ޕީއެސްޖީން ހެނާންޑޭޒް އަށް ފާރަލަނީ، ހިލޭ ދޫކޮށްލާކަށް ބަޔާނުން ބޭނުމެއް ނުވޭ

ޖަރުމަނުގެ ބަޔާން މިއުނިކަށް ކުޅެމުން އަންނަ ފްރާންސްގެ ޑިފެންޑަރު ލޫކަސް ހެނާންޑޭޒް ހޯދުމަށް ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ބޭނުންވި ނަމަވެސް، ހިލޭ އޭނާ ދޫކޮށްލަން ބަޔާނުން ބޭނުންނުވާ ކަމަށް ރިޕޯޓުތައް ބުނެފި އެވެ.

ސްޕެއިންގެ އެތުލެޓިކޯ މެޑްރިޑު ދޫކޮށް ހެނާންޑޭޒް ބަޔާނަށް ބަދަލުވީ 2019 ވަނަ އަހަރު އެވެ. އެ ކުލަބާއެކު އޭރު އޭނާ އެކުލަވާލީ ފަސް އަހަރުގެ އެއްބަސްވުމެކެވެ. އެ އެއްބަސްވުމުގައި ބާކީ އެއް އަހަރު އެބަ އޮތެވެ. ބަޔާނުން އޭރު ހެނާންޑޭޒްގެ ސޮއި ހޯދީ ޖަރުމަނު ލީގުގައި ރެކޯޑު އަގަކަށެވެ. އެއީ 80 މިލިއަން ޔޫރޯ އަށެވެ. އެ އެއްބަސްވުން އަންނަ އަހަރަށް ހަމަވާއިރު، ޕީއެސްޖީން އަންނަނީ ހެނާންޑޭޒް ހޯދުމަށް ފާރަލަމުން ކަމަށް ރިޕޯޓުތައް ބުނެ އެވެ. ނަމަވެސް ބަޔާނުން އޮތީ ހިލޭ އޭނާ ދޫކޮށްލަން ނޫން ކަމަށާއި، ނަމަވެސް އެކަމުގައި ބަޔާނަށް ވަކި ގޮތެއް ހޯދިފައި ނެޔް ކަމަށެވެ. ސަބަބަކީ ދާދި ފަހުން ބަޔާންގެ އިސްވެރިންނަށް ބަދަލު އައިސްފާތީ ކަމަށް ވެސް ވަނީ ބުނެފަ އެވެ. މި ސީޒަނުގައި ބަޔާނަށް އޭނާގެ އެއްބަސްވުން އައު ނުކުރެވިއްޖެ ނަމަ، ދެން ވިސްނާނީ ރަނގަޅު އަގެއްގައި އޭނާ ދޫކޮށްލަން ކަމަށް ވެސް ވަނީ ބުނެފަ އެވެ.

ހެނާންޑޭޒް ވަނީ މިހާތަނަށް ބަޔާނަށް ކުޅެދިން 107 މެޗުގައި ދެ ލަނޑު ޖަހައިފަ އެވެ. އެ ކުލަބާއެކު އޭނާ ވަނީ 10 ތައްޓެއް ކާމިޔާބުކޮށްފަ އެވެ. އެެއީ ޖަރުމަނު ލީގު، ޖަރުމަނު ކަޕް، ޖަރުމަނު ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް އެވެ.