މަޖިލީސް ހިސޯރުކޮށްގެން ބަޔަކު މީހުން އުޅެނީ މަޤާމު ގެއްލިދާނެތީ: ޖާބިރު
16 ޖޫން 2023 | ހުކުރު 04:44ދެތިން މީހަކު ރުޅިއަޔަސް މަޖިލީސް އޮޕަރޭޓް ނުކުރެވި އޮވެގެން ނުވާނެ
ކާށިދޫ ދާއިރާގެ މެންބަރު އަބްދުﷲ ޖާބިރު ފަށާއިރު ޕްރޮގްރާމުގައި
ރައްޔިތުންގެ މަޖިލީސް ހިސޯރުކޮށްގެން ބަޔަކު މީހުން އުޅެނީ މަޤާމު ގެއްލިދާނެތީ ކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.
ހުކުރު ދުވަހު ރާއްޖެޓީވީގެ ފަށާއިރު ޕްރޮގްރާމުގައި ވާހަކަފުޅު ދައްކަވަމުން ޖާބިރު ވިދާޅުވީ ދެތިން މީހަކު ރުޅިއަޔަސް މަޖިލީސް އޮޕަރޭޓް ނުކުރެވި އޮވެގެން ނުވާނެ ކަމަށެވެ. މިހާރު ފެންނަ މަންޒަރަކީ މައިނޯރިޓީން މެޖޯރިޓީގެ މައްޗަށް ރޫލްކޮށްގެން އުޅޭތަން ކަމަށް ވެސް ވިދާޅުވިއެވެ.
ޖާބިރު ވިދާޅުވީ މައިނޯރިޓީން މެޖޯރިޓީގެ މައްޗަށް އަމުރު ހިންގައިގެން އުޅޭ ކަމަށާއި މެޖޯރިޓީ މީހުން އަތް އުރާލައިގެން އެކަން ޤަބޫލުކޮށްގެން ނުވާނެ ކަމަށެވެ. ޖާބިރު ވިދާޅުވީ މަޖިލިސް އެގޮތަށް ހުއްޓިފައި އޮވެގެން ނުވާނެ ކަމަށާއި މެޖޯރިޓީ މީހުން ގޮތެއް ހޯދަން ޖެހޭ ކަމަށެވެ.
ޖާބިރު ވިދާޅުވީ އެއީ އޮންނަ އުސޫލު ނޫން ކަމަށެވެ. އިންތިޚާބު ވެސް ކުރިއަށް އޮތުމާއެކު މަޖިލީހުގެ މަސައްކަތްތައް ބާރަށް ކުރިއަށްދާން ޖެހޭކަމަށް ޤަބޫލުކުރައްވާ ކަމަށް ޖާބިރު ވިދާޅުވިއެވެ.
ޖާބިރު މިހެން ވިދާޅުވެފައިވާއިރު ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގެ ރިޔާސަތު ބަލަހައްޓަވަމުން ގެންދެވި ވިލުފުށީ ދާއިރާގެ މެންބަރު ހަސަން އަފީފަށް އައި ފޯނުކޯލަކާއެކު މަޖިލީހުގެ ޖަލްސާ ވަނީ ނިންމާލާފައެވެ. ބުދަ ދުވަހުގެ ޖަލްސާގައި ރިޔާސަތުގައި އަފީފް އިންނެވީ މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނާއިބު ރައީސް އީވާ އަބްދުﷲ މަޖިލީހުގެ ރިޔާސަތު ބަލަހައްޓަވަން އުޒުރުވެރިވެވަޑައިގަތުމުންނެވެ.
މަޖިލީސް މެދުކަނޑާލީ އިދިކޮޅު ފަރާތްތަކުން އަޑުގަދަކޮށް މަޖިލީހުގެ ނިޒާމް ގެއްލުވާލުމުން މަޝްވަރާކުރުމަށް ކަމަށް ބުނެއެވެ. ނަމަވެސް ޖަލްސާގެ ދެވަނަ ދަންފަޅި ފެށުމުން ވެސް މެންބަރުން ވަނީ ތަޅުމުގައި އަޑުގަދަކޮށް ހަޅޭއްލަވާފައެވެ.
އެގޮތުން އެމްޑީޕީން ވަކިވެ މިހާރު އަމިއްލަ މެންބަރުންގެ ގޮތުގައި ތިއްބެވި 12 މެންބަރުންނާއި އެމްޑީޕީން ވަކިކޮށްފައިވާ މެންބަރަކު ވަނީ މަޖިލީހުގެ ރިޔާސަތުގެ ކައިރިއަށް ގޮސް އަޑުގަދަކުރައްވާފައެވެ.
މެންބަރުންގެ ހަޅޭކާއި ހުރެ މަޖިލީހުގެ އެޖެންޑާގައިވާ މަސައްކަތްތައް ކުރިއަށް ގެންދެވިފައެއް ނުވެއެވެ. އަދި މަޖިލިސް ކުރިއަށް ދަނިކޮށް އަފީފަށް ފޯނެއް އައުމުން "އާދެ، މި ނިންމާލަނީ" މިހެން ވިދާޅުވުމަށް ފަހު، ދެން އޭނާ ވަނީ މަޖިލީސް ނިންމަވާލައްވާފައެވެ.
