ނިއުކްލިއަރ ހަތިޔާރު ބޭނުންކުރައްވާނެކަމަށް ރަޝިއާގެ ރައީސް ވްލެޑްމިއަރ ޕުޓިން ދެއްވާ އިންޒާރަކީ "އަސްލު" އިންޒާރެއްކަމަށް, އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
ބައިޑަން މިހެން ވިދާޅުވެފައި ވަނީ ހޯމަ ދުވަހުއެވެ.
މިދިޔަ ހަފުތާގެ ހޮނިހިރު ދުވަހު، ރަޝިއާއިން ބެލަރޫސްގައި އެގައުމުގެ ޓެކްޓިކަލް ނިއުކްލިއަރ ހަތިޔާރު ބަހައްޓަން ފެށުމާއެކު އެކަމަށްވެސް ބައިޑަން ވަނީ ފާޑުވިދާޅުވެފައެވެ. އެގޮތުން އެއީ ވަރަށް ޒިންމާދާރުކަން ކުޑަކަމެއް ކަމަށް ބައިޑަން ވަނީ ވިދާޅުވެފައެވެ.
ބެލަރޫސްއިން ރަޝިއާގެ ނިއުކްލިއަރ ހަތިޔާރުގެ ޑެލިވަރީ ނަގަންފަށައިފިކަން އެގައުމުގެ ރައީސް އެލެކްޒެންޑަރ ލުކަޝެންކޯ ވަނީ އިއުލާނުކުރައްވާފައެވެ. ލުކަޝެންކޯ ވަނީ އެގައުމުން ނަގަންފަށާފައިވާ ބައެއް ހަތިޔާރުތަކަކީ 1945 ވަނަ އަހަރު އެމެރިކާއިން ޖަޕާނުގެ ހިރޮޝިމާއަށާއި ނަގަސާކީއަށް ވައްޓާލި އެޓޮމިކް ބޮންތަކަށްވުރެ ވަރުގަދަ ހަތިޔާރުތަކެއްކަން ވެސް ފާހަގަކުރައްވާފައެވެ.
މިއީ ސޯވިއެޓް ޔޫނިއަން ރޫޅުނުފަހުން ރަޝިއާއިން ބޭރު ސަރަހައްދެއްގައި އެގައުމުގެ ނިއުކްލިއަރ ހަތިޔާރު ޑިޕްލޯއިކުރާ ފުރަތަމަ ފަހަރެވެ.
ލުކަޝެންކޯ ވަނީ އެގައުމަށް ރަޝިއާއިން މިސައިލާއި ބޮން ލިބިފައިވާކަމަށް ވިދާޅުވެފައެވެ.
މިދިޔަ ހުކުރު ދުވަހު ޕުޓިން ވަނީ، އެހަތިޔާރުތައް ބަދަލުކުރާނީ އެކަމަށް ޚާއްސަ ފެސިލިޓީތައް ގާއިމުކުރެވުމުން ކަމަށް ވިދާޅުވެފައެވެ.
ރަޝިއާގެ ނިއުކްލިއަރ ހަތިޔާރު ބެލަރޫސްގައި ބަހައްޓަން ނިންމައި އެކަން ޕުޓިން އިއުލާންކުރައްވާފައި ވަނީ މާޗު މަހުއެވެ. އަދި އެމެރިކާއަށް، އެގައުމުގެ ނިއުކްލިއަރ ހަތިޔާރު ޔޫރަޕްގެ ގައުމުތަކުގައި ބެހެއްޓޭނަމަ، ރަޝިއާއަށްވެސް އެގޮތަށް އަމަލުކުރެވޭނެ ކަމަށް ޕުޓިން ވަނީ ވިދާޅުވެފައެވެ.
އެމެރިކާއިން ރަޝިއާގެ އަމަލުތަކަށް ފާޑުކިޔަމުން ދިޔަނަމަވެސް، އެގައުމުން ނިއުކްލިއަރ ހަތިޔާރާ ގުޅިގެން ގެންގުޅޭ ސިޔާސަތުތަކަށް ބަދަލު ނުގެންނާނެ ކަމަށްވެސް އެމެރިކާއިން ވަނީ ބުނެފައެވެ.
