ސިޔާސީ ޕާޓީއެއްގެ މެންބަރަކަށް ވުމާއި ޕާޓީގެ އިންތިޚާބުތަކުގައި ވޯޓުލުމަކީ އެއްވެސް އިރެއްގައި ޝަރުއީ ދާއިރާގެ މެންބަރުންނަށް މަނާކަމެއް ނޫން ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
އެ ޑިޕާޓްމަންޓުން މިގޮތަށް ބުނެފައިވަނީ ޝަރުއީ ދާއިރާގެ މުވައްޒަފުންނަށް ސިޔާސީ ހަރަކާތްތަކުގައި ބައިވެރިވުން ހުއްދަވެއްޖެ ކަމަށް މީޑިއާތަކުން ރިޕޯޓް ކުރުމާ ގުޅިގެން ނެރުނު ބަޔާނެއްގައެވެ. އެ ބަޔާނުގައި ޑީޖޭއޭ އިން ބުނީ ޝަރުއީ ދާއިރާގެ މުވައްޒަފުންނަކީ ސިޔާސީ ކަންކަމުން އެއްކިބާވެ ތިބެންޖެހޭ ބައެއް ކަމަށެވެ. އަދި އަލަށް އަމަލުކުރަން ފެށި ކޯޑް އޮފް ކޮންޑަކްޓުގެ ދަށުން މިކަން ބަދަލުވެފައިނުވާނެ ކަމަށް ވެސް ވަނީ ބުނެފައެވެ.
އެ އިދާރާއިން ބުނީ ސިޔާސީ ޕާޓީއެއްގެ މެންބަރަކަށްވުމާއި ޕާޓީގެ އިންތިޚާބުތަކުގައި ވޯޓުލުމާއި ތިމާގެ މީހަކު ވޯޓުލާ މަރުކަޒަށް ގެންދިއުމަކީ އެއްވެސް އިރެއްގައި ޝަރުއީ ދާއިރާގެ މުވައްޒަފުންގެ މައްޗަށް މަނާވެގެންދާ ކަމެއް ނޫންކަމަށެވެ. އަދި އުވާލެވުނު ބާބު ކަމަށްވާ "ޝައުރީ ދާއިރާގެ މުވައްޒަފުން ސިޔާސީ ހަރަކާތްތަކުގައި ބައިވެރިވުމުގައި" ވެސް އޮތީ އެހެން ކަމަށާއި އަދި އެ ބާބުގައި ހިމެނޭ 243 ވަނަ މާއްދާގެ (ކ) ގައި ވޯޓުލާ މަރުކަޒަށް މީހުން ގެންދިއުން އެއީ މަނާކަމެއް ގޮތުގައި ބަޔާންކޮށްފައިވީ ނަމަވެސް ނަސަބުގެ ގޮތުންނާއި މުޞާހަރާގެ ގޮތުން ގާތްތިމާގެ މީހުން" ވޯޓުލާ މަރުކަޒުތަކަށް ގެންދިއުމަށް އިސްތިސްނާކޮށްފައިވާ ކަމަށާއި ކަމަށާއި އެއީ އަލަަށް ހުއްދަވީ ކަމެއް ނޫންކަމަށް ވަނީ ބުނެފައެވެ.
އަލަށް އާއްމު ކުރި ޝަރުއީ ދާއިރާގެ މުވައްޒަފުންގެ ކޯޑްއޮފް ކޮންޑަކްޓަކީ ޝަރުއީ ދާއިރާގެ މުވައްޒަފުންގެ ކިބައިން އުއްމީދުކުރާ އަޚުލާގީ މިންގަނޑުތައް ރަނގަޅަށް ބަޔާންވެފައި އޮތުމަކީ ފަނޑިޔާރުގޭގެ މިނިވްނަކަމާއި ވިކިއަތަކަށް ނުޖެހުން ދެމެހެއްޓުމަށްޓަކައި ކޮންމެހެން މުހިންމު ކަމެއް ކަމަށް ގަބޫލުކުރެވޭތީ އާއި އެ ދާއިރާގެ މުވައްޒަފުންނަކީ ޕްރޮފެޝަނަލް ބަޔަކަށް ހެދުމަށް އެކުލަވައިލި ގަވާއިދެއް ކަމަށް ޑީޖޭއޭ އިން ބުންޏެވެ.
މި ކޯޑާއެކު ޝަރުއީ ދާއިރާގެ މުވައްޒަފުންގެ ގަވާއިދުގައި ބައިޔާންކޮށްފައިވާ ބައެއް ކަންކަމުގެ ސަބަބުން މިހާރު ދިމާވަމުންދާ އެތައް ކަމަކަށް ހައްލު ލިބި، އޮޅުންތައް ފިލައި މުވައްޒަފުންނަށް ކަންކަން ސާފުވާނެ ކަމަށް ވެސް އެ އިދާރާއިން ބުންޏެވެ.
މީގެ އިތުރުން ގަވާއިދުގެ 243 ވަނަ މާއްދާއާ ޚިލާފަށް ކޯޑް އޮފް ކޮންޑަކްޓުގައި ސިޔާސީ ގޮތުން މަނާ ކަންކަމުގެ ދިގުލިސްޓެއް ހިމެނުމުގެ ބަދަލުގައި ސިޔާސީ ހަރަކާތެއް ހިމެނޭގޮތަށް ސިޔާސީ ކަންކަން މަނާކުރެވިފައިވާ ކަމަށާއި ސިޔާސީ ހަރަކާތްތައް ހިންގުމުގެ ވައްޓަފާޅިއަށް އަންނަ އަވަސް ބަދަލުތަކަށް ރިއާޔަތްކޮށް އެކަންކަމަކީ މަނާވެގެންދާ ކަންކަމުގެ ތެރޭގައި ހިމެނޭކަން ކަށަވަރު ކުރުމަކީ ވެސް މި ކޯޑުގެ ބޭނުމެއް ކަަމަށް ޑީޖޭއޭއިން ބުންޏެވެ.
