ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ކުރިއަށް އޮތް ރިޔާސީ އިންތިޚާބުގައި އެމަނިކުފާނަށް ތާއީދުކުރައްވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އާ އެކު ކޯލިޝަން ހަދާފައިވާ ޕާޓީތަކާ ބައްދަލުކުރައްވައިފިއެވެ.
މި ބައްދަލުކުރެއްވުމާ ގުޅޭގޮތުން މައުލޫމާތު ހޯދުމަށް ގުޅާލުމުން ރައީސް އޮފީހުގެ ތަރުޖަމާނު، މިއުވާން މުހައްމަދު ވިދާޅުވީ އެމަނިކުފާނު ކޯލިޝަން ޕާޓްނަރުންނާ ބައްދަލުކުރައްވާފައި ވަނީ ރައީސުލްޖުމްހޫރިއްޔާގެ ރަސްމީ ހައިސިއްޔަތުން ނޫންކަމަށެވެ. އެމަނިކުފާނު ކޯލިޝަނާ ބައްދަލުކުރައްވާފައި ވަނީ އެމްޑީޕީގެ ރިޔާސީ ކެނޑިޑޭޓުގެ ހައިސިއްޔަތުން ކަމަށް ވުމާއެކު، އެ ބައްދަލުވުމުގެ އިތުރު މައުލޫމާތު ހިއްސާކުރެވޭނީ އެމްޑީޕީއަށް ކަމަށްވެސް އޭނާ ވިދާޅުވިއެވެ.
އެމްޑީޕީގެ ތަރުޖަމާނު، އަނަސް އަބްދުއްސަތާރު ވަނީ އެފަދަ ބައްދަލުވުމެއް ބާއްވާފައިވާކަން ރާއްޖެ އެމްވީއަށް ކަށަވަރުކޮށްދެއްވާފައެވެ. އެހެންނަމަވެސް އެ ބައްދަލުވުމުގައި މަޝްވަރާކުރެވިފައިވާ ކަންކަމަކީ ކޮބައިކަން ހާމަކުރައްވާފައެއް ނުވެއެވެ.
އެމްޑީޕީއާއެކު ކޯލިޝަން ހަދާފައިވާ ދެ ޕާޓިއަކީ އަދާލަތު ޕާޓީއާއި އެމްޑީއޭއެވެ. ބުރާސްފަތި ދުވަހުގެ ބައްދަލުވުމުގައި އެމްޑީޕީގެ ޗެއަރޕަރސަން އަދި އިކޮނޮމިކް މިނިސްޓަރު، ފައްޔާޒް އިސްމާއީލް ބައިވެރިވެވަޑައިގެންނެވިއެވެ. އަދި އަދާލަތު ޕާޓީގެ ރައީސް އަދި ހޯމް މިނިސްޓަރު، އިމްރާން އަބްދުﷲ އާއި އެމްޑީއޭގެ ނައިބު ލީޑަރު އަލީ މައުރޫފް ބައިވެރިވެވަޑައިގެންނެވިއެވެ. މީގެ އިތުރުން އެމްޑީޕީއާއި އަދާލާތު ޕާޓީގެ އިސް ބޭފުޅުންނާއި އެމްޑީއޭގެ ކައުންސިލް ބޭފުޅުންވެސް ބައިވެރިވެވަޑައިގެންފައިވެއެވެ.
ރާއްޖެ އެމްވީއަށް އިތުބާރުހުރި ފަރާތަކުން މައުލޫމާތު ދެއްވާފައިވާގޮތުގައި، މި ބައްދަލުވުމުގައި ރަސްމީކޮށް ރައީސް ސާލިހުގެ ކެމްޕެއިން ފެށުމާމެދު މަޝްވަރާކުރައްވާފައިވެއެވެ. އަދި ކެމްޕެއިން ސްޓެރެޓެޖީއަކާމެދު މި ބައްދަލުވުމުގައި މަޝްވަރާކުރައްވާފައި ވާކަމަށް އޭނާ ވިދާޅުވިއެވެ. މި ބައްދަލުވުމުގެ ތަފްސީލްތައް ހިއްސާކުރާނީ ފަހުގެ ތާރީޚެއްގައި، ތިން ޕާޓީން އެކުގައި ބާއްވާ ނޫސްވެރިންގެ ބައްދަލުވުމެއްގައި ކަމަށް އޭނާ ވިދާޅުވިއެވެ.
މި އަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި އެމްޑީޕީއާއެކު ކޯލިޝަން ހެދުމަށް ރައީސް ވަނީ މި ސަރުކާރުގެ ކޯލިޝަން ޕާޓްނަރުންގެ ގޮތުގައި ތިއްބެވި އެމްއާރްއެމްއާއި ޖުމްހޫރީ ޕާޓީއަށްވެސް ދައުވަތު ދެއްވާފައެވެ. ރައީސްގެ ދައުވަތަށް އެމްއާރްއެމްއިން އެއްވެސް ޖަވާބެއް ދެއްވާފައެއް ނުވެއެވެ. އަދި ޖޭޕީން ވަނީ ރިޔާސީ އިންތިހާބުގައި އެ ޕާޓީން ވަކިވަކިން ވާދަކުރަން ނިންމައި އެކަން އިއުލާންކޮށްފައެވެ.
