އައްޑޫސިޓީގައި ހިންގާ ވިޔަފާރިތަކަށް ޓެކްސް ކޮންސެޝަންތަކެއް (ލުއިތަކެއް) ދިނުމަށް ކުރަންޖެހޭ މަސައްކަތްތައް ކުރަމުންދާ ކަމަށް ސަރުކާރުން ބުނެފިއެވެ.
ރައީސް އޮފީހުގެ ޕޮލިސީ ސެކްރެޓަރީ އަހުމަދު ހަމްދާން ކުރެއްވި ޓުވީޓްތަކެއްގައި ވިދާޅުވެފައިވަނީ، އައްޑޫސިޓީގެ ފަތުރުވެރިކަމުގެ އިތުރުން މުޅި އިޤްތިޞާދީ ލޭންޑްސްކޭޕް ބަދަލުކޮށްލުމަށް އެހީތެރިވެދިނުމުގެ ގޮތުން އައްޑޫސިޓީގައި ހިންގާ ވިޔަފާރިތަކަށް ޓެކްސްއިން ލުއިތަކެއް ދިނުމަށް ސަރުކާރުގެ ވިސްނުން އެބަހުރި ކަމަށެވެ.
ފަތުރުވެރިކަމަށް ފަހިކުރުމަށް، 2021 ޖަނަވަރީން ފެށިގެން އައްޑޫގެ ބިމު ކުލި ރިޒޯޓުތަކަށް އަކަ މީޓަރަކަށް 8 ޑޮލަރުން 2 ޑޮލަރަށް ކުޑަކޮށް އެންމެ ބޮޑުވެގެން ދައްކަންޖެހޭ ކުލި 2 މިލިއަން ޑޮލަރުން 8 ލައްކަ ޑޮލަރަށް ވަނީ ކުޑަކޮށްފައެވެ.
ކުރިން އެއްވެސް ސަރުކާރަކުން އަޅާނުލައި ދޫކޮށްލާފައިވާ ޝަންގްރިލާގެ މައްސަލަ ހައްލުކޮށްދިނުމަށް ޝެއަރހޯލްޑަރ އެއްބަސްވުމުގެ ދަށުން ސަރުކާރުން ދޭންޖެހޭ ލޯނު މި ސަރުކާރުން ދިން ކަމަށާއި ޝަންގްރިލާގެ ހިއްސާ ދޫކޮށްލުމުގެ ކަންކަން ސަރުކާރުން ދަނީ ކުރަމުން ކަމަަށްވެސް ހަމްދާން ވިދާޅުވިއެވެ. މިހާރު ހިންގަމުންދާ ރިޒޯޓުތަކަށް އެހީތެރިވެދިނުމުގެ ގޮތުން ކޮށްފައިވާ ކަންތައްތަކުގެ އިތުރުން ސަރުކާރުން ސީދާ އައްޑޫގެ ޓޫރިޒަމް ކުރިއެރުވުމަށް އިންޓަރވެންޝަނެއް ހަދަންޖެހޭ ކަމަށް ދެކި، އިންވެސްޓްކުރަން ނިންމައި ސަރުކާރުން މަޝްރޫޢުތަކެއް ރާވައި މަސައްކަތް ވަނީ ފެށިފައެވެ.
އެގޮތުން ރައީސް އިބްރާހިމް މުހައްމަދު ސޯލިޙްވެސް ވިދާޅުވެފައިވަނީ އައްޑޫ ސިޓީގެ ތަރައްޤީ މަޑުޖައްސަވާނުލައްވާނެ ކަމަށާއި އައްޑޫ ސިޓީގެ ބިން އިތުރުކުރުމުގެ ބޮޑު މަޝްރޫއާއެކު އެ ސިޓީއަކީ ދުނިޔެއަށް ހުޅުވާލެވިފައިވާ ވަރުގަދަ ސިޓީއެއްގެ ގޮތުގައި ތަރައްގީކުރުމުގެ އަމަލީ މަސައްކަތް ފެށުނީކަމަށް ވިދާޅުވެފައިވެ އެވެ.
"އިޤްތިޞާދީ ހުރިހާ ބުރު، އެކުއެކީ އެނބުރިގެން ނޫނީ ނަތީޖާއެއް ނުނެރެވޭނެ. އައްޑޫއަށް ބަލާނަމަ، ބިން އިތުރުކޮށް، މަގުތައް ހަދައި، ފަތުރުވެރިކަމަށް އިތުރު ރަށްތައް އުފައްދައި އަދި އެއަރޕޯޓް ތަރައްޤީ ކުރުން، އަޅުގަނޑުމެން ކުރިއަށް މިގެންދަނީ އެކުއެކީގައި"ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު
އައްޑޫސިޓީގައި ރިޒޯޓު ތަރައްޤީކުރުމަށް 8.3 ހެކްޓަރުގެ 3 ރަށާއި 5 ހެކްޓަރުގެ 2 ރަށް އުފެއްދުމުގެ މަސައްކަތް ކުރިއަށް އެބަދެ އެވެ. މި ރަށްތަކުން 500 ކޮޓަރި ބާޒާރަށް ނެރެވޭއިރު، ރަށްތައް އުފައްދައި ނިމެންވާއިރަށް ކުއްޔަށް ދޫކުރުމުގެ ކަންކަން ސަރުކާރުން ދަނީ ކުރަމުންނެވެ.
ފްލެގްޝިޕް މަޝްރޫޢެއްގެ ގޮތުގައި ހަންކެޑެގައި 143 މިލިއަން ޑޮލަރަށް އިންޓެގްރޭޓެޑް ރިޒޯޓެއް ތަރައްޤީކުރުމުގެ ޢަމަލީ މަސައްކަތް ފެށުމަށް ތައްޔާރުވަމުންވާއިރު، މިއީ 14 ހޮޓަލުގެ އިތުރުން ވިލާތަކާއި އެޕަރޓްމަންޓްތަކުން 2082 އެނދު އުފެއްދޭނެ މަޝްރޫއުއެކެވެ.
އަދި ހަންކެޑެ މަޝްރޫޢު ޑިޒައިންކުރެވިފައިވަނީ ވީހާވެސް ގިނަ އިޤްތިޞާދީ ފުރުޞަތުތައް އައްޑޫގެ ރައްޔިތުންނަށް ލިބިގެންދާނެ ގޮތަށް ކަމަށްވާއިރު، ހަންކެޑެގައި ތަރައްޤީކުރެވޭ ކޮންމެ ވަސީލަތަކީ ވަކި ވަކި ވިޔަފާރިތަކަށް ކުއްޔަށް ދީގެން ވަކިން ހިންގޭނެ ތަންތަން ކަމަށް ހަމަޖެހިގެންދާނެއެވެ. ހަންކެޑެ މަޝްރޫޢުގެ ކޮންޓްރެކްޓް ތެރޭގައި އައްޑޫގެ މީހުން ދިރިއުޅޭ ރަށްތަކުގައި 75 ކޮޓަރީގެ 4 ގެސްޓްހައުސް ތަރައްޤީކުރުން ހިމަނާފައިވެއެވެ. މިއީ އިތުރު 300 ކޮޓަރި އެވެ.
އައްޑޫ ސިޓީގެ މީހުން ދިރިއުޅޭ ރަށްތަކުން ގެސްޓްހައުސް ތަރައްޤީކުރުމަށް ދޫކުރެވުނު ބިންތަކުގައި އެސް.ޑީ.އެފް.ސީ މެދުވެރިކޮށް ކޮންޓްރެކްޓާ ފައިނޭންސް އުސޫލުން ގެސްޓްހައުސް އެޅުމުގެ މަޝްރޫޢެއް ފެށުމަށްވެސް ދަނީ ތައްޔާރުވަމުންނެވެ. އެގޮތުން 15-20 އަހަރުގެ މުއްދަތެއްގައި އަނބުރާ ފައިސާ ދައްކާގޮތަށް ކުރިއަށް ގެންދާ މި މަޝްރޫޢުގައި ބައިވެރިވުމަށް 44 ފަރާތަކުން 58 ބިމަކަށް ޝައުގުވެރިކަން ފާޅުކޮށްފައިވެއެވެ. އެއީ ޓޫރިސްޓް އެނދުގެ އަދަދުން ބަލާނަމަ އެއީ 2870 އެނދު ހިމެނޭ މަޝްރޫޢެއް ކަމަށް ސަރުކާރުން ބުނެއެވެ.
އައްޑޫ އިންޓަރނޭޝަނަލް އެއަރޕޯޓު ކުންފުނިން މިހާރުވަނީ ގަމުގައި ހުންނަ ދޫގަސް އަލުން ތަރައްޤީކުރުމުގެ މަޝްރޫޢުއަށް ކޮންޓްރެކްޓަރެއް ހޯދާފައި ކަމަށާއި ދޫގަސް ވެގެންދާނީ 130 ކޮޓަރީގެ ޒަމާނީ ހޮޓަލަކަށެވެ.
ދޫގަސް މަޝްރޫޢުގެ ތެރެއިން ގަމުގައި އިތުރު 50 ކޮޓަރީގެ ހޮޓަލެއް ތަރައްޤީކުރުމަށް ހިމަނާފައިވެއެވެ. އޭ.އައި.އޭގެ ޕްރައިވެޓް ޝެއަރހޯލްޑަރގެ އެހީތެރިކަމާއެކު ފައިސާ ހަމަޖެހިފައިވާ ދޫގަސް މަޝްރޫޢުގައި ވަރަށް އަވަހަށް ސޮއިކުރެވޭނެއެވެ. ސަރުކާރުން އިންވެސްޓްކުރާ މަޝްރޫޢުތައް ނިމުމުން އައްޑޫގައި މިހާރު ރަޖިސްޓަރީ ކޮށްފައިވާ 1528 އެނދު (ޝަންގްރިލާ ހިމަނައިގެން) ގެ އިތުރަށް ގާތްގަނޑަކަށް 7000 އެނދު އިތުރުކުރެވިގެންދާނެ އެވެ. މިހާރުގެ ބެޑް ކެޕޭސިޓީ އަށް 4 ގުނައަށްވުރެ ބޮޑު އަދަދެއް އިތުރުވާނެ ކަމަށްވެސް ސަރުކާރުން ހާމަކުރެ އެވެ.
