ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށް ގެންދާ އެސްޓީއޯ މިނިވަން ޗެމްޕިއަންޝިޕްގެ ފައިނަލް ބުރު ބޭއްވުމަށް 6 ރަށަކުން ޝައުގުވެރިކަން ފާޅުކޮށް ޕްރޮޕޯސަލް ހުށައަޅާފައިވާ ކަމަށް އެފްއޭއެމް އިން ބުނެފިއެވެ.

މި މުބާރާތުގެ ޒޯން ބުރުގެ ކުޅުން ނިމިފައި ވާއިރު، މުބާރާތުގެ ފައިނަލް ބުރު ބޭއްވުމަށް ބޭނުންވާ ރަށްތަކުން ޕްރޮޕޯސަލް ހުށައެޅުމަށް ފާއިތުވި މަހުގައި އެ އިދާރާއިން ވަނީ ފުރުސަތު ހުޅިވާލާފައެވެ. އެފްއޭއެމް އިން މައުލޫމާތު ދޭގޮތުގައި މުބާރާތުގެ ފައިނަލް ބުރަށް ދަތުރުކޮށްފައިވާ ރަށްތަކުގެ ތެރެއިން 2 ރަށެއް ފިޔަވާ އެހެން ހުރިހާ ރަށަކުން ވަނީ ޝައުގުވެރިކަން ޕްރޮޕޯސަލް ހުށައަޅާފައެވެ.

އަންނަ މަހުގެ 5 ވަނަ ދުވަހު ފައިނަލް ބުރުގެ ކުޅުން ފެށުމަށް ހަމަޖެހިފައި ވާއިރު، ޕްރޮޕޯސަލް ހުށައަޅާފައިވާ 6 ރަށުގެ ތެރެއިން ފައިނަލް ބުރު ބާއްވާނީ 2 ރަށެއްގައި ކަމަށް އެ އިދާރާއިން މައުލޫމާތު ދެއެވެ. އެގޮތުން އެ 2 ރަށެއް ކަނޑައެޅުމަށްޓަކައި އެ އިދާރާގެ ޓީމެއް މިހާރު އަންނަނީ މަސައްކަތް ކިރަމުންނެވެ. ފައިނަލް ބުރު ބާއްވާނެ ދެ ރަށެއް ކަނޑައަޅާނީ ރަށްތަކުން ހުށައަޅާފައިވާ ޕްރޮޕޯސަލް ތަކަށް ބެލުމަށް ފަހުގައެވެ. އަދި މީގެ އިތުރުން، ޝައުގުވެރިކަން ފާޅުކޮށްފައިވާ ރައްތަކަށް އެއިދާރާގެ ޓީމެއް ދަތުރުކޮށް، ދަނޑުގެ ހާލަތާއި، އެހެނިހެން އިންތިޒާމުތަށް ހުރިގޮތް ބަލަމުންދާ ކަމަށްވެސް އެއިދާރާއިން ވަނީ ބުނެފައެވެ.

ފައިނަލް ބުރު ބޭއްވުމަށް ޕްރޮޕޯސަލް ހުށައަޅާފައިވާ ރައްތަކަކީ ހދ.ކުޅުދުއްފުށި، ބ.އޭދަފުށި، ތ.ތިމަރަފުށި، ދ.ކުޑަހުވަދޫ، ގދ.ތިނަދޫ، އަދި އައްޑޫ ސިޓީ އެވެ.

ޖުމްލަ 8 ޒޯނަކަށް ބަހާލައިގެން ކުރިއަށް ގެންދިޔަ މި މުބާރާގެ ފައިނަލް ބުރަށް ކޮންމެ ޒޯނަކުން 1 ޓީމު ވަނީ ދަތުރުކޮށްފައެވެ. އެގޮތުން ފައިނަލް ބުރު ކުރިއަށް ގެންދިއުމަށް ހަމަޖެހިފައިވަނީ 2 ގުރޫޕަކަށް ބަހާލައިގެންނެވެ.

ފުޓުބޯޅަ ފޯމެޓަށް މުޅިން އަލަށް ގެނައި ބަދަލާއި ގުޅިގެން، މި މުބާރާތުގެ އެންމެ ގަދަ 4 ޓީމު މާލޭގައި އޮންނަ ދިވެހި ލީގަށް ކޮލިފައި ވާނެއެވެ. މާލެ ލީގުގައި ވާދަކުރާނީ ފުރަތަމަ ޑިވިޝަންގެ ކްލަބުތަކުގެ މެޗުގައި ކުޅެވޭ މާލެ ލީގުގެ ގަދަ 4 ޓީމާއި، މިނިވަން ޗެމްޕިއަންޝިލްގެ ގަދަ 4 ޓީމެވެ.

މުބާރާތުގެ ފައިނަލް ބުރަށް ދަތުރުކޮށްފައިވާ ޓީމުތަކަކީ ހދ. ކުޅުދުއްފުށި، ބ. އޭދަފުށި، ތ. ތިމަރަފުށި، ށ. މިލަންދޫ، އއ. މާޅޮސް، ދ. ކުޑަހުވަދޫ، ގދ. ތިނަދޫ އަދި ސ. ފޭދޫ އެވެ.