ބުރުނު ޝިކާރު: ޗެމްޕިއަންކަން އަޝްރަފް، ކުޑަ އައްޔަ އަދި އާމިންއަށް

ގައުމީ ބޮޑީބޯޑިން ލީގުގެ ފުރަތަމަ މުބާރާތް ކަމަށްވާ ބުރުނު ޝިކާރުގެ ޗެމްޕިއަންކަން އަޝްރަފް ހަސަން، އަލީ ޚުޝްރުވާން އަހުމަދު (ކުޑަ އައްޔަ) އަދި އާމިން އުމަރު މޫސާ ހޯދައިފިއެވެ.

މެންސް އޯޕަންގެ ފައިނަލުގައި ވާދަކޮށްފައިވަނީ އަޝްރަފް ހަސަން، ކުޑަ އައްޔަ، އާމިން އަދި އަލީ ޝާމް ރާފިއުއެވެ. ފޯރިގަދަ މި ހީޓުގައި ހުރިހާ އެތުލީޓުންވެސް ވަނީ ރަނގަޅު ސްކޯއެއް ހޯދާފައެވެ. އަޝްރަފް އެއްވަނަ ހޯދީ ކުޑަ އައްޔައަށްވުރެ 0.66 ޕޮއިންޓު އިތުރަށް ހޯދައިގެނެވެ. އަޝްރަފަށް 14.16 ޕޮއިންޓު ލިބިފައިވާއިރު ކުޑަ އައްޔަށް ލިބުނީ 13.50 ޕޮއިންޓެވެ. ތިންވަނާގައި ނިންމި އާމިން ވަނީ 13.20 ހޯދާފައެވެ. އަދި ހަތަރު ވަނައިގައި ޝާމްއަށް ލިބުނީ 12.60ވެ.

ޖުނިއަރ ބައިގެ ޗެމްޕިއަންކަން އާމިން ހޯދީ 10.40 ޕޮއިންޓާއެކުއެވެ. މިދިޔަ އަހަރުގެވެސް ޖޫނިއަރ ބައިގެ ދެވަނަ، އިޔާން އަހުމަދަށް މިފަހަރުވެސް ލިބުނީ ދެވަނައެވެ. އޭނާއަށް ލިބުނީ 9.26 ޕޮއިންޓެވެ. ތިންވަނާގައި ނިމުނު ކައިފްއަށް 8.90 ލިބިފައިވާއިރު، ހަތަރުވަނާގައި އޮތް ޖަރީޝްއަށް ލިބުނީ 6.84ވެ.

ޑްރޮޕް ނީގެ ބައިން ކުޑަ އައްޔަ ވަނީ ތަށި ދިފާއުކޮށްފައެވެ. އޭނާ ޗެމްޕިއަންކަން ހޯދީ 7.40 ޕޮއިންޓާއެކުއެވެ. ދެވަނާގައި ދާއޫއު ފަޒީހު ނިންމީ 4.47 ޕޮއިންޓާއެކުއެވެ. އަދި ޝާމްއަށް 4.34 ޕޮއިންޓު ލިބިފައިވާއިރު، މުހައްމަދު އަޒާން އަހުމަދަށް ލިބުނީ 1.33ވެ.

ގައުމީ ބޮޑީބޯޑިންގ ލީގުގެ މި އަހަރުގެ ދެވަނަ އިވެންޓަކީ ފުވައްމުލަށް ބޮޑީބޯޑިންގ ޗެލެންޖެވެ. މި އިވެންޓު ކުރިއަށްދާނީ މިއަހަރުގެ ސެޕްޓެމްބަރު މަހު 21ން 29ށް ފުވައްމުލައް ސިޓީގައެވެ.