ބޮޑު އަގުގައި ހައްޖަށް މީހުން ގެންދާ މައްސަލަ ހުށަހަޅައިފިނަމަ ބަލާނެ: އިސްލާމިކް މިނިސްޓްރީ
21 ޖޫން 2023 | ބުދަ 18:07ހައްޖަށް މީހުން ގެންދިއުމުގައި އަމަލުކުރަންވީ ގޮތާއި، އަގުތައްވެސް އާއްމުކޮށްފައިވޭ
ރާއްޖެއިން ދިޔަ ހައްޖުވެރިންތަކެއް ޖިއްދާ އެއަރޕޯޓުގައި
ހައްޖަށް މީހުން ގެންދިއުމަށް ހުއްދަ ދީފައިވާ ކުންފުނިތަކުން ބޮޑެތި އަދަދުތަކުން ފައިސާ ނަގާ މައްސަލަ ރަސްމީކޮށް ހުށަހަޅައިފިނަމަ އެމައްސަލަ ބަލާނެކަމަށް އިސްލާމިކް މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި، އިސްލާމިކް މިނިސްޓްރީގެ ޕަރމަނަންޓް ސެކްރެޓަރީ އަހްމަދު އަދީލް ވިދާޅުވީ ހައްޖު ކޯޕަރޭޝަން ފިޔަވައި އަމިއްލަ ތިން ކުންފުންޏަށް ހައްޖު ކޯޓާ ދޫކުރުމަށް އިއުލާންކުރިކަމަށެވެ. އަދި އެ އިއުލާނުގައި ހުރިހާ ކަމެއް ބަޔާންކޮށްފައިވާކަން އޭނާ ފާހަގަކުރެއްވިއެވެ.
އަދީލް ވިދާޅުވީ ހައްޖަށް މީހުން ގެންދިއުމުގައި އަމަލުކުރަންވީ ގޮތާއި، އަގުތައްވެސް އާއްމުކޮށްފައިވާކަމަށެވެ.
މީގެ އިތުރުން އަދީލް ވިދާޅުވީ އަމިއްލަ ކުންފުނިތަކުން މީހުން ހައްޖަށް ގެންދިއުމަށް ބޮޑެތި އަގު ނަގާ މައްސަލަ ސޯޝަލް މީޑިއާގެ ޒަރީއާއިން ސަމާލުކަމަށް އައިސްފައިވާ ކަމަށެވެ. ނަމަވެސް އެ މައްސަލަ ރަސްމީ ސިފައެއްގައި ހުށަހަޅާފައި ނުވާޖަމަށާއި، އެ މައްސަލަ ހުށަހަޅާފައިނުވާތީ އޭގެ އެއްވެސް ހެއްކެތް ނެތްކަމަށެވެ.
އަދީލް ވިދާޅުވީ އެމައްސަލަ ހުށަހަޅައިފިނަމަ، އޮންނަ އުސޫލުގެ ތެރެއިން ބަލާނެ ކަމަށާއި، އަޅަންޖެހޭ ފިޔަވަޅުތައް އަޅާނެކަމަށެވެ.
އިތުބާރު ހުރި ފަރާތަކުން ރާއްޖެއެމްވީއަށް މައުލޫމާތު ދިން ގޮތުގައި، އަމިއްލަ ކުންފުނިތަކުން މީހުން ހައްޖަށް ގެންދިއުމަށް 135،000 ރުފިޔާ ނަގައެވެ. މި ގޮތަށް ހައްޖަށް ގެންދަނީ ދެފަރާތުން އެއްބަސްވެގެން ކަމަށާއި، ފައިސާ ދައްކަނީވެސް ކޭޝްއިން ކަމަށެވެ. އަދި ގިނައިން މިގޮތަށް ފުރުސަތު ހޯދަމުންދަނީ ފައިސާވެރި، މުއްސަނދިން ކަަމަށް އެބޭފުޅާ ވިދާޅުވިއެވެ.
