ސާފް ޗެމްޕިއަންޝިޕް ފުޓްބޯޅަ މުބާރާތުގައި ކުޅޭ ހުރިހާ ގައުމަކަށް ވެސް އިންޑިޔާ ސަރުކާރުން ވިސާ ހަމަޖައްސައިދީފިކަމަށް އޯލް އިންޑިޔާ ފުޓްބޯޅަ ފެޑަރޭޝަނުން ބުނެފި އެވެ.

މުބާރާތް ބާއްވާ ގައުމުގެ ހައިސިއްޔަތުން އިންޑިޔާ ފެޑަރޭޝަނުން މިހެން ބުނީ ބައެއް ގައުމުތަކަށް ވިސާ ލިބުމުގައި ހުރި ދަތިތައް ހައްލުކުރުމަށް ބޭއްވި ސާފް އެގްޒެކެޓިވް ކޮމިޓީގެ ކުއްލި ބައްދަލުވުމަކަށްފަހު އެވެ.

ނޫސްވެރިންނާ ވާހަކަ ދައްކަމުން އޭނާ މިހެން ވިދާޅުވީ ޕާކިސްތާނުގެ ގައުމީ ޓީމަށް މުބާރާތަށް އިންޑިޔާ އަށް އެތެރެވުމުގެ ހުއްދަ ނުލިބޭކަމަށް އެ ގައުމުން ތަކުރާރުކޮށް ބުނަމުންދަނިކޮށެވެ. އަދި ބަނގްލަދޭޝް އާއި ކުވޭތުން ވެސް ވިސާގެ ކަންބޮޑުވުން ފާޅުކުރާތީ އެވެ. ޕާކިސްތާނުން ވިސާގެ ކަންބޮޑުވުން ޕާކިސްތާނުން އުފައްދަން ފެށީ ސާފްގެ ބައްދަލުވުންތަކަށް ވެސް އެގައުމުގެ އޮފިޝަލުންނަށް އިންޑިޔާ އަށް އެތެރެނުވެވި އޮންލައިންކޮށް ބައިވެރިވާން ޖެހިފައިވާތީ އެވެ. ސިޔާސީ އަރައިރުންތަކުގެ ސަބަބުން އިންޑިޔާ އާއި ޕާކިސްތާނުގެ ގުޅުން ގޯސްވެ އެއްބަޔަކު އަނެއްބަޔަކަށް ޒިޔާރަތްކުރުން ވަނީ މަނާކޮށްފަ އެވެ.

ނަމަވެސް އަންވަރުލް ހައްގު ވިދާޅުވީ ޕާކިސްތާން ޓީމު އިންޑިޔާ އަށް އައުމަކީ މިހާރު އެގައުމުގެ އަމިއްލަ ކަމެކެއް ކަމަށެވެ.

ބެންގަލޫރުގައި މި މަހުގެ 21އިން ޖުލައި ހަރަތަކަށް ބާއްވާ މުބާރާތުގެ ފުރަތަމަ މެޗުގައި ވެސް ކުޅޭނީ އިންޑިޔާ އާއި ޕާކިސްތާނެވެ. މި ދެ ޓީމާއެކު އޭ ގްރޫޕުގައި ހިމެނެނީ ކުވޭތާއި ނޭޕާލެވެ. ގްރޫޕް ބީގައި ހިމެނެނީ ލެބަނަން އާއި ދިވެހިރާއްޖެ އަދި ބޫޓާނާއި ބަނގްލަދޭޝް އެވެ. މި ފަހަރުގެ މުބާރާތަކީ ސާފް ޗެމްޕިއަންޝިޕުގައި ސަރަހައްދުން ބޭރުގެ ޓީމުތައް ބައިވެރިކުރި ފުރަތަމަ ފަހަރެވެ. މި ގޮތަށް ހެދީ އިންޑިޔާއިން މުބާރާތުގެ ފެންވަރު މަތިކުރުމަށް ބާރު އެޅުމުގެ ސަބަބުންނެވެ. ސަރަހައްދީ ހަތް ގައުމުގެ ތެރެއިން މި ފަހަރުގެ މުބާރާތުގައި ނުކުޅެނީ ސްރީލަންކާ އެވެ. އެއީ ފީފާގެ ސަސްޕެންޝަނުގެ ސަބަބުންނެވެ.