ރައްޔިތުންގެ މަޖިލީހުގެ ރައީސްގެ އިތުބާރުނެތްކަމުގެ މައްސަލައިގެ މުއްދަތު ހަމަވަންދެން އޮންނަ 14 ދުވަހުގެ މުއްދަތުގެ ތެރޭގައި ރިޔާސަތު ބެލެހެއްޓެވުމަށް ރައީސަށް އުޒުރުވެރިނުވެވޭނެކަމަށް މަޖިލީހުގެ ކައުންސެލަރ ޖެނެރަލް ފާތުމަތު ފިލްޒާ ލަފާދެއްވާފައިވާކަމަށް އައްޑޫ މީދޫ ދާއިރާގެ މެމްބަރ ރޮޒައިނާ އާދަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ އިދާރާގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރޮޒައިނާ ވިދާޅުވީ މަޖިލީހުގެ ކައުންސިލަރ ޖެނެރަލް ދެއްވި ލަފާގެ ތެރޭގައި ފާހަގަކުރެއްވީ ރައީސްގެ އިތުބާރުނެތްކަމުގެ ވޯޓުގެ މުއްދަތުގެ އެކީގައި ރިޔާސަތުގައި ނީންނަވާނަމޭ އުޒުރުވެރިވަމޭ ވިދާޅުވެ އެސިޓީ އެގޮތަށް ނުފޮނުވޭނެކަމަށާއި އެއީ މަޖިލީހުގެ ގަވާއިދާ ޚިލާފުކަމެއް ކަމަށެވެ.

ރައްޔިތުންގެ މަޖިލީހުގެ 54 މެމްބަރަކު ސޮއިކުރައްވާ ނަޝީދުގެ އިތުބާރުގެ ނެތްކަމުގެ މައްސަލައެއް މަޖިލީހަށް ހުށަހަޅާފައިވާއިރު އަމީން އާންމު ފާތުމަތު ނިއުޝާއަށް ނަޝީދު ފޮނުއްވި ސިޓީގައި ވަނީ އިތުބާރު ނެތްކަމަށް ހުށަހަޅާ ފައިވާ މައްސަލައާ ގުޅިގެން ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށެވެ. އެ ސިޓީފުޅުގައި ނަޝީދު ވިދާޅުވީ 07 ޖޫންގައި ހުށަހަޅާފައިވާ އެމަނިކުފާނުގެ އިތުބާރު ނެތްކަމުގެ މައްސަލައާ މެދު ގޮތެއް ނިމެންދެން ރިޔާސަތު ބެލެހެއްޓެވުމުން އެއްކިބާވެވަޑައިގަންނަވާ ކަމަށެވެ. ނަމަވެސް މަޖިލީހުގެ ގަވާއިދު ބަޔާންކުރައްވާ މިންވަރަށް މަޖިލީހުގެ އެންމެހާ ކަންކަން ހިންގުމުގައި ދެމި ހުންނަވާނެ ކަމަށް ވަނީ ވިދާޅުވެފައެެވެ. އަދި އެމަނިކުފާނުގެ އިތުބާރު ނެތްކަމުގެ މައްސަލަ އަށް ހުރަސް އެޅޭ އެއްވެސް ކަމެއް ނުކުރައްވާނެކަމުގެ ޔަޤީންކަން ދެއްވާކަމަށް ވެސް އެ ސިޓީފުޅުގައި ރައީސް ނަޝީދު ވިދާޅުވެފައިވެއެވެ.

މަޖިލީހުގެ ރައީސްގެ އިތުބާރުނެތްކަމުގެ މައްސަލަ މަޖިލީހަށް ހުށަހަޅާފައިވާއިރު ނައިބު ރައީސް އީވާ އަބްދުﷲގެ އިތުބާރުނެތް މައްސަލައިގެ 14 ދުވަހުގެ ނޯޓިހުގެ މުއްދަތު ވަނީ ހަމަވެފައެވެ. އަދި އެމައްސަލަ މިހާރު ވަނީ އަންގާރަ ދުވަހުގެ ޖަލްސާއަށް އެޖެންޑާކޮށްފައެވެ.

ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ބ ގައި ބުނެފައިވަނީ މަޖިލީހުގެ ރައީސްގެ މަގާމުން ވަކިކުރުމުގެ ގަރާރެއް މަޖިލީހަށް ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާއެއްގެ ރިޔާސަތު ބަލަހައްޓާނީ މަޖިލީހުގެ ނައިބު ރައީސެވެ. އަދި މަޖިލީހުގެ ނައިބު ރައީސްގެ މަގާމުން ވަކިކުރުމުގެ ގަރާރެއް މަޖިލީހަށް ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާއެއްގެ ރިޔާސަތު ބަލަހައްޓާނީ މަޖިލީހުގެ ރައީސެވެ.

މަޖިލީހުގެ ގަވާއިދުގެ 44 ވަނަ މާއްދާގެ ހ ގައި ބުނެފައިވަނީ މަޖިލީހުގެ ރައީސާއި މަޖިލީހުގެ ނައިބު ރައީސް މަޖިލީހުގެ ޖަލްސާއެއްގެ ރިޔާސަތު ބެލެހެއްޓެވުމަށް އުޒުރުވެރިވެއްޖެ ހާލަތެއްގައި އެޖަލްސާގެ ރިޔާސަތު ބަލަހައްޓާނެ މެމްބަރުން ގާނޫނު އަސާސީގެ 82 ވަނަ މާއްދާގެ ށ ގައިވާ ގޮތުގެ މަތިން މަޖިލީހުގެ ރައީސް ކަނޑައަޅަންވާނެއެވެ. މިގޮތުން ކަނޑައަޅާނީ މަޖިލީހުގައި މެދު ނުކެނޑި އެންމެ ގިނަ ދުވަހު ޚިދުމަތްކުރެއްވި މެމްބަރުންގެ ތެރެއިން 5 މެމްބަރެކެވެ. އަދި އެއިން މެމްބަރަކަށް ރިޔާސަތު ބެލެހެއްޓޭނީ ވިދިވިދިގެން ތިން ޖަލްސާގެ މުއްދަތަށެވެ.

ރޮޒައިނާ ވިދާޅުވީ ނަޝީދު އަމީން އާންމުއަށް ފޮނުއްވި ސިޓީއަކީ މަޖިލީހުގެ އުސޫލާ ޚިލާފަށް މަޖިލީހުގެ އިމްތިޔާޒަށް އަރައިގަންނަ ކަމެއްގެ ގޮތުގައި ކައުންސެލަރ ޖެނެރަލް ފާހަގަކުރެއްވިކަމަށެވެ.

ރޮޒައިނާ ވިދާޅުވީ އެކަންކަން ބަޔާކޮށް، ނަޝީދު މަޖިލީހަށް ފޮނުއްވާފައިވާ ސިޓީއަށް ކައުންސެލަރ ޖެނެރަލް ލިޔުުމުން ޖަވާބުދެއްވަން ޖެހޭނެ ކަމަށް އެމްޑީޕީން ދެކޭ ކަމަށް ފިލްޒާއަށް އަންގާފައިވާނެ ކަމަށެވެ.