ކުލަޔާއި ނަން ނަކަލުކުރުމުން، ނަޝީދުގެ ދަ ޑިމޮކްރެޓްސްއަށް އެމްޓީޑީން ފާޑުކިޔައިފި

ކުލަޔާއި ނަން ނަކަލުކުރުމުން، ''ނަޝީދުގެ ދަ ޑިމޮކްރެޓްސް'' އަށް މޯލްޑިވްސް ތަރޑްވޭ ޑިމޮކްރަޓްސް (އެމްޓީޑީ)ން ފާޑުކިޔައިފިއެވެ.

އެމްޓީޑީން ބުނީ އެ ޕާޓީގެ ފަލްސަފާއާއި، ނަމާއި، ފިކުރާއި، އަދި ޚިޔާރުކުރި ކުލަތަކަކީ އެ ޕާޓީގެ ލީޑަރު އަހުމަދު އަދީބު ދޫނިދޫގެ އެކަހެރި ގޮޅިއެއްގައި ބަންދުކޮށްފައި ހުންނެވި ދުވަސްވަރު، ޕާޓީގެ ލީޑަރު ޚިޔާރުކުރެއްވި ކުލައާއި ނަން ކަމަށެވެ. އަދި ސެންޓްރިސްޓް ޑިމޮކްރެޓިކް ސިޔާސީ ފިކުރުތައް ފުރިހަމައަށް ގަބޫކުރާތީ، ތަރޑްވޭ ޑިމޮކްރެޓުންގެ ނަން ޚިޔާރުކުރީކަމަށް އެމްޓީޑީން ބުނެއެވެ.

އަދީބު ސްކައި ބްލޫ ޚިޔާރުކުރެއްވިގޮތަށް އިޝާރާތްކޮށް އެމްޓީޑީން ބުނީ، އެއީ ތިން އަހަރު ވަންދެން އޭނާގެ ގޮޅިން ފެނިވަޑައިގަންނަވާ ހަމައެކަނި އުންމީދަށް ވާތީ ކަމަށެވެ.

މީގެ އިތުރުން އެމްޓީޑީން ބުނީ، އައު ސިޔާސީ އެހެން ޕާޓީތަކުގެ ނަންތަކާއި ކުލަތައް އެ ޕާޓީން އިންސްޕަޔަރވެފައި ވާތީ އެކަމާ އުފާކުރާ ކަމަށެވެ. ނަމަވެސް އާ ސިޔާސީ ޕާޓީތައް އުފެއްދުމުގައި އެޕާޓީތަކުން ނަންތަކާއި ކުލަތައް ކޮޕީނުކޮށް ޚިޔާރުކުރުމަށް އެމްޓީޑީން ވަނީ އެދިފައެވެ.

ގަވާއިދުގައި ވާގޮތުން؛ ސިޔާސީ ޕާޓީއެއްގެގޮތުގައި ސިޔާސީ ޕާޓީގެ ދަފްތަރުގައި ރަޖިސްޓްރީކުރާ ޕާޓީއެއްގެ ނަމާއި، ނިޝާނާއި، ސިއްކައާއި، އެނޫންވެސް ޕާޓީ ރަމްޒުކޮށްދޭ އެއްޗެހި، އެ ދަފްތަރުގައި ކުރިން ރަޖިސްޓްރީކޮށްފައިވާ އެހެން ޕާޓީއެއްގެ ނަމާއި، ނިޝާނާއި، ސިއްކައާއި، އެނޫންވެސް ޕާޓީގެ ރަމްޒުކޮށްދޭ އެއްޗެއްސާ އެއްގޮތްވެގެން ނުވާނެއެވެ.

ކުލަޔާއި ނަން ނަކަލުކުރުމުން ނަޝީދުގެ ދަ ޑިމޮކްރެޓްސް އެމްޓީޑީން ފާޑުކިޔާފައިވާއިރު، ދަ ޑިމޮކްރެޓްސްގެ ކުލައަކީ ކޯރންފްލާވަރ ބްލޫއެވެ.