އަދީބުގެ އެމްޓީޑީ ހިންގި އޮފީހުގެ ކުލި ނުދައްކައިގެން ތަނުގެ ވެރިފަރާތުން ކޯޓަށް

ކުރީގެ ނައިބު ރައީސް އަހުމަދު އަދީބު އިސްވެ އުފައްދަވައި ހިންގެވި މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ)ގެ އޮފީސް ހިންގި ތަނުގެ ކުލި ނުދެއްކުމާ ގުޅިގެން އެ ތަނުގެ ވެރިފަރާތުން ސިވިލް ކޯޓަށް މައްސަލަ ހުށަހަޅައިފިއެވެ.

ހޯމަ ދުވަހު ސިވިލް ކޯޓުން ނެރުނު ހުކުމުން އެނގުނު ގޮތުގައި، އެމްޓީޑީގެ އޮފީހުގެ ކުލީގެ ގޮތުގައި މިދިޔަ އޭޕްރީލްގެ ނިޔަލަށް 380،000 ރުފިޔާ ނުދައްކާ އޮތްއިރު، އަދިވެސް ތަން ހުސްނުކުރާތީ، އޭޕްރީލްގެ ފަހުން ތަން ހަވާލުކުރަންދެން ހިނގާ ކޮންމެ މަހަކަށް 30،000 ރުފިޔާގެ މަގުން ފައިސާ ހޯދުމަށް ތަނުގެ ވެރިފަރާތުން އެދިފައިވެއެވެ. މީގެއިތުރުން، ގާނޫނީ ވަކީލުންނަށް ހަރަދުކުރަން ޖެހުނު 25،920 ރުފިޔާ ވެސް ހޯދުމަށް އެދިފައިވެއެވެ.

މައްސަލަ ހުށަހެޅުމަށްފަހު އެމްޓީޑީން ޖަވާބުދާރީނުވުމާ ގުޅިގެން، ގައިރު ހާޒިރުގައި މައްސަލަ ނިންމައިދިނުމަށް ތަނުގެ ވެރިފަރާތުން އެދުނު ނަމަވެސް، އެކަމަށް ކަނޑައެޅިފައިވާ އިޖުރާއަތްތައް ފުރިހަމަނުކުރާތީ ކޯޓުން ވަނީ މައްސަލަ ބާތިލްކޮށްފައެވެ.

އެހެންނަމަވެސް، ކަނޑައެޅިފައިވާ އިޖުރާއަތްތަކާ އެއްގޮތަށް މައްސަލަ އަލުން ހުށަހެޅުމުގެ ފުރުސަތު އޮތްކަން ކޯޓުން ފާހަގަކޮށްފައިވެއެވެ.

އެމްޓީޑީއަކީ 2018 ވަނަ އަހަރުގެ ޑިސެމްބަރު މަހު އަދީބު އުފެއްދެވި ޕާޓީއެކެވެ. ނަމަވެސް ސިޔާސީ ޕާޓީތަކުގެ ގާނޫނުގައި ލާޒިމުކުރާ 3،000 މެންބަރުން ހަމަނުވުމާ ގުޅިގެން މި މަހުގެ ދެވަނަ ދުވަހު ވަނީ އުވާލެވިފައެވެ.

އަދީބަކީ ކުރީގެ ރައީސް ޔާމީންގެ ސަރުކާރުގައި ޓުއަރިޒަމް މިނިސްޓަރުކަމާއި ނައިބު ރައީސްކަން ކުރެއްވި ބޭފުޅެކެވެ. އެމްއެމްޕީއާރުސީގެ ކޮރަޕްޝަންގެ މައްސަލާގައި ޖަލު ހުކުމެއް ތަންފީޒުކުރެއްވުމަށްފަހު، ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގެ ފަހު ދުވަސްވަރު މަޢާފު ލިބިވަޑައިގެން، މިހާރު ހުންނެވީ ރާއްޖެއިން ބޭރުގައެވެ.