ބާސެލޯނާ އިން ކިމިކްގެ ވާހަކަ ދައްކާތީ ބަޔާންގެ ރައީސް ރަތަށް!

ބަޔާން މިއުނިކަށް ކުޅެމުން އަންނަ ޖަރުމަނުގެ ޑިފެންޑަރުޔޯސުއާ ކިމިކްގެ ވާހަކަ ސްޕެއިންގެ ބާސެލޯނާ އިން ދައްކާތީ އެކުލަބުގެ ރައީސް ހާބާޓް ހައިނާ ރުޅިގަދަވެއްޖެ އެވެ.

އައު ސީޒަނަށް ބާސެލޯނާ އިން ސްކޮޑު ވަރުގަދަ ކުރުމަށް ކުރަމުން އަންނަ މަސައްކަތުގަައި އެންމެ އިސްކަމެއް ދެނީ ޑިފެންސް ވަރުގަދަ ކުރުމަށެވެ. އެހެންކަމުން ކިމިކް އަކީ ބާސެލޯނާ އިން އެ މަގާމަށް ކުޅުމަށް ގެންނަން ބޭނުންވާ ކުޅުންތެރިޔެކެވެ. އެކަމާ ގުޅިގެން ކުރެވޭ ސުވާލުތަކަށް އެކި އެކި ޕްރެސް ކޮންފަރެންސް ތަކުގައި ބާސެލޯނާގެ ކޯޗު ޒަވީ ހެނާންޑޭޒް އަންނަނީ ޖަވާބު ދެމުންނެވެ.

އެކަމާ ގުޅިގެން ހާބާޓް ވިދާޅުވީ، ބާސެލޯނާ އިން ކިމިކްގެ ވާހަކަ އެހާ ގިނައިން ދައްކަނީ ކީއްވެ ކަމެއް އެއްވެސް ގޮތަކަށް ނޭންގޭ ކަމަށެވެ. އޭނާ ވިދާޅުވި ގޮތުގައި ބާސެލޯނާ އިން އަންނަނީ ވަރަށް ބޮޑަށް ހުޅުވާލެވިގެން ބަޔާންގެ ކުޅުންތެރިންގެ ވާހަކަ އެކި ގޮތްގޮތަށް ދައްކަމުންނެވެ. ނަމަވެސް ކިމިކް އަކީ ބަޔާނަށް މުހިންމު ކުޅުންތެރިޔެއް ކަމަށާއި، އޭނާ ހުރީ ބަޔާންގެ އެއްބަސްވުމެއްގައި ކަމަށް ވެސް ހާބާޓް ވަނީ ވިދާޅުވެފަ އެވެ. މުސްތަޤުބަލަށް ވެސް ބަޔާނުން ކުރަމުން އަންނަ މަސައްކަތުގައި، އަދި ބަޔާންގެ ޕްލޭންގައި ވެސް އުމުރުން 28 އަހަރުގެ ކުޅުންތެރިޔާ ހިމެނޭ ކަމަށް ވެސް ވިދާޅުވި އެވެ. އޭނާ ވިދާޅުވީ ބަޔާނުން ވެސް އެހެން ކުލަބުތަކުގެ އެއްބަސްވުމުގައި ތިބޭ ކުޅުންތެރިންގެ ވާހަކަ، ހުޅުވާލެވިގެން ނުދައްކާ ކަމަށާއި، އެއީ ރީތި ވެސް ގޮތެއް ނޫން ކަމަށެވެ.

ކިމިކް އެންމެ ފުރަތަމަ 2015 ވަނަ އަހަރު ބަޔާނާ ގުޅުނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އޭގެ ފަހުން 2018 ވަނަ އަހަރު ވަނީ އެ އެއްބަސްވުން ތިން އަހަރަށް އިތުރު ކޮށްފަ އެވެ. 2021 ވަނަ އަހަރު އެ އެއްބަސްވުމުގެ މުއްދަތު ހަމަވާން އޮއްވާ، ބަޔާނުން ވަނީ އިތުރު ހަތަރު އަހަރުގެ އެއްބަަސްވުމެއް އޭނާ އަށް ހުށަހަޅައިފަ އެވެ. އެހެންކަމުން މިހާރު ކިމިކް ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ބަޔާންގައި މިހާތަނަށް ހޭދަކުރި އަށް ސީޒަނުގައި އޭނާ ވަނީ އެކުލަބަށް 347 މެޗު ކުޅެދީ، 40 ލަނޑު ޖަހައިފަ އެވެ. މީގެ އިތުރުން އެކުލަބާއެކު އޭނާ ވަނީ 19 ތައްޓެއް ވެސް ކާމިޔާބުކޮށްފަ އެވެ.