އަގުއެރޯ ހޯދުމަށް ޕީއެސްޖީން 60 މިލިއަން ޕައުންޑު ހުށަހަޅަނީ!

މެންޗެސްޓާ ސިޓީއަށް ކުޅެމުން އަންނަ އާޖެންޓީނާގެ ފޯވާޑް ސާޖިއޯ އަގުއެރޯ ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން 60 މިލިއަން ޕައުންޑު ހުށަހަޅަން އުޅޭ ކަމަށް ރިޕޯޓްތައް ބުނެފި އެވެ.

ދަ ޓައިމްސް އިން ބުނީ ޕީއެސްޖީން އަގުއެރޯ ހޯދުމަށް މަސައްކަތް ފަށާފައިވާ ކަމަށާއި، އެގޮތުން އެޓީމުން އޭނާ ހޯދުމަށް 60 މިލިއަން ޕައުންޑުވެސް ހުށަހަޅާފައިވާ ކަމަށެވެ.

ރިޕޯޓްތައް ބުނާގޮތުން އަގުއެރޯ އާއި ސިޓީގެ ކޯޗު ޕެޕް ގާޑިއޯލާއާ ދެމެދު އޮތް ގުޅުން ވަނީ ގޯސްވެފައެވެ. އެގޮތުން މި ޓްރާންސްފާ ބާޒާރުގައި އޭނާ ބޭނުންވަނީ ސިޓީ ދޫކޮށްލަންކަމަށްވެސް ރިޕޯޓްތައް ބުނެއެވެ.

ރިޕޯޓްތައް ބުނާގޮތުން ރެއާލް އިންވެސް ހޯދުމަށް މަސައްކަތްކުރަމުން އަންނަ އަގުއެރޯ ހޯދުމަށް ޗެލްސީން ވަނީ 75 މިލިއަން ޕައުންޑުގެ ބިޑެއް ހުށަހަޅާފައެވެ. އެހެންނަމަވެސް މި ރިޕޯޓްތަކާ ގުޅިގެން އަގުއެރޯ އަދި އެއްވެސް އެއްޗެކޭ ނުބުނެއެވެ.

މެންޗެސްޓަރ ސިޓީއާ 2006 ވަނަ އަހަރު ގުޅުނު އަގުއެރޯ ވަނީ އެ ކްލަބާ އެކު މިވީތަނަށް ހޭދަކުރި ހަ ސީޒަނުގައި ކުޅުނު 253 މެޗުގައި 169 ލަނޑު ކާމިޔާބުކޮށްފައެވެ.

މީގެއިތުރުން އޭނާ ވަނީ އެ ކްލަބާއެކު ޕްރިމިއާ ލީގު ދެފަހަރު ފުޓުބޯޅަ ލީގު ކަޕް ދެ އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ. އޭނާ ވަނީ އާޖެންޓީނާ ގައުމީ ޓީމަށްވެސް 80 އަށްވުރެ ގިނަ މެޗު ކުޅެދީ ކާމިޔާބީތަކެއް ހޯދާފައެވެ.

އެގޮތުން އޭނާ ވަނީ އެޓީމަށް އެކު 2008 ވަނަ އޮލިމްޕިކް ރަން މެޑަލް، ފީފާ 20 އަހަރުން ދަށުގެ ވާރލްޑްކަޕް ދެފަހަރު އަދި ވާރލްޑްކަޕްގެ ދެވަނަ އެއްފަހަރު ހޯދާފައެވެ.