މަރްޙޫމް އަބްދުﷲ ޖަމީލްގެ ހަނދާނުގައި މަޖިލީހުގައި ސުކޫތެއް
12 ޖޫން 2023 | ހޯމަ 04:35އެ މަނިކުފާނަށް ނިޝާން ޢިއްޒުއްދީނުގެ ޢިއްޒަތުގެ ވެރިކަމުގެ ލަޤަބް އަރުވައިފައި ވަނީ 10 ނޮވެންބަރު 2008ގައި
އަބްދުﷲ ޖަމީލުގެ ހަނދާނުގައި މަޖިލީހުގައި ސުކޫތެއް ގެނައުން
ނިޝާން ޢިއްޒުއްދީންގެ ޢިއްޒަތުގެ ވެރިކަމުގެ ލަޤަބް (ނ.ޢ.ޢ.ވ) އަރުވާފައިވާ، އަލްމަރްޙޫމް ޢަބްދުﷲ ޖަމީލުގެ ހަނދާނުގައި މަޖިލީހުގައި ސުކޫތެއް ބާއްވައިފިއެވެ.
ޖަމީލަކީ ރައްޔިތުންގެ މަޖިލީހާއި ޚާއްސަ މަޖިލީހުގައި ވެސް މުހިންމު މަސައްކަތްތަކެއް ކުރައްވާފައިވާ ބޭފުޅެކެވެ. އެގޮތުން އެމަނިކުފާނު ވަނީ މަޖިލީހުގައި މުހިންމު ދައުރެއް އަދާކުރައްވާފައެވެ. އެމަނިކުފާނު ވަނީ ރައްޔިތުންގެ މަޖިލީހުގެ ތ. އަތޮޅު މެންބަރުކަމުގައި 30 އަހަރަށްވުރެ ދިގު މުއްދަތެއްގައި ކުރައްވާފައެވެ. ހޯމަ ދުވަހުގެ ޖަލްސާގައި ރިޔާސަތު ބެލެހެއްޓެވި ވިލުފުށީ ދާއިރާގެ މެންބަރު ހަސަން އަފީފް ވަނީ މަރްޙޫމް އަބްދުﷲ ޖަމީލް މަޖިލީހުގައި ކުރައްވާފައިވާ ޚިދުމަތްތަކާއި ގުޅޭ މައުލޫމާތުތައް މެންބަރުންނާއި ޚިއްސާކުރައްވާފައެވެ.
އެމަނިކުފާނުގެ ހަނދާނުގައި މަޖިލީހުގައި ގެނެސްފައި ވަނީ 1 މިނިޓުގެ ސުކޫތެކެވެ.
މީގެ އިތުރުން ރައްޔިތުންގެ ޚާއްޞަ މަޖިލީހުގެ ތ. އަތޮޅު މެންބަރުކަމުގައި އެމަނިކުފާނު ވަނީ 14 އަހަރަށްވުރެ ގިނަދުވަހު ޚިދުމަތްކުރައްވާފައެވެ. މީގެ އިތުރުން ދައުލަތުގެ ގިނަ މަޤާމުތަކެއް އެމަނިކުފާނު ވަނީ ފުރުއްވާފައެވެ. އޭގެ ތެރޭގައި ވުޒާރާތަކާއި އިދާރާތަކުގެ އިސް މަޤާމުތައް ހިމެނެއެވެ. އެގޮތުން ކުރީގެ ރައީސް އިބްރާހިމް ނާޞިރުގެ ވެރިކަމާއި، ކުރީގެ ރައީސް މައުމޫން އަބްދުލް ޤައްޔޫމްގެ ވެރިކަމުގައި ވެސް އެމަނިކުފާނު ވަނީ ސަރުކާރުގެ އިސް މަޤާމުތައް އަދާކުރައްވާފައެވެ.
އަބްދުﷲ ޖަމީލަށް މިނިވަން 25ގެ ޢާންމު ޚިދުމަތުގެ އިނާމުވެސް ލިބިވަޑައިގެންފައެވެ. އަދި އެ މަނިކުފާނަށް ނިޝާން ޢިއްޒުއްދީނުގެ ޢިއްޒަތުގެ ވެރިކަމުގެ ލަޤަބް އަރުވައިފައި ވަނީ 10 ނޮވެންބަރު 2008 ގައެވެ.
