެނިވަޑައިގަންނަވާ ކަމަށެވެ. ކުލަބު ވޯލްޑް ކަޕަށްފަހު ދެން އޮންނަ ފީފާ ވޯލްޑް ކަޕާ ހަމައަށް އަންނައިރު، ފުޓުބޯޅައަކީ އެމެރިކާގައި ކުރިއަރާފައިވާ ކުޅިވަރަކަށް ވާނެކަމަށް އިންފަންޓީނޯ ގަބޫލުކުރައްވައެވެ. އޭނާ ވަނީ ފުޓުބޯޅާ ކުރިއެރުވުމާއި، ފުޓުބޯޅައިގެ ފޯރިއަށް އެމެރިކާއިން ކުރަމުން އަންނަ މަސައްކަތް ފާހަގަކުރައްވައި އެކަމަށްޓަކައި ޝުކުރު އަދާކުރައްވާފައެވެ.

ކުލަބު ވޯލްޑް ކަޕް އެމެރިކާގައި ބާއްވަން ނިންމުމާއެކު، ޖެހިގެން އަންނަ ތިން އަހަރުގެ ތެރޭގައި އެ ގައުމުގައި ބޮޑު ތިން މުބާރާތް ކުރިއަށްދާނެއެވެ. އެންމެ ފުރަތަމަ 2024 ވަނަ އަހަރު އެމެރިކާގައި ކުރިއަށް ދާނީ ކޮޕަރ އެމެރިކާ ފުޓުބޯޅަ މުބާރާތެވެ. އެއަށްފަހު 2025 ވަނަ އަހަރު ކުލަބު ވޯލްޑް ކަޕް ބޭއްވުމަށްފަހު، 2026 ވަނަ އަހަރުގެ ފީފާ ވޯލްޑް ކަޕްވެސް އެމެރިކާގައި ކުރިއަށްދާނެއެވެ. އެ އަހަރުގެ ވޯލްޑް ކަޕް ބާއްވަނީ އެމެރިކާ، ކެނެޑާ އަދި މެކްސިކޯ ގުޅިގެންނެވެ. އެ މުބާރާތަކީވެސް މިހާރު ކުޅެމުން އަންނަ ފޯމެޓު ބަދަލުކޮށް، އައު ފޯމެޓަށް ބާއްވާނެ ފުރަތަމަ މުބާރާތެވެ. އެ މުބާރާތުގައި 48 ގައުމެއް ވާދަކުރާނެއެވެ.

މިހާރު ކުޅެމުން އަންނަ ފޯމެޓުގައި ބާއްވާ އެންމެ ފަހު ކުލަބު ވޯލްޑް ކަޕް އޮންނާނީ މިއަހަރުގެ ޑިސެމްބަރު މަހު ސައޫދީ އަރަބިއްޔާގައެވެ. 2025 ވަނަ އަހަރުގެ މުބާރާތް އޮންނާނެ ސީދާ ތާރީޚެއް މިހާާތަނަށް ފީފާއިން އިއުލާންކޮށްފައެއްނުވެއެވެ.