ސީޝެލްސްގެ ރައީސްގެ ދެކަނބަލުން މާދަމާ ރާއްޖެވަޑައިގަންނަވަނީ
10 ޖޫން 2023 | ހޮނިހިރު 06:00އެއަރޕޯޓުގެ ބައެއް ސަރަހައްދުތައް މާދަމާ 2:00ން 4:00ށް ބަންދުވާނެ
ސީޝެލްސްގެ ރައީސް، ރައީސް އިބްރާހީމް މުހައްމަދު ސާލިހާ މީގެކުރިން ބައްދަލުކުރައްވަނީ
ސީޝެލްސްގެ ރައީސް ވޭވެލް ރާމްކަލާވަންއާއި އެމަނިކުފާނުގެ އަނބިކަނބަލުން ލިންޑާ ރާމްކަލާވާން ރަސްމީ ދަތުރުފުޅެއްގައި މާދަމާ ރާއްޖެ ވަޑައިގަންނަވަން ހަމަޖެހިއްޖެއެވެ.
ރައީސް އޮފީހުން މިއަދު ބުނީ ސީޝެލްސްގެ ރައީސްގެ ދެ ކަނބަލުން ރާއްޖެ ޒިޔާރަތްކުރެއްވުމަށް ހަމަޖެހިފައިވަނީ މި މަހުގެ 11-14އަށް ކަމަށެވެ. މިއީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ދައުވަތަކަށް އެ ދެކަނބަލުން ކުރައްވާ ދަތުރުފުޅެއް ކަމަށްވެސް ރައީސް އޮފީހުން ބުނެއެވެ.
މި ދަތުރުފުޅުގައި ރާއްޖެއާ ސީޝެލްސްއާ ދެމެދު ރަސްމީ މަޝްވަރާތައްކުރުމަށް ހަމަޖެހިފައިވާކަމަށާއި، ދެ ގައުމުގެ ދެމެދުގައި އެއްބަސްވުންތަކުގައި ސޮއިކުރުންވެސް ކުރިއަށްދާނެކަމަށް ރައީސް އޮފީހުން ބުނެއެވެ.
ސީޝެލްސްގެ ރައީސްގެ ދެކަނބަލުން ރާއްޖެ ވަޑައިގަންނަވާތީ މާދަމާއާއި މި މަހުގެ 14 ވަނަ ދުވަހު އެއަރޕޯޓުގެ ބައެއް ސަރަހައްދުތައް ބަންދުވާނެއެވެ. އެގޮތުން، މާދަމާ މެންދުރު 2:00ން ހަވީރު 4:00ށް އިންޓަރނޭޝަނަލް ޓަރމިނަލުގެ އުތުރު ކަނުން ފެށިގެން ޑޮމެސްޓިކް ޓަރމިނަލާ ހަމައަށް މަގު ބަންދުވާނެއެވެ. އަދި ހަމަ އެވަގުތު ކަނޑު އުޅަނދުތަކަށް އެއަރޕޯޓަށް ވަދެވޭނީ އިންޓަރނޭޝަނަލް ޓަރމިނަލާ ދިމާއިން އޮންނަ ނެރުންނެވެ. މި މަހުގެ 14 ވަނަ ދުވަހުގެ ހަވީރު 5:00ން 6:00ށް ވެސް މިގޮތަށް އަމަލުކުރާނެ ކަމަށް އެމްއޭސީއެލުން ބުންޏެވެ.
އެމްއޭސީއެލުން ވަނީ މަގު ބަންދުކުރުމަށް ހަމަޖެހިފައިވާ ވަގުތު، ޑޮމެސްޓިކް ދަތުރުކުރާ ފަރާތްތަކުން އެ ވަގުތުގެ ކުރިން ޗެކިންގގެ ކަންކަން ނިންމުމަށް އިލްތިމާސްކޮށްފައެވެ.
