އިނގިރޭސި ޕްރިިމިއަރ ލީގުގެ ޗެމްޕިއަން މެންޗެސްޓަރ ސިޓީއާ އެއްވަރުކޮށް, ބްރައިޓަންއިން ކުރިއަށް އޮތް ސީޒަންގެ ޔޫރޮޕާ ލީގުގެ ޖާގައެއް ކަށަވަރުކޮށްފިއެވެ.

ސިޓީއަތުން ހޯދި ޕޮއިންޓާއެކު ބްރައިޓަންއިން ވަނީ 62 ޕޮއިންޓާއެކު ހަ ވަނަ ޔަޤީންކޮށްފައެވެ. ހަތްވަނާގައި އޮތް އެސްޓަން ވިލާއަށް ލިބެނީ 58 ޕޮއިންޓެވެ. ކޮންމެ ޓީމަކަށްވެސް ބާކީ އޮތީ އެއް މެޗެވެ. އެހެންކަމުން ބްރައިޓަންއަށް ހަ ވަނަ ގެއްލޭނެ އެއްވެސް ގޮތެއް ނެތެވެ. ސިޓީ އަތުން ބްރައިޓަން ޕޮއިންޓެއް ހޯދީ 1-1 ން މެޗު އެއްވަރުކޮށްގެންނެވެ. މެޗުގެ ފުރަތަމަ ހާފްގައި ލީޑް ނެގީ ސިޓީންނެވެ. ސިޓީއަށް ލީޑް ނަގައިދިނީ މިސީޒަންގައި ޢާއްމުކޮށް ފުރަތަމަ އެގާރައިން ޖާގަ ނުލިބޭ ފޮޑެންއެވެ. އޭނާއަށް ލަނޑުޖަހަން ފުރުޞަތު ތަނަވަސްކޮށްދިނީ ހާލަންޑެވެ. މެޗުގައި ހާލަންޑް ގޯލެއްވެސް ޖެހިއެވެ. އެކަމަކު ވީއޭއާރުން ބެލުމަށްފަހު ގޯލް ބަލައިނުގަތީ އެޓޭކްގައި ފައުލްކޮށްފައިވާތީއެވެ. ހާފް ނިމުމުގެ ކުރިން ބްރައިޓަންއިން ނަތީޖާ ހަމަހަމަކުރީ 19 އަހަރުގެ އެންސީސޯ ޖެހި ލަނޑުންނެވެ.

ސިޓީ އަތުން ޕޮއިންޓް މިގެއްލުނީ ވިދިވިދިގެން 12 މެޗުން މޮޅުވުމަށްފަހުއެވެ. އަދި މެޗުން ޕޮއިންޓް ގެއްލުނު އިރު ސިޓީން ވަނީ ލީގު ޗެމްޕިއަން ޓްރޮފީވެސް އުފުލާލާފައެވެ.