ފައިސާގެ ދަހިވެތިކަމުގައި ލެވަންޑޯސްކީ ސަައުދީ ލީގަށް ނުދާނެ!
13 ޖޫން 2023 | އަންގާރަ 09:22މިވަގުތު އޭނާ ކުޅެމުން އަންނަ ސްޕެއިންގެ ބާސެލޯނާއާ އެއްވެސް މައްސަލައެއް ނެތް
ކެރިއަރުގެ 600 ވަނަ ގޯލް ޖެހުމަށްފަހު ލެވާންޑޯސްކީ
ފައިސާގެ ދަހިވެތިކަމުގައި ސައުދީ ޕްރޯ ލީގަށް ނުދާނެ ކަމަށް ބާސެލޯނާ އަށް ކުޅެމުން އަންނަ ޕޮލެންޑުގެ ކެޕްޓަން ރޮބާޓް ލެވަންޑޯސްކީ ބުނެފި އެވެ.
ލެވަންޑޯސްކީ މިހެން ބުނީ ސައުދީ ލީގުން ނަން މަޝްހޫރު ގިނަ ކުޅުންތެރިންތަކެއް އެ ލީގުގެ ކުލަބުތަކަށް ގެންނަމުންދާ ވަަގުތެއްގަ އެވެ. އެހެންކަމުން އެ ދަނޑިވަޅުގައި އޭނާ ސައުދީ ލީގަށް ގޮސްފާނެތޯ ސުވާލު ކުރުމުން ލެވަންޑޯސްކީ ބުނީ، މިވަގުތު އޭނާ ކުޅެމުން އަންނަ ސްޕެއިންގެ ބާސެލޯނާއާ އެއްވެސް މައްސަލައެއް ނެތް ކަމަށެވެ. އެހެންކަމުން ބާސެލޯނާ ދޫކޮށްލުމާމެދު ވިސްނަމުން ނުދާ ކަމަށް ވެސް އޭނާ ބުންޏެވެ. އޭނާ ބުނީ ބާސެލޯނާއާއެކު ހަދާފައިވާ އެއްބަސްވުން އެގޮތުގަައި އަދިވެސް ކުރިއަށްދާ ކަމަށާއި، ސައުދީ ލީގުގައި ކަންތައް ވަމުން އަންނަ ގޮތް ވެސް އޭނާ އަށް ފެންނަ ކަމަށެވެ. ނަމަވެސް އެކަމާ މެދު އޭނާގެ ކަންބޮޑުވުމެއް އެއްވެސް ވަރަކަށް ނެތް ކަމަށާއި، އެއަށްވުރެ މުހިންމު ކަންކަން ހުރި ކަމަށް ލެވަންޑޯސްކީ ވަނީ ބުނެފަ އެވެ.
ކުރީގެ ކުލަބު، ޖަރުމަނުގެ ބަޔާން މިއުނިކް ދޫކޮށް ބާސެލޯނާ އަށް ބަދަލުވި ފަހުން ލެވަންޑޯސްކީ ވަނީ އެކުލަަބުގައި ވެސް މޮޅު ކުޅުމެއް ދައްކައިފަ އެވެ. ފުރަތަމަ ސީޒަނުގަައި ވެސް އޭނާ ވަނީ ބާސެލޯނާ އަށް ކުޅެދިން 46 މެޗުގައި 33 ލަނޑު ޖަހައިފަ އެވެ. މީގެ އިތުރުން މި ސީޒަންގެ ސްޕެނިޝް ލީގުގައި އެންމެ ގިނަ ލަނޑު ޖެހި ކުޅުންތެރިޔަކީ ވެސް އޭނާ އެވެ. ބާސެލޯނާއާއެކު އޭނާ ވަނީ ދެ ތައްޓެއް ވެސް ކާމިޔާބުކޮށްފަ އެވެ. އެއީ ސްޕެނިޝް ލީގާއި ސްޕެނިޝް ސުޕަ ކަޕް އެވެ.
