ޖޯޑީ އަލްބާ ވެސް އިންޓަ މިއާމީއާ ދިމާލަށް

ބާސެލޯނާ ދޫކޮށްލަން ނިންމާފައިވާ ތަޖުރިބާކާރު ޑިފެންޑަރު ޖޯޑީ އަލްބާ އެމެރިކާ ލީގުގެ އިންޓަ މިއާމީ އަށް ބަދަލުވާން މަޝްވަރާ ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

މި ސީޒަނަށް ފަހު އަލްބާ ބާސެލޯނާ ދޫކޮށްލީ، އެ ކުލަބުގައި ކާމިޔާބު 11 ސީޒަން ހޭދަ ކުރުމަށް ފަހު އެވެ. ބާސެލޯނާ ދޫކޮށްލަން އޭނާ ނިންމުމާއެކު، ސައުދީ ޕްރޯ ލީގުގެ ދެ ކުލަބަކުން ވަނީ އަލްބާ ހޯދުމުގެ ޝައުޤުވެރިކަން ފާޅުކޮށްފަ އެވެ. އެ ދެ ކުލަބުން ވަނީ އަލްބާ އަށް ރަސްމީކޮށް ބިޑު ވެސް ހުށަހަޅާފައި ކަމަށާއި، ނަމަވެސް އެކަމާމެދު އަލްބާ ވަކި ގޮތެއް ނުނިންމާ ކަމަށް މީޑިއާތަކުން ބުނެ އެވެ. ބައިނަލްއަޤުވާމީ ގިނަ މީޑިއާތަކުގައި ބުނެފައިވާ ގޮތުން މިވަގުތު އަލްބާ އަންނަނީ އިންޓަ މިއާމީ އަށް ބަދަލުވުމާ ގުޅޭ ގޮތުން މަޝްވަރާ ކުރަމުންނެވެ. އިންގްލެންޑުގެ ކުރީގެ ކެޕްޓަން ޑޭވިޑް ބެކަމްގެ އިންޓަ މިއާމީ އަށް ބަދަލުވާން އަލްބާ ބޭނުންވާ އެންމެ ބޮޑު އެއް ސަބަބަކީ، އޭނާގެ ޒަމާންވީ ރަޙުމަތްތެރިޔާ އަދި އާޖެންޓީނާގެ ކެޕްޓަން ލިއޮނަލް މެސީ ވެސް އެ ކުލަބަށް ބަދަލުވާން ނިންމުން ކަމަށް ވެސް މީޑިއާތަކުން ބުނެފައިވެ އެވެ. އެހެންކަމުން މުސްތަޤުބަލުގައި ކުޅޭނެ ކުލަބެއް ކުރިއަށް އޮތް ހަފްތާގެ ތެރޭގައި އަލްބާ ނިންމާނެ ކަމަށް ބެލެވެ އެވެ.

ބާސެލޯނާގެ ޑިފެންސްގައި އިސް ދައުރެއް އަދާކޮށްފައިވާ އަލްބާ ވަނީ އެ ކުލަބަށް 459 މެޗު ކުޅެދީ، 27 ލަނޑު ޖަހައިފަ އެވެ. އޭނާ އަކީ ބާސެލޯނާގެ ޑިފެންސްގައި ފާއިތުވި އަހަރުތަކުގައި އެންމެ އިތުބާރު އެއް ކުޅުންތެރިޔާ އެވެ. ބާސެލޯނާއާއެކު އަލްބާ ވަނީ 17 ތައްޓެއް ކާމިޔާބުކޮށްފަ އެވެ. ބާސެލޯނާ ދޫކޮށްލަން އަލްބާ ނިންމީ، އެކުލަބާއެކު ހަދާފައި އޮތް އެއްބަސްވުމުގައި ބާކީ އެއް އަހަރު އޮއްވަ އެވެ. އެ މުއްދަތަށް ބަދަލުގެ ގޮތުގައި އޭނާ އަށް ލިބެން އޮތް 15 މިލިއަން ޕައުންޑު ވެސް އަލްބާ ވަނީ ދޫކޮށްލައިފަ އެވެ. އަލްބާ އަކީ ސްޕެއިންގެ ޤައުމީ ޓީމަށް ވެސް ކުޅެފައިވާ ކުޅުންތެރިޔެކެވެ.