ޔުއެފާ އަންހެން ޗެމްޕިއަންސް ލީގުގެ ފައިނަލްގައި ސްޕެއިންގެ ބާސެލޯނާއާ ދެކޮޅަށް ނިކުންނައިރު، އެ ޓީމު ބަލި ކުރެވޭނެ ފެންވަރު ވުލްވްސްބާގުގައި އޮތް ކަމަށް އެ ޓީމުގެ ކޯޗު ޓޮމީ ސްޓްރޫޓް ބުނެފި އެވެ.
ސްޓްރޫޓް މިހެން ބުނީ ފައިނަލްގެ ކުރިން އޮތް ޕްރެސް ކޮންފަރެންސްގަ އެވެ. އޭނާ ބުނީ ވުލްވްސްބާގަށް ކުރިއެރުންތަކެއް ލިބިފައިވާ ކަމަށެވެ. ޚާއްސަކޮށް ސެމީ ފައިނަލްގެ ދެ ލެގު ނިމުނުއިރު، އެކަން ވަރަށް ބޮޑަށް ފާހަގަވި ކަމަށް އޭނާ ބުންޏެވެ. އޭނާ ބުނީ ވުލްވްސްބާގަށް ފައިނަލަށް އާދެވުނީ ވެސް އެއް ހަފްތާގެ ތެރޭގައި ސެމީގެ ފުރަތަމަ ލެގުން ހެދުނު ގޯސްތައް ރަނގަޅުކޮށް، ދެ ވަނަ ލެގުގައި ކުރި ހޯދައިގެން ކަމަށެވެ. އެހެންކަމުން މި ސީޒަނުގައި މިހާރު ވެސް ކުރިއަށް އެއް ފިޔަވަޅު އެޅިފައިވާ ކަމަށް އޭނާ ޤަބޫލު ކުރެ އެވެ. ސްޓްރޫޓް ބުނީ މި ސީޒަންގެ ކުރިން ވެސް ބާސެލޯނާއާ ދެކޮޅަށް ފައިނަލްގައި ކުޅެން ބޭނުންވާ ވާހަކަ އޭނާ ބުނެފައިވާނެ ކަމަށެވެ. އެހެންކަމުން މިހާރު ޓީމު އޮތް ފޯމާއި، ޓީމަށް އައިސްފައިވާ ކުރިއެރުންތަކަށް ބަލާއިރު ފައިނަލްގައި ކުރި ހޯދޭނެ ކަަމަށް އޭނާ ވަނީ ބުނެފަ އެވެ. އެކަމަށްޓަކައި ވުލްވްސްބާގުގައި ފެންވަރު ރަނގަޅު ސްކޮޑެއް އޮތް ކަމަށާއި، ޚާއްސަ ކަންތައްތަކެއް ވެސް ހުރި ކަމަށް އޭނާ ވަނީ ބުނެފަ އެވެ.
ސްޓްރޫޓް ބުނީ މި ސީޒަނުގައި އެންމެ ރަނގަޅު ފޯމުގައި އޮތް އެއް ޓީމަކީ ބާސެލޯނާ ކަމަށެވެ. އެ ޓީމާ ދެކޮޅަށް ކުޅެން އުނދަގޫވާނެ ކަމަށާއި، ނަމަވެސް މުޅި ޓީމުގެ ހިތްވަރަކީ ކުޅުންތެރިން ދަނޑު މަތީގައި ދައްކާ ކުޅުން ކަމަށް އޭނާ ބުންޏެވެ. އޭނާ ފާހަގަ ކުރި ގޮތުގައި މި ސީޒަނަކީ ވުލްވްސްބާގަށް ކާމިޔާބު ސީޒަނެކެވެ. ޖަރުމަނު ލީގުގެ ދެ ވަނަ ލިބުނުއިރު، ޗެމްޕިއަންސް ލީގުގެ ފައިނަލްގައި އޮވެވުމަކީ އެކަމުގެ ހެއްކެއް ކަމަށް އޭނާ ދެކެ އެވެ. ނަމަވެސް ޗެމްޕިއަންސް ލީގު ކާމިޔާބު ކުރެއްވިއްޖެ ނަމަ، ސީޒަން އިތުރަށް ފުރިހަމަ ވެގެންދާނެ ކަމަށް ސްޓްރޫޓް ވަނީ ބުނެފަ އެވެ.
