މި ސަރުކާރުން ތަރައްްގީނުކުރާކަމަށް ބުނެ ދައްކަމުންދަނީ ފިތުނައިގެ ވާހަކަތައްކަމަށް އަސްލަމް ވިދާޅުވި
މެމްބަރު އަސްލަމް
ގަމަކީ ރާއްޖޭގެ މުގޫކަމަށާއި ރާއްޖެ ތަރައްގީކުރެވޭނީ ގަން ތަރައްގީކޮށްގެން ކަމަށް، އައްޑޫ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
އައްޑޫގެ އިންޓަރނޭޝަނަލް އެއާޕޯޓުގެ މަސައްކަތް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން އަސްލަމް ވިދާޅުވީ، އައްޑޫ ގަމަކީ އައްޑޫގެ އިގްތިސާދުގެ މައި ތަނބު ކަމަށެވެ. ގަމަކީ ރާއްޖޭގެ މުގޫކަމަށް ސިފަކުރައްވަމުން އޭނާ ވިދާޅުވީ، ގަމަކީ އައްޑޫގައި އެންމެ ފެން ހެޔޮ އަދި މުޑުވައް ރަނގަޅު ރަށްކަމަށެވެ. އެއީ އިނގިރޭސީން ރާއްޖޭގައި ގާއިމްވެ ތިބުމުގެ މާ ކުރީއްސުރެ މުހިންމު ތަނެއް ކަމަށް އަސްލަމް ވަނީ ވިދާޅުވެފައެވެ. ރާއްޖޭގެ އެންމެ ދެކުނުގައި އޮތް ގަމަކީ ރާއްޖެ ތަރައްގީކުރަން ބޭނުންނަމަ ކޮންމެހެންވެސް ތަރައްގީކުރަން ޖެހޭ ތަނެއްކަމަށެވެ.
އިނގިރޭސީން ރާއްޖެއިން ފޭބިއިރު އެތަނުގައި ގިނަ ވަސީލަތްތަކެއް ހުރިނަމަވެސް އެތަކެތި ގަމުން ބޭރުކޮށް އެހެން ތަންތަނަށް ގެންގޮސްފައިވާކަަމަށް އަސްލަމް ވިދާޅުވިއެވެ. އަސްލަމް ވިދާޅުވީ އޭރުގެ ސަރުކާރުންވެސް ގަން ތަރައްގީކުރުމަށް މަސައްކަތް ނުކުރާކަމަށް އަސްލަމް ވިދާޅުވިއެވެ. އޭނާ ވިދާޅުވީ އައްޑޫ ތަރައްގީކުރެވޭނީ ވަށައިޖެހޭގޮތަށް އެކަން ކޮށްގެން ކަމަށެވެ. އެގޮތުން އެއާޕޯޓް ނިމުމާއެކު ޓޫރިސްޓް އެނދުތައް ތަރައްގީކުރުން މުހިންމުކަމަށް އަސްލަމް ވިދާޅުވިއެވެ. މި ސަރުކާރުން ކަންކަން ހިންގަނީ ރަނގަޅު އިންތިޒާމްތަކުގެ ތެރެއިން ކަމަށް އަސްލަމް ވަނީ ވިދާޅުވެފައެވެ.
ގަން މިހާތަނަަށް ހިންގާފައިވަނީ އައްޑޫގެ ރައްޔިތުން ކަމަށްވެސް އަސްލަމް ވިދާޅުވިއެވެ. މީގެ އިތުރުން އަސްލަމް ވިދާޅުވީ ކުރީގެ ވެރިކަންތަކުގައި އައްޑޫގައި ފަތުރުވެރިކަމަށް ރަށްތައް ދޫކޮށްފައިވަނީ ވަރަށް ކުޑަ އަގެއްގައި ކަމަށެވެ. އެހެންނަމަވެސް މިއަދު އައްޑޫއަށް އިންވެސްޓުކުރަން ބޭނުންވާ ފަރާތްތަކަށް އެ ފުރުސަތު މިއަދު ހުޅުވާލާފައިވާކަމަށް އަސްލަމް ވިދާޅުވިއެވެ. ހަންކެޑެ މަޝްރޫއާއި އެނޫން މަޝްރޫއުތައްވެސް ސަރުކާރުން ހިންގަމުންދަނީ އައްޑޫގެ ތަރައްްގީއަށް ވިސްނައިގެން ކަަމަށް އަސްލަމް ވިދާޅުވިއެވެ. އެހެންކަމުން މި ސަރުކާރުން ތަރައްްގީނުކުރާ ކަމަށް ބުނެ ދައްކަމުންދަނީ ފިތުނައިގެ ވާހަކަތައްކަމަށް އަސްލަމް ވިދާޅުވިއެވެ.
އާދިއްތަ ދުވަހު ގަން ބައިނަލްއަގުވާމީ ވައިގެ ބަނދަރު އިފްތިތާހުކޮށްދެއްވީ ރައީސް އިބްރާހީމް މުހައްމަދު ސާލިހާއި އިންޑިއާގެ އެކްސްޓަރނަލް އެފެއަރޒް މިނިސްޓަރު، ވީ މުރަލީ ދަރަންއެވެ.
