ރަޝިއާގެ ޒެނިޓް އަށް ކުޅެމުންއައި ސްޕެއިންގެ ތަޖުރިބާކާރު ޑިފެންސިވް މިޑްފީލްޑަރ ޖަވި ގާސިއާ ހެނާންޑޭޒް ރެއާލް ބެޓިސްއަށް ސޮއިކޮށްފިއެވެ.

ގާސިއާ ރެއާލް ބެޓިސްއަށް ސޮއިކޮށްފައިވަނީ ތިންއަހަރުގެ އެއްބަސްވުމުގެ ދަށުންނެވެ. ތިިންއަހަރުގެ އެއްބަސްވުމެއްގައި ގާސިއާ ސޮއިކޮށްފައިވާއިރު އޭނާ ރެއާލް ބެޓިސްއަށް ސޮއިކުރި ފީއެއް ހާމަކޮށްފަައެއް ނުވެއެވެ.

ރެއާލް ބެޓިސްއަށް ސޮއިކުރުމަށްފަހު މީޑިއާއާ ވާހަކަދައްކަމުން ގާސިއާ ބުނީ ރެއާލް ބެޓިސްއަށް ބަދަލުވާން ފުރުސަތު ލިބުމުން އެކަމާ އުފާވާ ކަމަށާއި އެއީ އޭނާ ކުޅެން އެންމެ ބޭނުންވި ޓީމުކަމަށެވެ.

ރެއާލް ބެޓިސްއަކީ ދުނިޔޭގެ ނިސްބަތުން ވަރުގަދަ ޓީމެއް ކަމަށާއި އެޓީމަށް ބަދަލުވެވުމުން ދުނިޔޭގެ އެންމެ ވަރުގަދަ ކުލަބުތަކާއި ދެކޮޅަށް ކުޅުމުގެ ފުރުސަތު ލިބިގެންދާނެ ކަމަށްވެސް ގާސިއާ ބުންޏެވެ.

" މިވީ އަހަރެން ބޭނުންވި ގޮތް. ރެއާލް ބެޓިސްއަކީ އަހަރެން ކުޅެން ބޭނުންވި ޓީމު. އެޓީމާއެކު ކުޅެން ފުރުސަތު ލިބުމުން ވަރަށް ހިންހަމަ ޖެހިއްޖެ." ގާސިއާ ބުންޏެވެ.

ގާސިއާ އަކީ ދުނިޔޭގެ މަސްހޫރު ބޮޑެތި ގިނަ ކުލަބުތަކަކަށް ކުޅެފައިވާ ކުޅުންތެރިއެއްކަންވެސް ފާހަގަކޮށްލަންޖެހެއެވެ. އެގޮތުން އޭނާ ވަނީ ރެއާލް މެޑްރިޑު، މެންޗެސްޓާ ސިޓީ، ޕޯޓޯ ފަދަ ކުލަބުތަކަށް ކުޅެފައެވެ.

2014 ވަނަ އަހަރު މެންޗެސްޓާ ސިޓީން ޒެނިޓަށް ބަދަލުވި ގާސިއާ ވަނީ އެޓީމުގައި ހޭދަކުރި ތިން ސީޒަނުގައި 73 މެޗު ކުޅެދީ 6 ގޯލްވެސް ޖަހައިދީފައެވެ.