ނާކާމިޔާބު ސީޒަނަކަށްވީނަމަވެސް، ފަހުވަގުތާ ޖެހެންދެން މަސައްކަތް ކުރާނަން: ޓުޗެލް

ބަޔާން މިއުނިކްގެ ސީޒަން މާޔޫސް ކުރުވަނިވި ނަމަވެސް ލީގުގެ ފަހު މެޗުގައި ކުޅުންތެރިން ފުރިހަމައަށް މަސައްކަތް ކުރާނެކަމަށް އެ ޓީމުގެ ކޯޗު ތޯމަސް ޓުޗެލް ބުނެފިއެވެ.

ޖެހިޖެހިގެން 10 ފަހަރު ލީގުގެ ޗެމްޕިއަންކަން ހޯދާފައިވާ ބަޔާން މި ވަގުތު ދެވަނައިގައި އޮތް އިރު، ލީގު ލިބެން އޮތް ހަމަ އެކަނި ގޮތަކީ ފަހު މެޗުގައި ކޮލޯން ބަލިކޮށް، މެއިންޒް ކައިރިން ޑޯޓްމަންޑަށް މޮޅުނުވެވުމެވެ. ޑޯޓްމަންޑަށް ވުރެ ދެ ޕޮއިންޓު ފަހަތުގައި ބަޔާން އޮތްނަމަވެސް، ފައިދާ ގޯލު ގިނައީ ބަޔާންގެއެވެ.

ހުކުރު ދުވަހު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން ޓުޗެލް ބުނީ، ޑޯޓްމަންޑާ މެދު އެއްޗެއް ބުނަން ނެތްކަމާ، އަމިއްލަ ބާރު ގެއްލުނީ ޓީމަށް ހެދުނު ގޯސްތައް ގިނަވުމުން ކަމަށެވެ. އޭނާ އިތުރަށް ބުނީ، މި ސީޒަނަކީ ހިތްހަމަޖެހޭ ވަރުގެ ސީޒަނެއް ނޫންކަމަށެވެ.

ޗެލްސީއަށް 2021 ވަނަ އަހަރުގެ ޗެމްޕިއަންސް ލީގު ހޯދައިދިން އަދި ޕީއެސްޖީ އަށް ވެސް ކޯޗުކޮށްދިން ޓުޗެލް އަށް ޕްރެޝަރު ބޮޑުވަމުން އަންނައިރު، ތިން ތައްޓަށް ވާދަކުރަމުން ދިޔަ ދަނޑިވަޅެއްގައި ކުއްލިއަކަށް ނަގޭލްސްމަން ދޫކޮށްލުމުން ސަޕޯޓަރުންގެ ހިތްހަމަނުޖެހުން އަމާޒުވެއެވެ.

ބަޔާން އާ ޓުޗެލް ހަވާލުވިފަހުން ޖަރުމަނު ކަޕުންނާއި ޗެމްޕިއަންސް ލީގުން ވަނީ ކަޓާފައެވެ. އަދި ލެއިޕްޒިގް އަތުން ބަލިވުމުން ލީގު ހޯދުމުގެ އަމިއްލަ ބާރުވެސް ވަނީ ގެއްލިފައެވެ.