މަޖިލީހުގެ ރައީސް އަދި ނާއިބު ރައީސް ފިއްލަވައިގެން އުޅުއްވުމަކީ ކުރެވޭ ވަރަށް ބޮޑު ވައްކަމެއް: މެންބަރު ޝިފާއު
19 ޖޫން 2023 | ހޯމަ 08:33އަބަދުވެސް މި ބޭފުޅުންނަށް ވައްކަމުގެ ތަފާތު މައްސަލަތަކުގެ ތުހުމަތު ކުރެވޭ
އިހަވަންދޫ ދާއިރާގެ މެންބަރު މުހައްމަދު ޝިފާއު
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި ނައިބު ރައީސް އީވާ އަބްދުﷲ ފިއްލަވައިގެން އުޅުއްވުމަކީ ކުރެވޭ ވަރަށް ބޮޑު ވައްކަމެއް ކަމަށް އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ.
ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި ވާހަކަދައްކަވަމުން ވިދާޅުވީ މަޖިލީހުގެ 50ށް ވުރެ ގިނަ މެންބަރުން ސޮއިކޮށް އިތުރުބާރު ނެތްކަމުގެ މައްސަލަ ވެއްދުމުން ފިއްލެވުމަކީ ކުރެވޭ ވަރަށް ބޮޑު ވައްކަމެއް ކަމަށެވެ. އަދި އަބަދުވެސް މި ބޭފުޅުންނަށް ވައްކަމުގެ ތަފާތު މައްސަލަތަކުގެ ތުހުމަތު ކުރެވޭ ކަމަށް ޝިފާއު ވިދާޅުވިއެވެ.
ޑިމޮކްރަސީއަށް އިޝާރަތް ކުރައްވައި ޝިފާއު ވިދާޅުވީ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ރައީސް އިބްރާހިމް މުހައްމަދު ސާލިހަށް ދެވަނަ ދައުރެއް ދޭން ނިންމި ނަމަވެސް އެކަން ބަލައިނުގަންނަ ކަމަށެވެ. އަދި ރައްޔިތުންގެ ނިންމުމަށް އިހުތިރާމް ކުރަންޖެހޭ ކަމަށާއި، އެއީ މީގެ ކުރިން އެބޭފުޅުން ވެސް އެންމެ ހަރުއަޑުން ދައްކަމުން އައި ވާހަކަތައް ކަމަށް ޝިފާއު ވިދާޅުވިއެވެ.
ދަ ޑިމޮކްރެޓްސްއަށް ވަރަށް ބޮޑަށް ފާޑު ވިދާޅުވެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވީ މެޖޯރިޓީ ބަދަލުނުކުރެވޭނެ ކަމަށާއި، މަސައްކަތްތައް ނުހުއްޓުވޭނެ ކަމަށެވެ. ދަ ޑިމޮކްރެޓްސް އަދި ޕާޓީއަކަށް ނުވާ ކަމަށާއި، ޕާޓީއަކަށް ހެދިގެން މުޅި މަޖިލިސް ހިސޯރުކޮށްގެން އުޅުއްވާ އުޅުއްވުމަކީ ދިވެހި ރައްޔިތުން އެއްވެސް ގޮތަކަށް ބަލައިގަންނަ ކަމެއް ނޫން ކަމަށް ރޮޒެއިނާ ވިދާޅުވިއެވެ.
މީގެ އިތުރުން ރޮޒެއިނާ ވަނީ އާދިއްތަ ދުވަހު ވެސް ދަ ޑިމޮކްރެޓްސް މެންބަރުން އިލެކްޝަން ކޮމިޝަނަށް ވަދެ، ހިސޯރުކުރި ކަމަށް ބުނެ ފާޑު ވިދާޅުވެފައެވެ.
