އައްޑޫ ބިންހިއްކުން: ނެދަލޭންޑްސްގެ ވެން އޫޑް ޑްރެޖަރ އައްޑޫ ސިޓީއަށް ބަނދަރުކޮށްފި
28 މެއި 2023 | އާދީއްތަ 12:34މިމަޝްރޫއުގެ ދަށުން 194.3 ހެކްޓަރުގެ ބިން ހިއްކާނެ
އައްޑޫ ބިން ހިއްކުމަށް ބޭނުންކުރާ ނެދަލޭންޑްސްގެ ވެން އޫޑްގެ ޑްރެޖަރ އައްޑޫސިޓީގައި ބަނދަރުކޮށްފައި
އައްޑޫ ސިޓީގައި ކުރިއަށްދާ އެންމެ ބިޔަ ބޮޑު މަޝްރޫއު ކަމަށްވާ، ބިން ހިއްކުމުގެ މަޝްރޫއުގެ އަމަލީ މަސައްކަތް ފެއްޓުމުގެ ގޮތުން ނެދަލޭންޑްސްގެ ވެން އޫޑް ޑްރެޖިންގެ، ޑްރެޖަރ އައްޑޫ ސިޓީގައި ބަނދަރުކޮށްފިއެވެ.
މިކަމާއި ގުޅިގެން އައްޑޫ ސިޓީގެ މޭޔަރ އަލީ ނިޒާރު ރާއްޖެއެމްވީއާއި ވާހަކަދައްކަވަމުން ވިދާޅުވީ މިއީ އައްޑޫ ސިޓީގެ ރައްޔިތުންގެ ވަރަށް ބޮޑު ހުވަފެނެއް ކަމަށާއި، މާދަމާ ހެނދުނު ބިން ހިއްކުމުގެ އަމަލީ މަސައްކަތް ފެށުމުގެ ގޮތުން ޓެސްޓަށް ވެލި އަޅަން ފައްޓާނެ ކަމަށެވެ.
މި މަސައްކަތަށް ހޭދަވާނީ ގިނަވެގެން 2 މަސް ދުވަސް ކަމަށާއި، ޖުލައި މަސް ނިމުމުގެ ކުރިން ބިން ހިއްކައި ނިމޭނެކަމަށް އުންމީދުކުރައްވާކަމަށް ނިޒާރު ވިދާޅުވިއެވެ. މި މަސައްކަތް ނިމުމުން މަރަދޫ އަދި މަރަދޫފޭދޫގެ ރަށްގިރުމުގެ މައްސަލަ ހައްލުވާނެކަމަށް ނިޒާރު ވިދާޅުވިއެވެ.
އައްޑޫން ބިން ހިއްކަނީ ރިސޯޓު ތަރައްގީ ކުރުމަށާއި ގެދޮރުގެ މަޝްރޫތައް ހިންގުމުގެ އިތުރުން ވިޔަފާރި ބޭނުންތަކަށް ހާއްސަކޮށްގެން ކަމަށާއި ބިން ހިއްކަނީ ހިތަދޫ އާއި ހުޅުދޫ/މީދޫގެ އިތުރުން މަރަދޫ އާއި މަރަދޫފޭދޫން ކަމަށް ނިޒާރު ވިދާޅުވިއެވެ. އަދި ރިސޯޓު ހިންގަން މުޅިން އަލަށް ފަސް ރަށެއް އުފެއްދުމަށް ނިންމައިފައިވާއިރު ޖުމްލަ މިމަޝްރޫއުގެ ދަށުން 194.3 ހެކްޓަރުގެ ބިން ހިއްކުމަށް ހަމަޖެހިފައިވެ އެވެ.
އައްޑޫ ސިޓީން ބިން ހިއްކުމަށް ރޭވިފައިވާ ގޮތް:
* ހިތަދޫން 90 ހެކްޓަރުގެ ބިން
* މަރަދޫ / މަރަދޫފޭދޫން 76 ހެކްޓަރުގެ ބިން ހިއްކުން
* ހުޅުދޫމީދޫން 3 ހެކްޓަރުގެ ބިން
* ހުޅުމީދޫ ކައިރީގައި ޓޫރިޒަމަށް ހާއްސަކޮށްގެން ފަސް ހެކްޓަރުގެ ދެ ރަށް ހިއްކުން
* ޓޫރިޒަމަށް ހާއްސަކޮށްގެން 3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކުން
މިއީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށްގެންދާ މަޝްރޫއަކަށްވާއިރު، މިމަޝްރޫއުއަށް 70-75 މިލިއަން ޑޮލަރު ހަރަދު ވާނެ ކަމަށް ލަފާކުރެވެއެވެ. އަދި އައްޑޫ ބިން ހިއްކުމުގެ މަސައްކަތް އަންނަ އޯގަސްޓް އަދި ސެޕްޓެމްބަރު ހިސާބުގައި އެއްކޮށް ނިންމާލެވޭނެކަމަށް އައްޑޫ ސިޓީ ކައުންސިލުން ބުނެއެވެ.
އައްޑޫގެ ބިން ހިއްކުމުގެ އަމަލީ މަސައްކަތް ކުރުމަށް ސަރުކާރުން ހަވާލުކޮށްފައިވަނީ ނެދަލޭންޑްސްގެ ވެން އޫޑް ޑްރެޖިން އާއެވެ. އައްޑޫ ބިން ހިއްކުމުގެ މަޝްރޫ އާއި ހިއްކާ ސަރަހައްދު ހިމާޔަތް ކުރުމަށް 1.3 ބިލިއަން ރުފިޔާ ހަރަދު ކުރުމަށް ނިންމާފައިވާއިރު، މިމަޝްރޫއުގެ މަސައްކަތާއި އެކު އައްޑޫގެ ތަރައްޤީގެ މާސްޓަރ ޕްލޭނަށް ބޭނުންވާ ގިނަ ކަންކަން ފުރިހަމަވެގެންދާނެ އެވެ.
