މަޖިލީހުގެ މެޖޯރިޓީ ނެގުމަށްފަހު ރައީސް ޔާމީންގެ މައްސަލަތައް ތަހުގީގް ކުރާނަން: ޢަބްދުﷲ ރިޔާޒް
12 ޖުލައި 2017 | ބުދަ 12:16ސުޕްރީމް ކޯޓަށް މައްސަލަ ހުށަހެޅީ މަޖިލީހުން ޖަވާބުދާރީ ކުރުވިޔަ ނުދޭން
ކިނބިދޫ ދާއިރާގެ މެންބަރ ޢަބްދުﷲ ރިޔާޒް: ރައީސް ޔާމީން ޖަވާބުދާރީ ކުރުވާނަން
މަޖިލީހުގެ މެޖޯރިޓީ ނެގުމަށްފަހު ރައީސް އަބްދުﷲ ޔާމީންގެ މައްސަލަތައް ތަހުގީގް ކުރައްވާނެ ކަމަށް ކުރީގެ ޕޮލިސް ކޮމިޝަނަރ އަދި ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރ ޢަބްދުﷲ ރިޔާޒް ވިދާޅުވެއްޖެވެ.
ރިޔާޒް މިހެން ވިދާޅުވީ ގުޅިފައިވާ ޕާޓީތަކުގެ ޖޮއިންޓް ޕާލަމެންޓްރީ ގުރޫޕުން ބޭއްވި ފުރަތަމަ ބައްދަލުވުމުގައި ނޫސްވެރިންނަށް މައުލޫމާތު ދެއްވަމުންނެވެ.
ޖުމްހޫރީ ޕާޓީގެ މައި ޖަގަހަ މ. ކުނޫޒްގައި ބޭއްވި މި ޕްރެސް ކޮންފަރެންސްގައި ޖުމްހޫރީ ޕާޓީގެ ނައިބު ލީޑަރުކަންވެސް ކުރައްވާ ޢަބްދުﷲ ރިޔާޒް ވިދާޅުވީ ރައީސް ޔާމީން މަސައްކަތް ކުރައްވަނީ ރައްޔިތުންގެ މަޖިލީހުގެ ތެރެއިން އެމަނިކުފާނު ޒިންމާދާރު ކުރުވިޔަ ނުދިނުމަށް ކަމަށެވެ.
އިސްލާހީ މަސައްކަތުގައި އުޅުއްވަން ފެއްޓެވުމާއެކު ގިނަގިނައިން ފުލުސް އޮފީހަށް ވަޑައިގަންނަވަން ޖެހިވަޑައިގެންނެވި ރިޔާޒް ވިދާޅުވީ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތައް ކަނޑައެޅުމަށް ދައުލަތުގެ ބަންޑާރަ ނައިބު މެދުވެރިކޮށް ސުޕްރީމް ކޯޓަށްވެސް މައްސަލައެއް ހުށަހަޅުއްވައިގެން އުޅުއްވަނީ އެހެންވެގެން ކަމަށެވެ.
މިދިޔަ އަންގާރަ ދުވަހުގެރޭ ރައީސް ޔާމީން ބޭއްވި ޕްރެސް ކޮންފަރެންސްއެއްގައި ދައުލަތުގެ ފައިސާއާ ބެހޭގޮތުން ދެއްކެވި ވާހަކަތަކަށް އިޝާރާތް ކުރައްވާ ރިޔާޒް ވިދާޅުވީ އެވާހަކަތަކަށް އެކަނި ބަލާލިކަމުގައިވިއަސް މަޖިލީހުން ވަރަށް ބޮޑެތި ތަހުގީގް ތަކެއް ހިންގަން ޖެހޭ ކަމަށެވެ.
"ސުޕްރީމް ކޯޓަށްވެސް ވައްދައިގެން މިއުޅޭ މައްސަލައަކީ ހަޤީގަތުގައި މަޖިލިސް ތެރެއިން ސަރުކާރު ޒިންމާދާރު ކުރުވިޔަ ނުދިނުން. އެމަނިކުފާނު ރޭގަ (އަންގާރަ ދުވަހު) ދެއްކެވި ވާހަކަތަކަށް އެކަނި ބައްލަވާލެއްވިއަސް މަޖިލީހުގެ ތެރެއިން ވަރަށް ބޮޑެތި ތަހުގީގް ތަކެއް ހިންގަން ޖެހޭ ވާހަކަތަކެއް ވިދާޅުވެއްޖެ. ރައްޔިތުންގެ ވަރަށް ބޮޑު އަދަދެއްގެ ފައިސާތަކަށް ވީގޮތެއް ނޭނގިގެން މިއުޅެނީ.އެއީ ދައުލަތުގެ ފައިސާ. ރައްޔިތުންގެ ފައިސާ. މީހަކަށް އެ އެއްޗިއްސެއް ނަގައިގެން ނުގެންދެވޭނެ. ފައިސާއެއް ނޫން ބުނަން ޖެހޭނީ ފައިސާގެ މުއާމަލާތް ހިންގި މީހުން ބުނަން ޖެހޭނީ. އެކަން އަޅުގަނޑުމެން މަޖިލީހުގެ މަސައްކަތް ފެށިގެން ދިޔައީމަ ސުވާލުތައް ކުރެވޭނެ. ޖަވާބުދާރީ ކުރުވާނަން. އެމަސައްކަތް އަޅުގަނޑުމެން މިކުރަނީ"ރިޔާޒް ވިދާޅުވިއެވެ.
ރައީސް ޔާމީންގެ ވިސްނުންފުޅު ހުންނަނީ މީހުންނަށް ބިރު ދައްކައިގެން ވެރިކަން ކުރުމަށް ކަމަށާއި މިހާތަނަށް އެމަނިކުފާނުގެ އެޖެންޑާ ކުރިއަށް ގެންދެވި ހުރިހާ ބޭފުޅުންނަށް ވަނީ އަނިޔާވެރިވެފައި ކަމަށް ރިޔާޒް ވިދާޅުވި އެވެ.
