އިޓާލިއަން ލީގުގެ ޔުވެންޓަސް އަށް ކުޅެމުން އަންނަ އާޖެންޓީނާގެ އެންހެން ޑިމާރިއާ އެ ކުލަބު ދޫކޮށް އެހެން ކުލަބަކަށް ބަދަލުވާން ނިންމާފައިވާ ކަމަށް އިޓަލީގެ މީޑިއާތަކުގައި ރިޕޯޓުކޮށްފި އެވެ.

އުމުރުން 35 އަހަރުގެ ކުޅުންތެރިޔާ ޔުވެންޓަސްއާއެކު ހަދާފައިވާ އެއް އަހަރު ދުވަހުގެ އެއްބަަސްވުން މި އަންނަ ޖޫން މަހުގެ ނިޔަލަށް ހަމަވާނެ އެވެ. އެހެންކަމުން މީގެ ދުވަސްތަކެއް ކުރިން ޔުވެންޓަސް އިން ވަނީ ޑިމާރިއާއާއެކު އައު އެއްބަސްވުމެއްގެ މަޝްވަރާތައް ފަށައިފަ އެވެ. ނަމަވެސް މީޑިއާތަޖުގައި ބުނެފައިވާ ގޮތުން އެ މަޝްވަރާތަކުން އެއްވެސް އަލި މަގެއް ފެނިފައެއް ނުވެ އެވެ. އެހެންކަމުން މިހާރު ޑިމާރިއާ ބޭނުންވަނީ ހިލޭ ޓްރާންސްފާއެއްގައި އެހެން ކުލަބަކަށް ބަދަލުވާން ކަމަށް ވެސް ބުނެފައިވެ އެވެ. ޑިމާރިއާ ހޯދުމަށް ސައުދީ އަރަބިއާގެ ޕްރޯ ލީގުގެ ކުލަބުތަކުން ޝައުޤުވެރިކަން ފާޅުކޮށްފައިވީ ނަމަވެސް، އޭނާ ބޭނުންވަނީ ޔޫރަޕުގެ ކުލަބަކަށް ބަދަލުވާން ކަމަށް ވެސް ބުނެފައިވެ އެވެ.

ޕެރިސް ސެއިންޓް ޖާމަން (ޕީއެސްޖީ) ދޫކޮށް ޑިމާރިއާ ޔުވެންޓަސް އަށް ބަދަލުވީ މިިދިޔަ އަހަރު އެވެ. އޭގެ ފަހުން އޭނާ ވަނީ އެ ކުލަބަށް 37 މެޗު ކުޅެދީ އަށް ލަނޑު ޖަހައިދީފަ އެވެ. ޔުވެންޓަސް އަށް ބަދަލުވި ނަމަވެސް ސީޒަނުގެ ވަކި ހިސާބަކުން އޭނާ އަށް ވަނީ އަނިޔާވެފަ އެވެ. އަނިޔާއާއެކު ޑިމާރިއާ އަށް ފީފާ ވޯލްޑް ކަޕް ގެެއްލިދާނެ ކަމުގެ ބިރު ވެސް ބޮޑުވި އެވެ. ނަމަވެސް އޭނާ ވަނީ އެ މުބާރާތުގައި ވެސް ކުޅެފަ އެވެ. އޭގެ ފަހުން ޑިމާރިއާ އަކީ ޔުވެންޓަސްގެ ފުރަތަމަ 11 އިން ކޯޗު އަބަދުވެސް ފުރުސަތު ދެމުން އަންނަ ކުޅުޅުންތެރިޔެެވެ.

ޑިމާރިއާ ވަނީ ޕީއެސްޖީ އާއި ޔުވެންޓަސްގެ އިތުރުން ބެންފީކާ، ރެއާލް މެޑްރިޑު އަދި މެންޗެސްޓަރ ޔުނައިޓެޑަށް ވެސް ކުޅެމުންނެވެ.