އިޖްތިމާއީ މައްސަލަތައް ހައްލުކުރުމަށް އެ މުޖުތަމައެއްގެ ތެރެއިން މަސައްކަތް ކުރަންޖެހޭ: ރައީސް ސާލިހު
މި ރާއްޖޭގެ ހުރިހާ ކަންކޮޅެއްގައި އިޖްތިމާއީ އެތައް މައްސަލަތަކެއް އެބަހުރި
ރައީސުލްޖުމްހޫރިއްޔާ، އިބްރާހީމް މުހައްމަދު ސާލިހު ވާހަކަފުޅުދައްކަވަނީ
އިޖްތިމާއީ މައްސަލަތަކަށް ހަރުކަށި އަދަބު ދީގެން ނުހުއްޓުވޭނެ ކަމަށާއި، މައްސަލަތައް އުފެދުމަށް މެދުވެރިވާ ސަބަބުތަކުން މީހުން ދުރުކުރުމަށް އެ މުޖްތަމައެއްގެ ތެރެއިން މަސައްކަތް ކުރަންޖެހޭކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ ސިވިލް ސޮސައިޓީ އެވޯޑް ދިނުމުގެ ޖަލްސާގައި ވާހަކަފުޅުދައްކަވަމުންނެވެ.
ރައީސް ސާލިހު ވިދާޅުވީ، މި ރާއްޖޭގެ ހުރިހާ ކަންކޮޅެއްގައި އިޖްތިމާއީ އެތައް މައްސަލަތަކެއް އެބަހުރިކަމަށާއި، އެކި އަތޮޅުތަކުގައާއި އެކި ރަށްރަށުގައި އެފަދަ މައްސަލަތައް ހުރި މިންވަރު ތަފާތުކަމަށެވެ. އަދި ހުރި މައްސަލަތަކާއި އޭގެ ބާވަތްވެސް ތަފާތުކަމަށާއި، ބައެއް ރަށްރަށުގައި ވައްކަމުގެ މައްސަލަތައް އެބަހުރިކަމަށް ރައީސް ވިދާޅުވިއެވެ. އެހެންނަމަވެސް ބައެއް ރަށްރަށުގައި ވައްކަމުގެ މައްސަލަތައް ނުވެސް ނެތޭ ބުނެވޭހާ މަދުކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ ގޭންގު ކުށްތަކަކީވެސް ހައްލުކުރަންޖެހިފައިވާ އިޖްތިމާއީ ބޮޑު މައްސަލައެއް ކަމަށާއި، މަސްތުވާތަކެތީގެ މައްސަލައަކީވެސް މުޅި ރާއްޖެއަށް ފެތުރިފައި އޮތް ވަރަށް ބޮޑު މައްސަލައެއް ކަމަށެވެ. އެކި އަތޮޅުތަކާއި އެކި ރަށްރަށުގައި އެކަން އޮތީ އެކި މިންވަރަށް ކަމަށާއި، މަސްތުވާތަކެތީގެ މައްސަލަތައް ހައްލުވަމުން ދާވަރަކަށް، އިޖްތިމާއީ ވަރަށް ގިނަ މައްސަލަތައް ހައްލުވާނެކަމަށް ރައީސް ވިދާޅުވިއެވެ.
ރައީސް ސާލިހު ވިދާޅުވީ މި އިޖްތިމާއީ މައްސަލަތައް ހަރުކަށި އަދަބު ދީގެން ނުހުއްޓުވޭނެކަމަށާއި، މިފަދަ މައްސަލަތަކަށް އޮތް އެންމެ މުޖައްރިބު ފަރުވާއަކީ، އެފަދަ މައްސަލަތައް އުފެދުމަށް މެދުވެރިވާ ސަބަބުތަކުން މީހުން ދުރުކުރުމަށް އެ މުޖްތަމައެއްގެ ތެރެއިން މަސައްކަތްކުރުން ކަމަށެވެ.
މީގެ އިތުރުން ރައީސް ވިދާޅުވީ، އާއިލީ މައްސަލައާއި އަންހެނުންނާއި ކުޑަކުދިންނަށް ގޯނާ ކުރުމުގެ މައްސަލަތައްވެސް އެކި ރަށްރަށުގައި އެކި ވަރު ކަމަށާއި، އެފަދަ މައްސަލަތައް ފަސޭހައިން ހުށަހެޅޭނެ އިތުބާރުހުރި ނިޒާމެއް ގާއިމްކޮށްފައިވާ ކަމަށެވެ. އެ ނިޒާމުގެ ތެރެއިން ހުށަހެޅިފައި ހުރި މައްސަލަތަކަށް ބެލުމުން، މުޖްތަމައުގައި އެކަން ފެތުރިފައި އޮތް މިންވަރު ތަސައްވަރުކުރެވޭކަމަށް އެމަނިކުފާނު ވިދާޅުވިއެވެ. އަދި ވިދާޅުވީ އެ މައްސަލަތައް މެދުވެރިވާ ސަބަބުތައް ނައްތާލައި، އެ ފަދަ މައްސަލަތައް ހައްލުކުރަން ރައްޔިތުން ބޭނުންވެފައި ތިބި މިންވަރު ވެސް ވަޒަން ކުރެވޭ ކަމަށެވެ.
ރައީސް ވިދާޅުވީ އިޖްތިމާއީ މައްސަލަތައް ހައްލުކުރުމުގައި ލާމަރުކަޒީ އުސޫލުން މަސައްކަތްކުރުމުން ނަތީޖާ ހާސިލުކުރުން ފަސޭހަވާނެ ކަމަށެވެ. މިކަމުގައި ރަށްރަށުގެ މަދަނީ ޖަމްއިއްޔާތަކުން އިސްނެގުމުން ނަތީޖާ ނެރުމަށް ފަސޭހަވާނެކަމަށް ރައީސް ވިދާޅުވިއެވެ. އަދި ވިދާޅުވީ އެ ރަށެއްގައި ހުރި އިޖްތިމާއީ މައްސަލަތަކާ ދެކޮޅަށް، އެ ރަށެއްގެ ޖަމްއިއްޔާތައް ތެދުވުމަކީ މިހާރުން މިހާރަށްވެސް ވަރަށް ބޭނުންތެރި ކަމެއް ކަމަށެވެ.
އެކި ދާއިރާތަކުން ޚިދުމަތްދޭ ގިނަ ޖަމްއިއްޔާތައް މާލެއާއި އެކި ރަށްރަށުގައި ހިންގާކަން ފާހަގަކުރައްވައި ރައީސް ވިދާޅުވީ، އެ ރަށެއްގައި ހުރި އިޖްތިމާއީ މައްސަލަތައް ހައްލުކުރުމަށް މަސައްކަތްކުރުމަކީ އެ ރަށެއްގެ މަދަނީ ޖަމްއިއްޔާތަކުގެ މަގުސަދުތަކުގެތެރޭގައި ހިމެނުން މުހިންމު ކަމެއްކަމަށެވެ.
ރައީސް ސާލިހު ވިދާޅުވީ އިގްތިސާދީ ތަރައްގީއާއި، ސިއްހީ ދާއިރާގެ ހެޔޮ ބަދަލުތަކާއި، ތައުލީމީގޮތުން އަންނަ ކުރިއެރުންތަކުން ހަގީގީ އުފާވެރިކަމެއް ހާސިލުވާނީ އިޖްތިމާއީ މައްސަލަތައް ހައްލުވެގެން ކަމަށެވެ. އަދި ދިވެހި ރައްޔިތުން އުޅެން ބޭނުންވާ އުފާވެރި ދިރިއުޅުމާއި ދެކެން ބޭނުންވާ ސުލްހަވެރި ވެށި، އަދި ފާޅުކުރަން ބޭނުންވާ ހިނިތުންވުން ގުޅިފައިވަނީ މައްސަލަތަކާ ކަމަށް ރައީސް ވިދާޅުވިއެވެ.
އެހެންކަމުން އިޖްތިމާއީ މައްސަލަތައް ހައްލުކުރުމުގައި މަދަނީ ޖަމްއިއްޔާތަކުގެ ދައުރު ފުޅާކޮށް، އެކަމާމެދު ރާއްޖޭގެ ހުރިހައި ޖަމްއިއްޔާތަކުން ވިސްނައި ފިޔަވަޅު އަޅާނެކަމަށް އުންމީދު ކުރައްވާ ކަމަށް ރައީސް ވިދާޅުވިއެވެ.
