31 އަހަރަށްފަހު ލޫޓަން ޓައުން، އިނގިރޭސި އެންމެ މަތީ ލީގަށް
28 މެއި 2023 | އާދީއްތަ 11:13މިއީ ލޫޓަން ޓައުންއަށް ޕްރިމިއަރ ލީގުން ޖާގަ ލިބުނު ފުރަތަމަ ފަހަރު
ޕްލޭ އޮފް ކާމިޔާބު ކުރުމަށްފަހު ލޫޓަން ޓައުން އުފާ ފާޅުކުރަނީ | ރޮއިޓާސް
އިނގިރޭސި ޕްރިމިއަރ ލީގުގެ ފަހު ޖާގަ ހޯދުމަށް ކުޅެވުނު ޗެމްޕިއަންޝިޕް ޕްލޭ އޮފް ފައިނަލުގައި ޕެނަލްޓީ ޖަހައިގެން މޮޅުވެ، 31 އަހަރު ފަހުން ލޫޓަން ޓައުންއަށް ފުރަތަމަ ޑިވިޝަންގައި ކުޅުމުގެ ފުރުސަތު ލިބިއްޖެއެވެ.
1992 ވަނަ އަހަރު ޕްރިމިއަރ ލީގު އުފެދުމުގެ ކުރިން ލޫޓަން ޓައުން ވަނީ ރެލިގޭޓުވެފައެވެ. މި ސީޒަނުގައި ޗެމްޕިއަންޝިޕްގެ ތިން ވަނައިގައި ނިންމާލިއިރު، ޕްރިމިއަރ ލީގުން ޖާގަ ހޯދުމަށް ޕްލޭ އޮފް މެޗުތަކެއް ކުޅެން ޖެހެއެވެ. ޕްލޭ އޮފް ސެމީގައި ލޫޓަން ޓައުން ވަނީ 3-2 ގެ އެގްރިގޭޓް ނަތީޖާއަކުން ސަންޑަލެންޑް ބަލިކޮށްފައެވެ. އަދި ކޮވެންޓްރީ ފައިނަލަށް ދިޔައީ މިޑިލްސްބްރޯ ކައިރިން 1-0 ން މޮޅުވެގެނެވެ.
ލޫޓަން އާއި ކޮވެންޓްރީ ބައްދަލުކުރި ފައިނަލް މެޗުގައި ފުރަތަމަ ލީޑު ނެގީ ލޫޓަން އެވެ. މެޗުގެ 23 ވަނަ މިނެޓުގައި އެ ލަނޑު ޖެހީ ޖޯޑަން ކްލާކެވެ. ނަމަވެސް، މެޗުގެ 66 ވަނަ މިނެޓުގައި ގުސްތާވޯ ހެމާ ވަނީ ކޮވެންޓްރީ އަށް ލަނޑެއް ޖަހާ، ނަތީޖާ ހަމަހަމަ ކޮށްދީފައެވެ. މެޗުގެ 90 މިނެޓު ހަމަވެ، އެކްސްޓްރާ ޓައިމް ނިމުނުއިރުވެސް އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެނެވެ. ދެ ޓީމުންވެސް ވަނީ ފުރަތަމަ ފަސް ޕެނަލްޓީ އެތެރެކޮށްފައެވެ. ލޫޓަންގެ ހަ ވަނަ ޕެނަލްޓީ ޑޭން ޕޮޓްސް ކާމިޔާބުކުރިއިރު، ކޮވެންޓްރީގެ ހަ ވަނަ ޕެނަލްޓީ ފެންކަޓީ ޑާބޯ އަށް ވައްދާލެވޭ ގޮތެއް ނުވިއެވެ. ލޫޓަން މެޗު ކާމިޔާބުކުރީ ޕެނަލްޓީ ޖަހައިގެން 7-6 ގެ ނަތީޖާއަކުންނެވެ.
ޕްލޭ އޮފް ފައިނަލުން މޮޅުވުމާއެކު، އޯގަސްޓުގައި ފެށުމަށް ހަމަޖެހިފައިވާ ޕްރިމިއަރ ލީގުގެ އައު ސީޒަނުގައި ލޫޓަން ޓައުން ވާދަކުރާނެއެވެ. ލޫޓަންގެ އިތުރުން ޕްރިމިއަރ ލީގަށް އެނބުރި އަންނާނީ ޗެމްޕިއަންޝިޕުގެ އެއްވަނަ ބާންލީ އާއި ދެވަނަ ޝެފީލްޑް ޔުނައިޓެޑެވެ.
