އައްޑޫ ސިޓީގައި ކުރިއަށްދާ އެންމެ ބިޔަ ބޮޑު މަޝްރޫއު ކަމަށްވާ ބިން ހިއްކުމުގެ މަޝްރޫއުގެ އެންމެ ފަހުގެ ތަފްސީލަށް ބަލާއިރު، ހިތަދޫ ޒޯން 2ގެ ޑްރެޖިންގ މަސައްކަތުގެ ޓްރައިލް ލޯޑް އެޅުމުގެ މަސައްކަތް ނިންމާލައިފިއެވެ.
ބިން ހިއްކުމުގެ މަޝްރޫއުގެ އަމަލީ މަސައްކަތް ފެއްޓުމުގެގޮތުން ނެދަލޭންޑްސްގެ ވެން އޫޑް ޑްރެޖިންގެ HAM318 ޑްރެޖަރު އައްޑޫ ސިޓީގައި މޮބިލައިޒްކޮށްފައިވަނީ 28 މެއިގައެވެ.
ބިންހިއްކުމުގެ މަސައްކަތް ރަސްމީކޮށް ފެށުމަށް ހަމަޖެހިފައިވަނީ މަރަދޫ އަދި މަރަދޫ-ފޭދޫ ސަރަހައްދުންނެވެ. މިހާތަނަށް މަރަދޫ، މަރަދޫ-ފޭދޫގެ ބަންޑް އެޅުމުގެ މަސައްކަތް ނިމިފައިވާއިރު ހިތަދޫ ޒޯން 1 އަދި 2ގެ ބަންޑު އެޅުމުގެ މަސައްކަތް ދަނީ ކުރަމުންނެވެ.
މީގެ އިތުރުން ޓޫރިޒަމަށް ތަރައްގީކުރުމަށް ވަކިން ހިއްކާ ރަށްރަށުގެ ތެރެއިން 2 ރަށެއްގެ ބަންޑު މަސައްކަތް ނިމި، ތިންވަނަ ރަށުގެ ބަންޑު އެޅުމުގެ މަސައްކަތް ދަނީ ކުރެވެމުންނެވެ.
4 ލޭން ލިންކް ރޯޑްގެ އެމްބޭންކްމަންޓުގެ މަސައްކަތުގެ ބޮޑު ބައެއް ވަނީ ނިމިފައެވެ. މި މަސައްކަތްތައް ކުރަނީ އީއައިއޭގައި ވާގޮތުގެ މަތިން، މޮނިޓަރިންގ އަދި މިޓިގޭޝަންގެ ހުރިހާ ފިޔަވަޅުތަކެއް އެޅުމަށްފަހުއެވެ. އަދި، ބިން އިތުރުކުރެވޭ ސަރަހައްދުގައި ހުރި 70،000 މުރަކަ ކޮލޮނީ ރައްކާތެރި ސަރަހައްދަށް ބަދަލުކުރުމުގެ މަސައްކަތް ވަނީ ނިންމާލެވިފައެވެ.
އައްޑޫން ބިން ހިއްކަނީ ރިސޯޓު ތަރައްގީކުރުމަށާއި ގެދޮރުގެ މަޝްރޫތައް ހިންގުމުގެ އިތުރުން، ވިޔަފާރި ބޭނުންތަކަށް ހާއްސަކޮށްގެން ކަމަށާއި، ބިން ހިއްކަނީ ހިތަދޫއާއި ހުޅުދޫ/މީދޫގެ އިތުރުން މަރަދޫއާއި މަރަދޫފޭދޫން ކަމަށް ނިޒާރު ވިދާޅުވިއެވެ. އަދި ރިސޯޓު ހިންގަން މުޅިން އަލަށް ފަސް ރަށެއް އުފެއްދުމަށް ނިންމާފައިވާއިރު، މި މަޝްރޫއުގެ ދަށުން ޖުމްލަ 194.3 ހެކްޓަރުގެ ބިން ހިއްކުމަށް ހަމަޖެހިފައިވެއެވެ.
އައްޑޫ ސިޓީން ބިން ހިއްކުމަށް ރޭވިފައިވާ ގޮތް:
* ހިތަދޫން 90 ހެކްޓަރުގެ ބިން
* މަރަދޫ / މަރަދޫފޭދޫން 76 ހެކްޓަރުގެ ބިން
* ހުޅުދޫމީދޫން 3 ހެކްޓަރުގެ ބިން
* ހުޅުމީދޫ ކައިރީގައި ޓޫރިޒަމަށް ހާއްސަކޮށްގެން ފަސް ހެކްޓަރުގެ ދެ ރަށް ހިއްކުން
* ޓޫރިޒަމަށް ހާއްސަކޮށްގެން 3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކުން
މިއީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށްގެންދާ މަޝްރޫއަކަށްވާއިރު، މި މަޝްރޫއުއަށް 70-75 މިލިއަން ޑޮލަރު ހަރަދުވާނެކަމަށް ލަފާކުރެވެއެވެ. އަދި އައްޑޫ ބިން ހިއްކުމުގެ މަސައްކަތް އަންނަ އޯގަސްޓް އަދި ސެޕްޓެމްބަރު ހިސާބުގައި އެއްކޮށް ނިންމާލެވޭނެކަމަށް އައްޑޫ ސިޓީ ކައުންސިލުން ބުނެއެވެ.
އައްޑޫގެ ބިން ހިއްކުމުގެ އަމަލީ މަސައްކަތް ކުރުމަށް ސަރުކާރުން ހަވާލުކޮށްފައިވަނީ ނެދަލޭންޑްސްގެ ވެން އޫޑް ޑްރެޖިން އާއެވެ. އައްޑޫ ބިން ހިއްކުމުގެ މަޝްރޫއާއި، ހިއްކާ ސަރަހައްދު ހިމާޔަތްކުރުމަށް 1.3 ބިލިއަން ރުފިޔާ ހަރަދުކުރުމަށް ނިންމާފައިވާއިރު، މިމަޝްރޫއުގެ މަސައްކަތާއެކު އައްޑޫގެ ތަރައްގީގެ މާސްޓަރ ޕްލޭނަށް ބޭނުންވާ ގިނަ ކަންކަން ފުރިހަމަވެގެންދާނެއެވެ.
