އެމްޑީޕީ މެޖޯރިޓީ އޮވެ ރައީސް މުއިއްޒަށް މަޖިލީހުން އެއްބާރުލުން ނުދިނީ ކޮންކަމެއްގައިތޯ :އަސްލަމް

19 ވަނަ ރައްޔިތުންގެ މަޖިލީހުގައި އެމްޑީޕީ މެޖޯރިޓީ އޮވެ މިހާރުގެ ސަރުކާރާއި ރައީސުލްޖުމްހޫރިއްޔާ ޑރ މުހައްމަދު މުއިއްޒަށް އެއްބާރުލުން ނުދިނީ ކޮންކަމެއްގައިތޯ މަޖިލީހުގެ ރައީސް އަދި ހިތަދޫ އުތުރު ދާއިރާގެ މެމްބަރ މުހައްމަދު އަސްލަމް ސުވާލުކުރައްވައިފިއެވެ.

ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގެ ކެމްޕެއިންގައި އެންމެ ބޮޑަށް ރައީސް މުއިއްޒު ފާހަގަކުރައްވާ ކަމަކީ މަޖިލީހުން އެއްބާރުލުން ނުލިބޭކަމަށާއި އެކަމުގެ ސަބަބުން ކަންކަންނުވާކަމަށެވެ. އެކަމަށް ރައްދު ދެއްވާ ވާހަކަދައްކަވަމުން އައްޑޫ ސިޓީގައި ހުކުރު ދުވަހުގެ ރޭ ކުރިޔަށްދިޔަ މިސްރާބު ހަމަމަގަށް ކެމްޕެއިން ޖަލްސާގައި ވާހަކަދައްކަވަމުން އަސްލަމް ވަނީ އެމްޑީޕީ މެޖޯރިޓީ އޮވެ ރައީސް މުއިއްޒަށް މަޖިލީހުގެ ތެރެއިން ނުވަނީ ކޮންކަމެއްގައިތޯ ސުވާލުކުރައްވާފައެވެ. ސަރުކާރުން ބޭނުންވި ގޮތަށް ކަންކަން ކޮށްދީފައިވާކަމަށާއި ބަޖެޓް ފާސްކޮށްދީފައިވާކަމަށާއި 22 ވަޒީރުންގެ ތެރެއިން 3 ވަޒީރުން ނޫން ހުރިހާ ވަޒީރުންނަށް ރުހުން ދީފައިވާކަމަށް އަސްލަމް ވިދާޅުވިއެވެ.

މީގެއިތުރުން މަޖިލިސް ޗުއްޓީއަށް ނުގޮސް ދިގުދަންމާލާ ސަރުކާރުން ބޭނުންވިކަންކަން ކޮށްދީފައިވާކަމަށާއި ރައީސް މުއިއްޒު ބޭނުންފުޅުވި ގޮތަށް ހުވާކުރުމުގެ ރަސްމިއްޔާތުވެސް ބާއްވާދީފައިވާކަމަށެވެ.

މީގެއިތުރުން މިއަހަރަށް މަޖިލިސް ހުޅުވަން ބޭއްވި ޖަލްސާ އެމްޑީޕީގެ މެމްބަރުން ބޮއިކޮޓް ކުރުމާއެކުވެސް ރައީސް މުއިއްޒު ބޭނުންފުޅުވި ގޮތަށް މަޖިލީހުގެ ރައީސްގެ ހައިސިއްޔަތުން ކަންކަން ކުރެއްވިކަމަށެވެ.

އަސްލަމް އިތުރަށް ވިދާޅުވީ އެމްޑީޕީގެ މެޖޯރިޓީ އޮތް 19 ވަނަ ރައްޔިތުންގެ މަޖިލީހަކީ ރައްޔިތުންނަށް ބޭނުންވާ މުހިންމު ޤާނޫނުތަކެއް ފާސްކޮށްދީފައިވާ މަޖިލީހެއްކަމަށެވެ. މިހާރު އަމަލުކުރަމުން އަންނަ ޤާނޫނުތަކުގެ 30 އިންސައްތަ ގާނޫނު ފާސްކޮށްފައިވަނީ އެމްޑީޕީގެ މެޖޯރިޓީ އޮތް 19 ވަނަ ރައްޔިތުންގެ މަޖިލީހުން ކަމަށެވެ.

އަސްލަމް ވިދާޅުވީ ރައްޔިތުންގެ ކަންބޮޑުވުން ހުރި ބޮޑެތި މައްސަލަތަކަށް ހައްލު ހޯދައިދިނީ 19 ވަނަ ރައްޔިތުންގެ މަޖިލީހުންކަމަށެވެ. އެގޮތުން އިންކަމް ޓެކްސް އާއި މިނިމަމް ވޭޖު ނެގުމުގެ ކަންކަން ކޮށްފައިވަނީ ރައީސް އިބްރާހީމް މުހައްމަދު ޞާލިހުގެ ވެރިކަމުގައިކަމަށެވެ. އެކަންކަން ކޮށްފައިވަނީ މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި ކަމަށެވެ.

މަޖިލީހަކީ އޭރެއްގައި އޮންނަ ސަރުކާރަކުން ބޭނުންހާ ގޮތަކަށް ކަންކަންކުރަން އޮންނަ ތަނެއް ނޫންކަމަށް އަސްލަމް ވިދާޅުވިއެވެ.