އެމްއާރްއެމުން އެދެނީ ވަކިވެވަޑައިގެންނެވި ބޭފުޅުން ސަރުކާރާއެކު ތިއްބެވުމަށް

މޯލްޑިވްސް ރިފޯމް މޫވްމަންޓް (އެމްއާރްއެމް) އިން ވަކިވަޑައިގަތް ބޭފުޅުން ސަރުކާރުގެ މަގާމުތަކުން ވަކިވެވަޑައިނުގަތުމަށް އެ ޕާޓީއިން އެދިއްޖެއެވެ.

އެމްއާރްއެމްއިން އެފަދައިން ބުނީ އެ ޕާޓީން ނެރުނު ބަޔާނެއްގައެވެ. އެމްއާރްއެމްގައި އިސްކޮށް އުޅުއްވި 8 ބޭފުޅުން ވަނީ އާދިއްތަ ދުވަހު ޕާޓީން ވަކިވެވަޑައިގަންނަވާފައެވެ. އެކަމާއި ގުޅިގެން އެމްއާރްއެމުން ބުނީ އެ ބޭފުޅުން އެ ޕާޓީން ވަކިވެވަޑައިގަތުމަކީ އެ ޕާޓީއަށް ލިބުނު ވަރަށް ބޮޑު ހިތާމައެއް ކަމަށެވެ. އަދި އެބޭފުޅުން ޕާޓީއަށް ކޮށްދެއްވާފައި ޚިދުމަތްތަކަށް ވަނީ ޝުކުރު އަދާކޮށްފަ އެވެ.

އެމްއާރުއެމް އިން ރައީސް އިބްރާހީމް މުހައްމަދު ސާލިހުގެ ސަރުކާރާ ދެކޮޅު ކަމަށް ވިދާޅުވެ، ވަކިވެވަޑައިގެންނެވީ އެޕާޓީގެ 08 މެންބަރުންނެވެ. އިސްތިއުފާދެއްވާފައިވަނީ ޔޫއޭއީގައި ހުންނަވާ ދިވެހިރާއްޖޭގެ ޑެޕިއުޓީ ހައިކޮމިޝަނަރު މުހައްމަދު ފައިސަލް އާއި އެމްއައިޓީޑީސީގެ މެނޭޖިންގ ޑިރެކްޓަރު މުހައްމަދު ރާއިދު އާއި މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް މެރިން ރިސޯސަސްގެ ސީނިއަރ އެގްޒެކެޓިވް ޑިރެކްޓަރު އަބްދުލްހަމީދު އަހުމަދާއި އެ ޕާޓީގެ ނައިބު ރައީސް އަދި މޯލްޑިވްސް ގޭސްގެ މެނޭޖިން ޑިރެކްޓަރު ޝަޒައިލް ޝިޔާމާއި ޒުވާނުންގެ ކައުންސިލްގެ ރައީސް އަދި ޓޫރިޒަމް މިނިސްޓްރީގެ ސީނިއަރ ޕޮލިސީ ޑިރެކްޓަރު، އިބްރާހީމް ފަރުހާދާއި އެ ޕާޓީގެ ތަރުޖަމާނު އަދި ހެރިޓޭޖް މިނިސްޓްރީގެ ކޮމިއުނިކޭޝަން ޑިރެކްޓަރު އިސްމާއީލް ނާއިލް ނަޝީދު އަދި އެކްސްކޯ މެންބަރު ހަސަން ހައްޔާން އަހުމަދެވެ.