ލި-ނިންގް މޯލްޑިވްސް އިންޓަރނޭޝަނަލް ޗެލެންޖް ފަށައިފި

ރާއްޖޭގައި މިއަހަރު ބާއްވާ ހަތަރުވަނަ އިންޓަނޭޝަނަލް މުބާރާތް، ލި-ނިންގް މޯލްޑިވްސް އިންޓަރނޭޝަނަލް ޗެލެންޖް ފަށައިފިއެވެ.

33 ގައުމަކުން 303 ކުޅުންތެރިން ބައިވެރިވި މި މުބާރާތުގެ ކުޅުން ހޯމަ ދުވަހު ފެށިއިރު، ފުރަތަމަ ކުޅެފައިވަނީ ސިންގަލްސް އިވެންޓުގެ މެޗުތަކެވެ. ފިރިހެން ޑިވިޝަނުގައި ކޮލިފިކޭޝަން މެޗުތައް ކުޅުނުއިރު، އަންހެން ޑިވިޝަނުގައި ކުޅުނީ ފުރަތަމަ ރައުންޑުގެ މެޗުތަކެވެ.

އަންހެން ޑިވިޝަނުގެ ފުރަތަމަ ރައުންޑުން ރާއްޖޭގެ ނަބީހާއާއި ޝުބާ ވަނީ މޮޅުވެފައެވެ. ނަބީހާ މޮޅުވެފައިވަނީ އިންޑިއާގެ އަކްޝަޔާ އަރުމުގަމްއާ ބައްދަލުކޮށް 2-0ގެ ނަތީޖާއަކުންނެވެ. ފުރަތަމަ ސެޓު 21-13އިން ކާމިޔާބުކޮށްފައިވާއިރު، ދެވަނަ ސެޓު ނިމުނީ 21-14އިންނެވެ. އިންޑިއާގެ ވިޖޭތާ ހާރިޝް މެޗު ދޫކޮށްލުމުން، ނަބީހާއާއެކު ރާއްޖޭގެ ޝުބާވެސް ވަނީ ދެވަނަ ބުރަށް ދަތުރުކޮށްފައެވެ. އަންހެން ސިންގަލްސްގެ ފުރަތަމަ ބުރުގައި ރާއްޖޭގެ ޝަހުރުނާޒް، ނީލާ، އަދި ނަބާހާއަށް މޮޅުވެވޭ ގޮތެއް ނުވިއެވެ.

ފިރިހެން ޑިވިޝަނުގެ ސިންގަލްސް ކޮލިފިކޭޝަނުން ރާއްޖޭގެ ރިޝްވާން ވަނީ މޮޅުވެފައެވެ. އޭނާ މޮޅުވެފައިވަނީ ލަންކާގެ ޗަމަތު ޑިއާސްއާ ބައްދަލުކޮށް 2-0ގެ ނަތީޖާއަކުންނެވެ. ރިޝްވާން ސެޓުތައް ކާމިޔާބުކޮށްފައިވަނީ 21-19 އަދި 21-11އިންނެވެ. ރާއްޖޭގެ ސާލިމް، މާއިލު، އަޒްހަރު އަދި ތާއިފް ކޮލިފިކޭޝަނުން ބަލިވެ، މެއިން ޑްރޯއާ ހަމައަށް ދެވޭގޮތެއް ނުވިއެވެ.

މި މުބާރާތުގައި ޖުމްލަ ފަސް އިވެންޓެއް ކުރިޔަށްދާނެއެވެ. މުބާރާތް ނިމުމަށް ހަމަޖެހިފައިވަނީ މި މަހުގެ 10 ވަނަ ދުވަހުއެވެ.