ބަޔާން މިއުނިކްގެ ފޯވާޑް ސަޑިއޯ މާނޭ ސައުދީ އަރަބިއްޔާއަށް ގެންދިއުމަށް ސައުދީގެ ޕަބްލިކް އިންވެސްޓްމަންޓް ފަންޑުން ޝައުގުވެރިވާ ކަމަށް ބުނެފިއެވެ.
އުމުރުން 31 އަހަރުގެ ކުޅުންތެރިޔާގެ މަންޒިލެއްގެ ގޮތުގައި ޕީއައިއެފް އިން ކަނޑައަޅާފައިވަނީ އަލް އިއްތިފާގެވެ. އެއީ ސައޫދީ ޕްރޯ ލީގުގެ ކުލަބުން އޭނާ ހޯދަން ޝައުގުވެރިކަން ފާޅުކޮށްފައިވާތީއެވެ. ނަމަވެސް ސައުދީ ސޮވަރިން ވެލްތް ފަންޑުން ބުނެފައި ވަނީ މާނޭ ބޭނުން ކޮންމެ ކުލަބަކާ ގުޅެން މަރުހަބާ ކިޔާ ކަމަށެވެ.
ލީގުގެ ހަތް ވަނައިގައި ނިންމާލި އަލް އިއްތިފާގް އަންނަނީ 2023-2024 ގެ ސީޒަނާ ދިމާކޮށް އެ ޓީމުގެ ސްކޮޑް ވަރުގަދަ ކުރަން މަސައްކަތް ކުރަމުން އަންނައިރު މާނޭ އެ ޓީމާ ގުޅުން ވާނީ ޓީމަށް ލިބޭ ބޮޑު ކުރިއެރުމަކަށެވެ. އެ ޓީމުން ދަނީ ކޯޗަކަށް ސްޓީވެން ޖެރާޑް ގެނައުމަށްވެސް މަސައްކަތް ކުރަމުންނެވެ. ޖެރާޑް ހުރީ މިދިޔަ އޮކްޓޫބަރު މަހު އެސްޓަން ވިލާގެ ކޯޗު ކަމުގެ މަޤާމުން ވަކިކުރި ފަހުން އެއްވެސް ޓީމަކާ ހަވާލުނުވެއެވެ. ލިވަޕޫލްގެ ކުރީގެ ކެޕްޓަން ޖެރާޑް އަލް އިއްތިފާގް އާ ހަވާލުވެއްޖެނަމަ އެ ޓީމަށް މާނޭ ގެންނަން އިތުރަށް ފަސޭހަ ވާނެކަމަށް ބެލެވެއެވެ.
ސައުދީ ލީގުން އެ ލީގު ވަރުގަދަކުރުމަށް ގިނަ އަދަދެއްގެ ކުޅުންތެރިން ގެންދިޔުމަށް ދަނީ މަސައްކަތް ކުރަމުންނެވެ.
