މަޖިލީސް މެންބަރުންގެ ދަތްދޮޅި ދުއްވާލާނެކަމުގެ އިންޒާރު ދިނުމުން އަރައިގަނެވުނީ މަޖިލީހުގެ އިމްތިޔާޒަށް ކަމަށާ، މަޖިލީހުގެ އިމްތިޔާޒު ކޮމިޓީއަށް މައްސަލަ ހުށަހަޅާނެކަމަށް ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.
އަސްލަމް މިފަދައިން ވިދާޅުވެފައިވަނީ، މިހާރު ރާއްޖޭގެ ރަށްތަކަށް ރައީސް ޑރ. މުޙައްމަދު މުއިއްޒު ކުރައްވަމުން ގެންދަވާ ދަތުރުފުޅުގައި ބުދަ ދުވަހު މ. ދިއްގަރަށް ވަޑައިގެން، އެރަށު ރައްޔިތުންނާ ބައްދަލު ކުރެއްވުމަށް ބޭއްވި ޖަލްސާގައި ލޯކަލް ގަވަމަންޓު މިނިސްޓަރު އާދަމް ޝަރީފް ދެއްކެވި ވާހަކަފުޅާ ގުޅިގެންނެވެ.
މިނިސްޓަރު ޝަރީފް ވަނީ މަޖިލިސް މެންބަރެއްގެ ގޮތުގައި މިއަދުވެސް ހުންނެވިނަމަ މަޖިލިސް މެންބަރެއްގެ "ދަތްދޮޅި ދުއްވާނުލާ" ހުރެވިދާނެތޯ ސުވާލު އުފައްދަވާފައެވެ.
މިކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން އަސްލަމް ވިދާޅުވީ، ދައުލަތުގެ މަގާމެއްގައި ހުރި ބޭފުޅަކު މަޖިލީސް މެންބަރުންގެ ދަތްދޮޅި ދުއްވާލާނެކަމަށް ވިދާޅުވުމުން އެ ގޮވާލެވެނީ މާރާމާރީ ހިންގުމަށާ މަޖިލީސް މެންބަރުންނަށް އަނިޔާވެރިވުމަށް ކަމަށެވެ. މިކަމާމެދު ކަންބޮޑުވުން ފާޅުކުރައްވާ އަސްލަމް އިތުރަށް ވިދާޅުވީ، މިކަމުންވެސް ދޭހަވަނީ ސަރުކާރުގެ އިސްވެރިންގެ ވިސްނުމުގަ ހުރީ އަނިޔާވެރިކަން އިސްކުރުން ކަމުގައެވެ.
މިނިސްޓަރު ޝަރީފް މިފަދައިން ވިދާޅުވުމުން އަރައިގަނެވުނީ މަޖިލީހުގެ އިމްތިޔާޒަށް ކަމަށާ، މަޖިލީހުގެ އިމްތިޔާޒު ކޮމިޓީއަށް މައްސަލަ ހުށަހަޅާނެކަމަށްވެސް އަސްލަމް ވިދާޅުވިއެވެ. އަދި ގޮތެއް ނިންމަވާނީ އިމްތިޔާޒު ކޮމިޓީން ކަމަށްވެސް ވިދާޅުވިއެވެ.
މީގެ އިތުރުން އަސްލަމް ވަނީ މަޖިލީސް މެންބަރުންނަށް އެކި ފަހަރުމަތިން އަނިޔާވެރިވިކަމުގެ މިސާލެއްގެ ގޮތުން ޑރ. އަފްރާޝީމަށް ދެވުނު ހަމަލާއާ މަޖިލީހުގެ ކުރީގެ ރައީސް މުޙައްމަދު ނަޝީދަށް ދިން ބޮމުގެ ހަމަލާ ފާހަގަކުރައްވާފައެވެ. އަދި މިނޫނަސް އެކި ފަހަރުމަތިން މަޖިލީސް މެންބަރުންނަށް ބިރު ދެއްކުމާ އަނިޔާވެރިކަމުގެ އެކި ކަންކަން ހިނގާފައިވާއިރު، ދައުލަތުގެ މަތީ މަގާމެއްގައި ހުރި ބޭފުޅަކު މަޖިލީސް މެންބަރުންގެ އިމްތިޔާޒަށް އަރައިގަނެވޭގޮތަށް ވާހަކަ ދެއްކެވުމުން، އެއީ ގައުމަށް ވެސް ވަރަށް ނުރައްކާތެރިކަމެއް ކަމަށް ދެކިވަޑައިގަންނަވާކަމަށް އަސްލަމް ވަނީ ވިދާޅުވެފައެވެ. އަދި ގޮށްމުށުގެ ބާރު އިސްކުރުމަށް ދައުލަތުގެ ވަޒީރަކު ވާހަކަ ދެއްކުމުން އާއްމު ރައްޔިތުންނަށްވެސް އަނިޔާވެރިކަން އިސްކުރުމަށް ދެވޭ ހިތްވަރެއްގެ ގޮތުގައި އަސްލަމް ވަނީ ފާހަގަ ކުރައްވާފައެވެ.
އަސްލަމް އިތުރަށް ވިދާޅުވީ، ދައުލަތުގެ ތިން ބާުރުންވެސް ރައްޔިތުންގެ ހައްގުގައި މަސައްކަތް ކުރަމުންދާން ޖެހޭނެކަމަށާ، ސަރުކާރުގެ ފަރާތުންވެސް މަޖިލީހަށް ދޭންޖެހޭ އެއްބާރުލުން ފުރިހަމައަށް ދޭންޖެހޭނެ ކަމަށެވެ. ނަމަވެސް، އޭގެ ބަދަލުގައި ދައުލަތުގެ އެއް ބާރުން އަނެއް ބާރަށް އިންޒާރުދެމުން ގެންދިއުމަކީ ބަލައިގަނެވޭނެ ކަމެއް ނޫންކަމަށާ، މި ސަރުކާރުން މިކަމާމެދު ކަމެއް ނުކުރިޔަސް މަޖިލީސް ރައީސްގެ ހައިސިއްޔަތުން އެކަން ހުއްޓުވުމަށްޓަކާ ކުރަންހުރި ހުރިހާ ކަމެއް ކުރައްވާނެކަމަށް އަސްލަމް ވަނީ ވިދާޅުވެފައެވެ.
