ޚާއްސަ އެހީއަށް ބޭނުންވާ މީހަކާއެކު ޖިންސީ އަމަލު ހިންގުމުން 15 އަހަރަށް ޖަލަށް
މިއީ ދެކުނުގެ އަތޮޅެއްގައި ހިނގި ޙާދިސާއެއް
ކްރިމިނަލް ކޯޓް
ޚާއްސަ އެހީއަށް ބޭނުންވާ މީހަކާއެކު ޖިންސީ އަމަލު ހިންގި މައްސަަލައެއް ސާބިތުވެ، އޭނާ 15 އަހަރަށް ޖަލަށް ލާން ކްރިމިނަލް ކޯޓުން ޙުކުމްކޮށްފިއެވެ.
ދެކުނުގެ އަތޮޅެއްގައި ހިނގި މި ޙާދިސާގައި އުފުލާފައިވަނީ ވިސްނުމުގެ ބާރު ކެނޑިފައިވާ، ނުވަތަ ހަމަ ބުއްދި ގެއްލިފައިވާ، ނުވަތަ ޖިސްމާނީ ގޮތުން އަމިއްލައަށް ދިފާޢުވުމުގެ ބާރެއް ނެތް މީހެއްގެ މައްޗަށް ވެރިވެގަނެ އޭނާއާއެކު ޖިންސީ ޢަމަލު ހިންގުމުގެ ކުށުގެ ދަޢުވާއެވެ.
މި މައްސަލައިގައި ތުހުމަތު ކުރެވޭ ފަރާތުގެ މައްޗަށް އުފުލި މި ދަޢުވާއަށް އޭނާ ވަނީ އިންކާރުކޮށްފައެވެ. ވުމާއެކު މި މައްސަލައިގެ ޝަރީއަތް ކުރިއަށް ގެންގޮސް، އަންގާރަ ދުވަހު ވަނީ މި މައްސަލައިގެ ޙުކުމް ކޮށްފައެވެ.
ކްރިމިނަލް ކޯޓުން ކުރި ޙުކުމުގައި ވަނީ ޤާނޫނު ނަންބަރު: 17/2014 (ޖިންސީ ކުށުގެ ގާނޫނު) ގެ 38 ވަނަ މާއްދާގެ (ހ) އާ ޙަވާލާދީ، އެމާއްދާގެ (ށ) ގެ ދަށުން، އޭނާގެ މައްޗަށް ވިސްނުމުގެ ބާރު ކެނޑިފައިވާ ނުވަތަ ހަމަ ބުއްދި ގެއްލިފައިވާ ނުވަތަ ޖިސްމާނީ ގޮތުން އަމިއްލައަށް ދިފާޢުވުމުގެ ބާރެއް ނެތް މީހެއްގެ މައްޗަށް ވެރިވެގަނެ އޭނާއާއެކު ޖިންސީ ޢަމަލު ހިންގުމުގެ ކުށުން ކުށްވެރި ވެއްޖެކަމަށް ކަނޑައަޅާފައެވެ.
މި ކުށުގެ ޢުޤޫބާތެއްގެ ގޮތުން، އޭނާ 15 (ފަނަރަ) އަހަރަށް ޖަލަށް ލުމަށް ޙުކުމްކޮށްފައިވެއެވެ.
ކްރިމިނަލް ކޯޓުގައި މި ޤަޟިއްޔާ ބައްލަވައި ނިޔާ ކަނޑައެޅުއްވީ ޤާޟީ އަލްއުސްތާޛު އިބްރާހީމް އިޙްސާންއެވެ.
