އަނިޔާގެ ސަބަބުން ކުޅުމާއި ދުރުގައި ހުރި ލިވަޕޫލްގެ ފޯވާޑް ސަޑިއޯ މާނޭ، ފީފާ ވޯލްޑް ކަޕް ކޮލިފައިންގއަށް ނެގި ސެނެގާލްގެ ޤައުމީ ސްކޮޑުގައި ހިމަނައިފިއެވެ.

އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕް ކޮލިފައިންގައި އަންނަ ނޮވެމްބަރު މަހުގެ 10 ވަނަ ދުވަހާއި 14 ވަނަ ދުވަހު ދެކުނު އެފްރިކާ އާދެކޮޅަށް ސެނެގާލް ކުޅެން ޖެހޭ ދެމެޗަށް ނެގި ސެނެގާލްގެ ޤައުމީ ސްކޮޑުގައި މާނޭގެ ނަން ހިމަނާފައިވީނަމަވެސް، ފަލަމަސްގަނޑަށް ލިބުނު އަނިޔާގެ ސަބަބުން އޭނާއަށް އެދެމެދުގައި ނުކުޅެވޭނެ ކަމަށް އޮތީ ބެލެވިފައެވެ.

އެހެންނަމަވެސް ސެނެގާލްގެ ކޯޗު އަލިއޫ ސިސޭ ބުނީ، އޭނާ އެދެމެޗަށް ސައްތައިން ސައްތަ ފިޓުވާނެ ކަމުގެ ޝައްކެއް ނެތް ކަމަށާއި، އެދެމެޗަށް އޭނާއަށް ނިކުމެވޭނެ ކަމުގެ ޔަގީންކަން އެބައޮތް ކަމަށެވެ.

މާނޭގެ ކްލަބް ލިވަޕޫލްއިން މިމަހުގެ 10 ވަނަ ދުވަހު ވަނީ، އަނިޔާގެ ސަބަބުން އިތުބާރު ފޯވާޑް ހަ ހަފްތާއަށް ކުޅުމާއި ދުރަށް ދާން ޖެހޭ ކަން ހާމަކޮށްފައެވެ.

މާނޭއަށް އަނިޔާވީ އޭގެ ތިން ދުވަސް ކުރިން ފީފާ ވޯލްޑް ކަޕް ކޮލިފައިންގައި ކޭޕް ވާޑޭގެ މައްޗަށް ދެލަނޑު ސުން ލަނޑުން ސެނެގާލް ކުރިހޯދި މެޗުގެ ފަހު ވަގުތުކޮޅުގެ ތެރޭގައެވެ.

މާނޭގެ ހާލަތާއި ގުޅޭ ގޮތުން ވާހަކަ ދައްކަމުން ސެނެގާލްގެ ކޯޗު ސިސޭ ބުނީ، އޭނާ އަންނަނީ ޓީމާއި ވަކިން ދުވުން ފަދަ ތަމްރީންތައް ހަދަމުން ކަމަށާއި، އަންނަ ހަފްތާއިން ފެށިގެން ބޯޅަ އާއެކު ފަރިތަކުރުންތަކަށް މާނޭ ނިކުންނާނެ ކަމަށެވެ.

އަނިޔާގެ ސަބަބުން އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑާއި ދެކޮޅަށް ލިވަޕޫލް ކުޅެ އެއްވަރުވި މެޗާއި، ޔުއޭފާ ޗެމްޕިއަންސް ލީގުގައި އަންގާރަ ދުވަހުގެރޭ ސްލޮވީނިއާގެ ޗެމްޕިއަން މަރިބޯ އަތުން ހަތް ލަނޑު ސުން ލަނޑުން ލިވަޕޫލް މޮޅުވި މެޗުގައި މާނޭ ނުކުޅެއެވެ.

2002 ވަނަ އަހަރަށްފަހު ފުރަތަމަ ފަހަރަށް ފީފާ ވޯލްޑް ކަޕްގެ ޖާގައެއް ހޯދުމަށް ދެކުނު އެފްރިކާ އާއި ދެކޮޅަށް ކުޅޭ ކޮލިފައިންގ މެޗަކީ މުހިންމު މެޗެކެވެ. އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕްގެ ސީދާ ޖާގައެއް ހޯދުމަށް ސެނެގާލް ބޭނުން ވަނީ ދެ ޕޮއިންޓެވެ.

މިހާތަނަށް ފީފާ ވޯލްޑް ކަޕްގައި ސެނެގާލް ވާދަކޮށްފައިވަނީ އެންމެ ފަހަރަކު އެވެ. 2002 ވަނަ އަހަރު ޖަޕާނާއި ދެކުނު ކޮރެއާގައި ބޭއްވި އެމުބާރާތުގައި ވާދަކޮށް، ސެނެގާލް ވަނީ މުބާރާތުގެ ކުއާޓަރ ފައިނަލާއި ހަމައަށް ދަތުރުކޮށްފައެވެ.

ފީފާ ވޯލްޑް ކަޕްގެ އެފްރިކާ ބައްރުގެ ކޮލިފައިންގައި ސެނެގާލް އާއި ދެކުނު އެފްރިކާ މީގެ ކުރިން ބައްދަލުކުރިއެވެ. މިދިޔަ އަހަރު ކުޅުނު އެމެޗު، ދެ ލަނޑު އެއް ލަނޑުން ދެކުނު އެފްރިކާ ކާމިޔާބުކުރި ނަމަވެސް، އެމެޗުގައި ރެފްރީކަން ކުރި ގާނާގެ ޖޯސެފް ލަމްޕްޓޭ މެޗު އޮޅުވާލިކަން ސާބިތުވުމާއި ގުޅިގެން ދުނިޔޭގެ ފުޓްބޯޅައިގެ މައި އިދާރާއިން ވަނީ ލަމްޕްޓޭ އުމުރަށް ސަސްޕެންޑްކޮށް، އެމެޗު ނޮވެމްބަރު މަހުގެ 10 ވަނަ ދުވަހު އަލުން ކުޅުމަށް ނިންމާފައެވެ.

ސެނެގާލް އޮތީ އަށް ޕޮއިންޓާއެކު ފީފާ ވޯލްޑް ކަޕްގެ އެފްރިކާ ބައްރުގެ ކޮލިފައިންގ ގްރޫޕް ޑީގެ އެއްވަނާގައެވެ. ގްރޫޕްގެ ދެވަނާގައިވާ ބުރްކީނާ ފާސޯ އަދި ތިންވަނާގައިވާ ކޭޕް ވާޑޭ އަށް ހަ ޕޮއިންޓް ލިބިފައިވާއިރު، ހަތަރު ޕޮއިންޓް ލިބިގެން ގްރޫޕްގެ ފުލުގައި އޮތީ ދެކުނު އެފްރިކާއެވެ.

މިގްރޫޕްގައި ސެނެގާލް އަދި ދެކުނު އެފްރިކާ ފިޔަވައި ކޮންމެ ޓީމަކަށްވެސް ބާކީ އޮތީ އެންމެ މެޗެކެވެ.