އިންޓަ މިލާނަށް ކުޅެމުން އަންނަ އިވާން ޕެރިސިޗް ހޯދުމަށް އެއްވެސް ކްލަބަކުން ޝައުގުވެރިކަން ފާޅުކޮށްފައި ނުވާ ކަމަށް އެ ކްލަބުގެ ކޯޗު ލޫސިއާނޯ ސްޕެލެޓީ ބުނެފި އެވެ.

ނޫސްވެރިންނަށް މައުލޫމާތު ދެމުން ލޫސިއާނޯ ބުނީ ޓްރާންސްފާ ބާޒާރު ހުޅުވުނު އިރު ޕެރިސިޗް ކްލަބް ބަދަލުކުރަން އުޅޭ ކަމަށް ބުނެ އަޑުތައް ފެތުރުނުކަމަށާއި، އެހެން ނަމަވެސް އެއްވެސް ކްލަބަކުން އޭނާ ހޯދުމަށް މިހާތަނަށް ޝައުގުވެރިކަން ފާޅުކޮށްފައި ނުވާ ކަމަށެވެ.

ލޫސިއާނޯ ބުނީ ނޫސްވެރިން ތަފާތު ރިޕޯޓްތައް ކުރާ ކަމަށާއި، އެވާހަކަތައް ދިމާނުވެ ގިނަ ދުވަސްތަކެއް ފާއިތުވަމުން ވެސް އަންނަ ކަމަށެވެ. އެގޮތުން އޭނާ ބުނީ ޕެރިސިޗްއަކީ ރިޕްލޭސްކުރަން އުނދަގޫ ކުޅުންތެރިޔެއް ކަމަށާއި، ހުށަހެޅުމެއް އައި ނަމަވެސް ޕެރިސިޗް ދޫކޮށްލަން ދެކޮޅުހަދާނެ ކަމަށެވެ.

ރިޕޯޓްތައް ބުނާ ގޮތުން ޕެރިސިޗް ހޯދުމަށް ޔުނައިޓެޑުން ވަނީ 30 މިލިއަން ޔޫރޯ ހުށަހަޅާފައެވެ. އެހެން ނަމަވެސް އިންޓަ އިން ބޭނުން ވަނީ އޭނާ 45 މިލިއަން ޔޫރޯ އަށް ވިއްކާލުމަށެވެ. މީގެ އިތުރުން ރިޕޯޓްތައް ބުނާ ގޮތުން ޕެރިސިޗް ވިއްކާލުމަށް ޔުނައިޓެޑް އަދި އިންޓަ ވަނީ މިހާރު އެއްބަސްވުމަކަށް އައިސްފައެވެ.

ގޯލް ޑޮޓްކޮމް އިން ބުނީ ޕެރިސިޗް ކްލަބުގައި މަޑުކުރަން އިންޓަގެ ކޯޗު ލޫސިއާނޯ ސްޕަލޭޓީ އެދިފަައިވާ ކަމަށެވެ. އެހެންނަމަވެސް އޭނާ ވަނީ ކްލަބް ދޫކޮށްލަން ނިންމާފައި ކަމަށް ރިޕޯޓްތައް ބުނެއެވެ.

ޖަރުމަންގެ ވޮލްފްސްބާގް އިން 2015 ވަނަ އަހަރު އިންޓަމިލާނަށް ބަދަލުވި ޕެރެސިޗް ވަނީ އެޓީމަށް މިހާތަނަށް ކުޅުނު 79 މެޗުގައި 20 ލަނޑު ކާމިޔާބުކޮށްފައެވެ. މީގެ އިތުރުން ޕެރެސިޗް ވަނީ ވޮލްފްސްބާގްއާ އެކު ޖަރުމަން ކަޕް އަދި ޖަރުމަން ސުޕާކަޕް ކާމިޔާބުކޮށްފައެވެ.

ބްރޯޝިއާ ޑޯޓްމުންޑް އަށް ވެސް ކުޅެފައިވާ ޕެރެސިޗް ވަނީ އެޓީމަށް ކުޅުނު 64 މެޗުގައި 12 ލަނޑު ކާމިޔާބުކޮށް، ބުންޑަސްލީގާ އަދި ޖަރުމަން ކަޕް އެޓީމާ އެކު ކާމިޔާބުކޮށްފައެވެ.