ސަންޗޭޒް ހޯދުމަށް ޕީއެސްޖީން 80 މިލިއަން ޕައުންޑު ހުށަހަޅަން ތައްޔާރުވެއްޖެ

އާސެނަލް އަށް ކުޅެމުން އަންނަ އެލެކްސަސް ސަންޗޭޒް ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން 80 މިލިއަން ޕައުންޑު ހުށަހެޅުމަށް ތައްޔާރުވެއްޖެ ކަމަށް ރިޕޯޓްތައް ބުނެފި އެވެ.

މަޝްހޫރު ކުޅިވަރު ނޫހެއް ކަމަށްވާ ދަ ސަން އިން ބުނީ ސަންޗޭޒް އަށް ޕީއެސްޖީން ޝައުގުވެރިވާ ކަމަށާއި، އެގޮތުން އޭނާ ހޯދުމަށް 80 މިލިއަން ޕައުންޑުގެ ހުށަހެޅުމެއް އެ ކްލަބުން ތައްޔާރު ކުރަމުން އަންނަކަމަށެވެ.

ޕީއެސްޖީގެ އިތުރުން ސަންޗޭޒް ހޯދުމަށް މެންޗެސްޓާ ސިޓީން ވެސް އަންނަނީ މަސައްކަތް ކުރަމުންނެވެ. ރިޕޯޓްތައް ބުނާގޮތުން ސަންޗޭޒް ބޭނުން ވަނީ އޭނާގެ ކުރީގެ ކޯޗު ޕެޕް ގާޑިއޯލާގެ އިރުޝާދުގެ ދަށުން ސިޓީއަށް ކުޅޭށެވެ.

އާސެނަލްގައި އަންނަ އަހަރުގެ ޖޫން މަހާ ހިސާބަށް ސަންޗޭޒް މަޑުކުރަން ސަންޗޭޒް އެއްބަސްވެފައިވާއިރު، އެ އެއްބަސްވުން އިތުރުކުރަން އާސެނަލް އިން އަންނަނީ މަސައްކަތް ކުރަމުންނެވެ. އެގޮތުން ވަރަށް އަވަހަށް އެއްބަސްވުމާ މެދު ގޮތެއް ނިމޭނެކަމަށް އެ ކްލަބުގެ ކޯޗު އާސެން ވެންގާވެސް ވަނީ ބުނެފައެވެ.

ކޮޕާ އެމެރިކާ ފުޓުބޯޅަ މުބާރާތަށް ފަހު ސަންޗޭޒް އާސެނަލްގެ ފަރިތަކުރުންތަކާ ގުޅިފައިވަނީ މި މަހުގެ ދެވަނަ ދުވަހެވެ.

މީގެ ކުރިން ބާސާ އަށް ވެސް ކުޅެފައިވާ ސަންޗޭޒް އާސެނަލްގައި މޮޅު ކުޅުމެއް ފުރަތަމަ ސީޒަންގައި ދެއްކި ނަމަވެސް އަނިޔާގައި ހުރުމާ އެކު އެ ކްލަބާ އެކު ހޭދަކުރި ދެވަނަ ސީޒަނުގައި އެދެވޭ ކުޅުމެއް ވަނީ ދެއްކޭ ގޮތް ނުވެފައެވެ. އެހެން ނަމަވެސް އޭނާ ވަނީ މި ސީޒަނުގައި އާސެނަލްގައި މޮޅު ކުޅުމެއް ދައްކާފައެވެ. އެގޮތުން ކުޅުނު 54 މެޗުގައި އޭނާ ވަނީ 21 ލަނޑު ކާމިޔާބު ކޮށްފައެވެ. ބާސާގައި ހޭދަކުރި ތިން ސީޒަނުގައި އެ ކްލަބަށް ކުޅުނު 141 މެޗުގައި 47 ލަނޑު ކާމިޔާބު ކޮށްފައިވާ ސަންޗޭޒް ވަނީ މިހާތަނަށް އާސެނަލް އަށް ކުޅުނު 145 މެޗުގައި 72 ލަނޑު ކާމިޔާބު ކޮށްފަ އެވެ.