އިދިކޮޅު ޕީޕީއެމް/ޕީއެންސީގެ މެމްބަރުން 5 ގަޑީއިރަށްވުރެ ގިނައިރު އެޗްއާރްސީއެމްގެ އޮފީހުގައި ތިބުމަށްފަހު އެސްއޯ ފުލުހުން އައުމުން އެތަނުން ނިކުމެއްޖެއެވެ.

އިދިކޮޅު ޕީޕީއެމް/ޕީއެންސީގެ މެމްބަރުން އެތަނަށް ވަޑައިގަތީ 12:45 އެހާއިރުއެވެ. ރާއްޖެއެމްވީއަށް މައުލޫމާތު ދެއްވަމުން އެޗްއާރްސީއެމްގެ ރައީސް މަރްޔަމް މުނާ ވިދާޅުވީ އިދިކޮޅު ކޯލިޝަން މެމްބަރުން ބައްދަލުކުރަން އެދިވަޑައިގަތުމުން، ބުދަ ދުވަހުގެ 11:15ށް ބައްދަލުވުން ހަމަޖައްސަވައިދެއްވި ކަމަށެވެ. ނަމަވެސް 12:30 ވިއިރުވެސް އެބޭފުޅުން ބައްދަލުވުމަށް ވަޑައިނުގަންނަވާ ކަމަށެވެ.

ކުއްލިއަކަށް 12:45ށް ބައްދަލުވުން ފަސްކުރަން އެބޭފުޅުން އެދިވަޑައިގެންނެވިއެވެ. އެހެންނަމަވެސް ފުލުފުލުގައި އެކި ބައްދަލުވުންތަކާއި އިވެންޓްތައް ހުރުމުން ބުރާސްފަތި ދުވަހުގެ ހެނދުނު 09:00 ޖަހާއިރަށް ވަޑައިގަތުމަށް އެބޭފުޅުންނަށް ގަޑި ދެއްވި ކަމަށާއި 12:45 ގައި ވަޑައިގެންނެވި ގޮތަށް އެބޭފުޅުން އެޗްއާރްސީއެމްގެ އޮފީހުން ނުނިކުމެ އެތަނުގައި ތިބިއްބެވި ކަމަށެވެ.

އެ ކޮމިޝަނަކީ އެކި ޤާނޫނުތަކުގެ ދަށުން ތަހުޤީޤު ކުރާ އިދާރާއަކަށްވާއިރު އެބޭފުޅުން އަޑުގަދަކުރުމުން މަސައްކަތަށް ބުރޫ އެރި ކަމަށާއި އެގޮތުން ތަހުޤީޤު ބަޔާންތަކުގެ މަސައްކަތް ވެސް ކުރިއަށް ނުގެންދެވުނު ކަމަށް މުނާ ވިދާޅުވިއެވެ.

މުނާ އިތުރަށް ވިދާޅުވީ ޕީޕީއެމުން ބައްދަލުކުރަން އެދެފިނަމަ ޚާއްސަ އިސްކަމެއް ދީގެން އެބޭފުޅުންނާ ބައްދަލުކުރައްވާ ކަމަށާއި މިހާތަނަށް ވެސް އެބޭފުޅުންނަށް އެއްބާރުލުން ދީފައިވާނެ ކަމަށެވެ. ކޮމިޝަނާއި ގުޅިގެން ހަޤީޤަތް ނެތް ވާހަކަތައް ދައްކަމުންދާ ކަމަށާއި އެ އަމަލު ހަރުކަށި އިބާރާތުން ކުށްވެރިކުރާ ކަމަށް ވެސް މުނާ ވިދާޅުވިއެވެ.